Read sango Marc 4 Bible Online

Marc 4 - sango bible

Marc 4

¹Jésus akiri ayeke fa ye na azo na yanga ti kota ngu ti Galile. Azo abongbi gbani gbani na tere ti lo. Tongaso lo ko na ya ti ngo, lo duti na ya ni. Gba ti azo ni angba ti ala na sese na yanga ti ngu ni.

²Lo fa na ala aye mingi na lege ti atoli. Na ya ti aye so lo fa, lo tene:

³“Ala ma! Mbeni zo ague na yaka ti lo ti bi ale ti kobe.

⁴So lo yeke bi ale ti kobe ni, ambeni atuku na tere ti lege; andeke aga si ate ni kue.

⁵Ambeni atuku na ndö ti sese so atêne ayeke daa, na ndo so sese ayeke daa mingi pepe. Ale ti kobe ni asigigi si akono hio, ngbanga ti so sese ni ali pepe.

⁶So lâ asu ngangu, lâ ni agbi ale ti kobe ni si ahole, ngbanga ti so agere ni ali mingi pepe.

⁷Ambeni le ni atuku na popo ti apere ti ki; apere ni alondo si akanga ndö ti ala kue, nilaa ala le pepe.

⁸Ambeni le ni atuku na nzoni sese, ala sigigi, ala kono si ale: ambeni ale baleota, ambeni ale baleomene si ambeni ale ngbangbo oko.”

⁹Jésus akiri atene: “Zo so ayeke na mê ti mango ndo, ayeke nzoni lo ma tënë so!”

¹⁰So Jésus ahon yongoro na tere ti gba ti azo ni awe, adisiple baleoko na use na ambeni zo so ayeke na tere ti lo ahunda lo na nda ti atoli so.

¹¹Lo tene na ala: “Ti ala azo ti mbi, Nzapa amu na ala lege ti hinga nda ti *Kodro-gbia ti Nzapa so angba na hondengo ni, me ti azo ti gigi, ala ma tënë ni na lege ti atoli

¹²titene: ‘ala yeke baa ndo, me ala yeke baa ye pepe; ala yeke ma ndo, me ala yeke ma ya ti atënë ni pepe, ngbanga ti ala yeke zia ngbene lege ti sarango ye ti ala si Nzapa azi tënë na li ti ala.’ ”

¹³Na pekoni, Jésus ahunda ala, atene: “Ala hinga nda ti toli so pepe? Fade ala yeke hinga nda ti tanga ti atoli ni kue tongana nyen?

¹⁴Zo ti bingo ale ti kobe na le ti yaka ayeke tongana zo so ayeke fa tënë ti Nzapa.

¹⁵Ambeni zo ayeke tongana tere ti lege so ale ti kobe atuku daa. So tënë ni ati na mê ti ala, Satan aga hio, lo zi tënë ni na be ti ala.

¹⁶Ambeni zo ayeke tongana sese so atêne ayeke daa; tongana ala ma tënë ni, ala yeda na ni hio na ngia,

¹⁷me tënë ni ali na ya ti be ti ala pepe, ala kpengba pepe. So ye ti ngangu asi na ala wala ye ti vundu asi na ala ndali ti tënë ni, fafade ala zia lege ti mabe.

¹⁸Ambeni zo ayeke tongana apere ti ki so ale ti kobe atuku daa; ala ma tënë ni,

¹⁹me be ti ala agi ala mingi na ndö ti aye ti dunia so; amosoro ahanda ala, nzara ti aye kue asara ala. Aye so kue akanga ndö ti tënë ni si ale pepe.

²⁰Ambeni zo ayeke tongana ale ti kobe so atuku na nzoni sese; ala ma tënë ni, ala yeda na ni si ala le: ambeni ale baleota, ambeni ale baleomene si ambeni ale ngbangbo oko.”

²¹Jésus atene na ala: “Zo ayeke zia wâ na lamba ti zia na gbe ti ta wala na gbe ti gbogbo? Lo yeke zia ni na ndö ti mbeni ye na nduzu pepe?

²²Ye so kue angba na hondengo ni, fade ayeke sigigi polele na le ti azo; ye so kue angba na gbe mingo, fade azo ayeke hinga tënë ni.

²³Zo so ayeke na mê ti mango ndo, ayeke nzoni lo ma tënë so!”

²⁴Lo kiri lo tene na ala: “Ala sara hange na tënë so ala yeke ma so! Ye so ala wani ayeke mu ti haka na ye na amba ti ala laa Nzapa ayeke mu ti haka na ye na ala; lo yeke zia mbeni na ndö ni.

²⁵Biani, zo so ayeke na ye, fade a yeke kiri ti mu mbeni na ndö ni na lo; me zo so ayeke na ye pepe, ataa kete ye so lo yeke na ni, fade a yeke zi ni na maboko ti lo.”

²⁶Jésus akiri atene: “*Kodro-gbia ti Nzapa ayeke tongana mbeni zo so abi le ti kobe na ya ti yaka.

²⁷Ataa lo lango, ataa lo lango pepe, bi na lâ, le ti kobe ni ayeke sigigi, akono; me lo hinga lege so le ti kobe ni asigigi si akono so pepe.

²⁸Gi sese wani laa asara si ye ni asigigi si akono. Kozoni gere ni akono, na pekoni, ale ni asigigi daa; ti hunzi na ni, le ti kobe ni akono nzoni.

²⁹Tongana ale ti kobe ni abe awe, zo ni amu nzenze ti lo ti gue ti fâ ni, ngbanga ti ngoi ti fango le ti kobe ni alingbi awe.”

³⁰Jésus akiri atene: “E lingbi ti haka *Kodro-gbia ti Nzapa na nyen? Toli wa laa e lingbi ti mu ti fa na nda ni?

³¹Kodro-gbia ti Nzapa ayeke tongana le ti keke so iri ni mutarde si a lu na sese; le ni ayeke kete kete ahon ale ti kobe ti dunia kue.

³²So a lu ni awe, keke ni akono aga kota ahon ambeni kugbe ti kasa kue ti yaka. Amaboko ni akono mingi si andeke asara da ti ala na gbe ti de ti akugbe ni.”

³³Jésus afa tënë mingi na azo na lege ti mara ti atoli tongaso. Lo fa na ala gi ye so ala lingbi ti ma ya ni.

³⁴Lo fa tënë na azo na lege ti toli, me tongana lo yeke gi lo oko na adisiple ti lo, lo fa nda ti tënë ni kue na ala.

³⁵Na lakui ni, Jésus atene na adisiple ti lo: “E fâ ngu, e gue na mbage ti ngu ni.”

³⁶Tongaso ala zia gba ti azo ni, ala ko na ya ti ngo so Jésus ayeke na ya ni si ala na lo ahon. Ambeni ngo nga ayeke hon na tere ti ala.

³⁷Me mbeni kota pupu alondo si ayeke ya ngangu. *Amapo alondo si ngu ayeke tuku na ya ti ngo ni; ngu aga nduru ti si ya ti ngo ni.

³⁸Jésus ayeke lango na mbage ti ngbonda ti ngo ni; lo zia li ti lo na ndö ti koli. Adisiple ti lo azingo lo, atene: “Wafango-ye, kuâ so e yeke na ya ni so, ayeke senge na le ti mo?”

³⁹Lo londo, lo suku ngangu na pupu ni, lo tene: “Kai! Duti kpoo!” Tongaso pupu ni akai si ndo ade ngii.

⁴⁰Na pekoni, Jésus atene na adisiple ti lo: “Mbeto asara ala ngbanga ti nyen? Ala de ti duti na mabe pepe?”

⁴¹Me tere ti ala kue ado, ala hunda tere ti ala, atene: “Zo so ayeke zo wa si pupu na ngu kue ayeke ma yanga ti lo so?”