Read sango Marc 6 Bible Online

Marc 6 - sango bible

Marc 6

¹Jésus alondo na ndo so si lo kiri na gbata so lo kono daa. Adisiple ti lo amu peko ti lo.

²Na *lango ti wungo tere, lo to nda ti fango ye na ya ti da ti sambelango Nzapa. Azo so abongbi mingi ti ma fango ye ti lo, li ti ala kue akpe. Ala hunda tere ti ala, atene: “Lo wara ye so kue na ndo wa? So mara ti ndara ti nyen laa lo yeke na ni so? Lo yeke sara aye ti kpene so na lege ti nyen?

³Sarapande so laa pepe? So molenge ti Marie laa pepe? Ita ti Jacques, na Yozes, na Jude na Simon so laa pepe? A-ita ti lo ti wali ayeke na popo ti e ge pepe?” Ye so asara si azo ni ake ti ma na be na lo.

⁴Jésus atene na ala: “Na ndo kue azo ayeke ne awayanga-Nzapa, me na gbata so a du lo daa, wala na ya ti sewa ti lo, wala na ya ti da ti lo, azo ayeke ne lo pepe.”

⁵Jésus alingbi ti sara mbeni ye ti kpene oko na ndo so pepe. Me lo zia gi maboko ti lo na ndö ti ambeni zo ti kobela si kobela ti ala akai.

⁶Li ti lo akpe ngbanga ti so azo ni ake ti ma na be. Na pekoni, Jésus ague ti fa ye na azo na ya ti akete kodro so ayeke na tere ti Nazaret.

⁷Lo iri adisiple ti lo baleoko na use si lo tokua ala use use. Lo mu na ala ngangu ti tumba asioni yingo

⁸si lo mu na ala yanga, lo tene: “Na guengo ti ala, ala mu mbeni ye pepe, ala mu gi mbeni keke; ala mu kobe wala bozo ti lege wala nginza na ya ti bozo pepe.

⁹Ala yu poro, me ala mu bongo use pepe.”

¹⁰Lo kiri lo tene na ala: “Tongana ala si na ya ti mbeni kodro, ala duti gi na ya ti da so wa ni ayamba ala daa, ngbii asi na ngoi so ala ye ti londo ti gue.

¹¹Tongana azo ti mbeni kodro ake ti yamba ala, wala aye ti ma tënë ti ala pepe, ala londo na ndo ni so ahon. Ala pika sese ti gbe ti gere ti ala ti fa na azo ni so ala sara sioni awe.”

¹²Tongaso adisiple ague ti fa tënë na azo, atene: “Ala zia ngbene lege ti sarango ye ti ala!”

¹³Ala tumba asioni yingo mingi si ala kai kobela ti azo mingi na sarango mafuta na tere ti azo ni.

¹⁴Gbia Herode ama tënë ti Jésus, ngbanga ti so iri ti lo awu amu ndo kue. Ambeni zo atene: “Jean-Baptiste azingo na kuâ awe! Ndani laa, lo yeke na ngangu ti sara na aye ti kpene so.”

¹⁵Me ambeni atene: “So Élie laa.” Ambeni akiri atene: “So mbeni wayanga-Nzapa tongana ambeni wayanga-Nzapa ti ando laa.”

¹⁶So Herode ama tënë so, lo tene: “So taa Jean-Baptiste laa! Mbi fâ go ti lo lani, me lo zingo na kuâ awe!”

¹⁷Biani, Herode amu ando yanga lo wani titene a gbu Jean, a kanga lo na zingiri si a bi lo na da ti kanga. Herode asara ye so ndali ti Herodiade, wali ti ita ti lo Philippe; Herode akiri amu Herodiade ti ga wali ti lo.

¹⁸Jean atene lani na Herode, atene: “*Ndia amu lege na mo pepe titene mo mu wali ti ita ti mo!”

¹⁹Be ti Herodiade ake Jean mingi si lo ye titene a fâ lo, me lo wara lege ni pepe.

²⁰Biani, Herode ayeke kpe mbeto ti Jean, ngbanga ti so lo hinga, lo tene, Jean ayeke zo ti mbirimbiri, lo yeke nga zo so Nzapa azia lo nde ndali ti lo. Herode ayeke bata lo titene azo asara sioni na lo pepe. Lo yeke na nzara mingi ti ma Jean-Baptiste; me tongana lo ma lo, lo hinga ye so lo lingbi ti sara ni pepe.

²¹Mbeni nzoni lege azi na Herodiade na lango ti matanga ti dungo Herode. Na lango ni so, Herode asara kota matanga ndali ti anene zo so ayeke sara kua na yangbo ti lo, aturugu ti lo ti kota kamba nga na akota zo ti Galile kue.

²²Molenge ti Herodiade ti wali ali na ya ti da ni si lo to nda ti dodo. Lo zia ngia na be ti Herode nga na azo so lo tisa ala. Tongaso gbia atene na molenge-wali ni, atene: “Hunda na mbi ye ti be ti mo, fade mbi yeke mu ni na mo.”

²³Lo deba yanga ti lo na molenge-wali ni, lo tene: “Mbi yeda na be ti mbi kue ti mu na mo ye so fade mo yeke hunda na mbi, ataa ndambo ti kodro-gbia ti mbi.”

²⁴Molenge-wali ni asigigi si ague, ahunda mama ti lo, atene: “Nyen laa mo ye mbi hunda?” Mama ti lo atene na lo: “Hunda gi li ti Jean-Baptiste!”

²⁵Molenge-wali ni akiri hio na tere ti gbia si lo tene na lo: “Mbi ye mo mu na mbi fafadeso li ti Jean-Baptiste na ya ti mbeni kpangbara sembe!”

²⁶Vundu agbu be ti gbia ni mingi; me ngbanga ti dengo ba so lo de na le ti azo so kue lo tisa ala na matanga ni, lege ti ke tënë ti lo ni ayeke daa pepe.

²⁷Nilaa lo tokua mbeni turugu hio; lo mu yanga na lo ti ga na li ti Jean-Baptiste. Turugu ni ague si lo fâ go ti Jean na da ti kanga.

²⁸Lo zia li ti lo ni na ya ti kpangbara sembe, lo ga na ni si lo mu na molenge-wali ni; molenge-wali ni amu na mama ti lo.

²⁹So adisiple ti Jean ama tënë ni, ala ga amu kuâ ti lo si ala gue, alu ni.

³⁰*Awatokua akiri na tere ti Jésus si ala fa na lo peko ti aye so kue ala sara nga na aye so kue ala fa ni.

³¹Gba ti azo ayeke ga, ayeke gue, ayeke ga, ayeke gue; ye so asara si Jésus na awatokua awara lege ti te kobe pepe. Ndani laa lo tene na ala: “Ala ga, e gue na mbeni ndo so zo ayeke daa pepe titene e wu tere ti e kete si.”

³²Tongaso ala mu mbeni ngo, ala gue na mbeni ndo so zo ayeke daa pepe ti duti kâ kpoo.

³³Me azo mingi abaa ala na guengo ni si ahinga ala. Azo alondo na ya ti agbata nde nde, ala mu lege na gere si asi kozo na ndo so Jésus na awatokua ni ayeke gue daa.

³⁴So Jésus asigigi na ya ti ngo ni, lo baa gba ti azo; mawa ti ala agbu lo, ngbanga ti so ala yeke tongana ataba so zo ti batango ala ayeke daa pepe. Tongaso lo fa aye mingi na ala.

³⁵So ndo aga nduru ti vuko, adisiple ti Jésus aga nduru na tere ti lo si ala tene na lo: “Ngbonga ahon awe si na ndo so, zo ayeke daa pepe.

³⁶Mo zia lege na azo so ti gue na akete kodro ti yanga ti yaka nga na akete kodro so ayeke nduru ge si ala vo kobe ti te.”

³⁷Jésus akiri tënë na ala: “Ala wani amu kobe na azo ni ti te!” Me ala hunda lo, atene: “Mo ye e gue, e vo mapa alingbi na ale ti nginza ngbangbo use si e mu na ala ti te?”

³⁸Jésus ahunda ala: “Ala yeke na mapa oke? Ala gue, abaa si.” Ala gue, abaa si ala ga atene na lo: “E yeke na mapa oku na asusu use.”

³⁹Tongaso Jésus amu yanga na adisiple ti lo ti tene na azo ni kue ti bongbi li ti ala ti duti nde nde na ndö ti fini pere.

⁴⁰Azo ni aduti, ambeni ngbangbo oko ngbangbo oko, ambeni baleoku baleoku.

⁴¹Jésus amu mapa oku na asusu use so, lo yo le ti lo na nduzu, lo mu singila na Nzapa. Na pekoni, lo fâ ya ti amapa ni, lo mu na adisiple ti lo ti kangbi ni na azo ni kue. Lo kangbi nga asusu use so na azo kue.

⁴²Zo oko oko ate ya ti lo asi.

⁴³Adisiple aro tanga ti anduru mapa ni na asusu ni so angba asi sakpa baleoko na use.

⁴⁴Azo so kue ate mapa ni, akoli ayeke saki oku.

⁴⁵Gi hio na pekoni, Jésus amu yanga na adisiple ti lo titene ala ko na ya ti ngo ti gue kozo ti lo na mbage ti ngu, na mbage ti gbata ti Betsaida si lo wani, lo ngba ti lo na peko ti mu lege na gba ti azo so ti kiri na ndo ti ala.

⁴⁶So lo zia lege na ala si ala gue awe, lo gue na li ti mbeni hoto ti sambela.

⁴⁷So ndo avuko awe, ngo ni ayeke kâ na le ti ngu si Jésus angba gi lo oko na sese.

⁴⁸Lo baa adisiple ti lo ayeke baa pasi mingi ti hon na li ni ngbanga ti pupu ayeke kiri ala kiringo na peko. Ye so asi na ala nduru na yanga ti ndaperere. Tongaso Jésus atambula na gere na le ti ngu ti gue na mbage ti ala. Lo ye ti hon ala hongo.

⁴⁹So ala baa lo na tambulango na le ti ngu ni, ala baa ti ala atene, so toro laa si ala to nda ti dekongo.

⁵⁰Na bango lo, mbeto asara ala kue. Me hio tongaso, Jésus atene na ala: “Ala de be ti ala, so mbi laa! Mbeto asara ala pepe!”

⁵¹Na pekoni, lo ko na ya ti ngo na tere ti ala si pupu ni akai. Li ti adisiple ti lo kue akpe,

⁵²ngbanga ti so ala hinga nda ti ye ti kpene ti amapa so pepe. Ala ngba ti kpengba be ti ala.

⁵³So ala fâ ngu awe, ala si na sese ti Genezaret si ala kanga ngo ti ala na yanga ti ngu ni.

⁵⁴Gi so ala sigigi na ya ti ngo ni, azo ahinga Jésus hio.

⁵⁵Ala mu loro ague na sese ni kue, ala mu azo ti kobela na ndö ti akelekpa ti ga na ala na lo, na ndo so kue ala ma a tene, Jésus ayeke daa.

⁵⁶Na ndo so kue Jésus ayeke hon daa, wala na ya ti agbata, wala na ya ti akete kodro, wala na ya ti akete kodro so ayeke na yanga ti yaka kue, azo ayeke mu azo ti kobela, azia ala na ndö ti abalabala; ala hunda na lo titene lo zia ala ti ndu gi yanga ti kota bongo ti lo. Azo so kue andu lo, tere ti ala aga nzoni.