Read sango Luc 12 Bible Online

Luc 12 - sango bible

Luc 12

¹Na ndembe ni so, azo abongbi gbani gbani, ala yeke pete tere na popo ti ala si Jésus ato nda ti tene tënë na adisiple ti lo, lo tene: “Ala sara hange na mama ti mapa ti *afarizien, so ti tene azo so tënë ti yanga ti ala ayeke nde na sarango ye ti ala so.

²Ye so kue angba na hondengo ni, fade nda ni ayeke sigigi; ye so kue angba na gbe mingo, fade azo ayeke hinga tënë ni.

³Ndani laa, tënë so kue ala tene na ya ti vukongo ndo, fade a yeke ma ni na kota lâ; tënë so ala tene na ya ti mê ti zo na ya ti kubu kâ, fade a yeke dekongo na ni na ndö ti da.”

⁴“A-ita, mbi tene na ala: azo so ayeke fâ tere ti zo si na pekoni, ala lingbi ti sara mbeni ye pepe so, ala sara mbeto ti ala pepe!

⁵Me mbi ye ti fa na ala lo so ala lingbi ti kpe mbeto ti lo. Ayeke nzoni ala kpe mbeto ti Nzapa so, tongana lo fâ zo awe, lo yeke na ngangu ti bi zo ni na ndo so wâ ayeke gbi daa lakue. Biani, mbi tene na ala: lo laa ala lingbi ti kpe mbeto ti lo.

⁶Azo ayeke ka akete ndeke oku ndali ti akete le ti nginza use pepe? Me Nzapa agirisa mbeni kete ndeke so oko pepe.

⁷Ataa kua ti li ti ala, azo ti mbi, Nzapa adiko ni kue awe. Ala sara mbeto ti zo oko pepe! Ala hon andeke so mingi!”

⁸“Mbi tene na ala: zo so kue atene na le ti azo atene, ni yeke zo ti mbi, fade *Molenge ti Zo nga ayeke tene na le ti *a-ange ti Nzapa atene, lo yeke zo ti ni.

⁹Me zo so abere tënë ti mbi na le ti azo, fade mbi nga, mbi yeke bere tënë ti lo na le ti a-ange ti Nzapa.

¹⁰Zo so kue atene sioni tënë na tere ti Molenge ti Zo, fade Nzapa ayeke zi tënë na li ti lo; me zo so azonga Yingo-Vuru, fade Nzapa ayeke zi tënë na li ti lo pepe.

¹¹Tongana a mu ala ti gue na ala na ngbanga na ya ti ada ti sambelango Nzapa, wala na gbe ti azo ti fango ngbanga, wala na gbe ti akota zo ti kodro, ala gi be ti ala pepe, atene: ‘Tënë ti nyen laa e yeke kiri ande na ni ti zi tënë na li ti e?’

¹²Biani, tongana ngbonga ni alingbi, fade Yingo-Vuru ayeke fa na ala tënë ti tenengo ni.”

¹³Mbeni zo na popo ti gba ti azo ni atene na Jésus: “Wafango-ye, mu yanga na ita ti mbi titene lo kangbi na popo ti e aye so angba na peko ti babâ ti e.”

¹⁴Jésus atene na lo: “Koli, zo wa laa amu mbi titene mbi fâ ngbanga na popo ti ala, ti kangbi ya ti aye ti ala?”

¹⁵Na pekoni, Jésus atene na ala: “Ala sara hange! Ala sara si kota nzara ti warango aye asara ala pepe, ngbanga ti so tongana zo ayeke na aye mingi, aye ti lo ni laa alingbi ti bata fini ti lo pepe.”

¹⁶Tongaso Jésus atene na ala mbeni toli, atene: “Ando, mbeni zo ti mosoro ayeke daa so akobe ti yaka ti lo ale mingi.

¹⁷Lo gbu li ti lo si lo tene na be ti lo, lo tene: ‘Fade mbi yeke sara tongana nyen? Ndo ti batango akobe ti yaka ti mbi ayeke daa pepe.’

¹⁸Na pekoni, lo kiri lo tene: ‘Ye so mbi yeke sara ande ayeke so: fade mbi yeke kungbi agogoro ti mbi si mbi yeke leke ambeni kota ni so ahon ti so. Na pekoni, mbi yeke bongbi akobe ti mbi na aye ti mbi kue na ya ni.

¹⁹Tongaso, fade mbi yeke tene na mbi wani, mbi tene: Baa, mo yeke na aye mingi so alingbi na mo ndali ti ngu mingi; mo wu tere ti mo, mo te, mo nyon, mo sara ngia!’

²⁰Me Nzapa atene na lo: ‘Mo buba zo! Gi na bi so mo yeke kui. Me aye so mo bongbi ni kue so, zo wa laa ayeke wara ni, zo wa?’ ”

²¹Jésus akiri atene: “Baa, ye so ayeke si ande na zo so ayeke bongbi amosoro gi ndali ti lo wani si lo bongbi aye ndali ti Nzapa pepe so laa!”

²²Na pekoni, Jésus atene na adisiple ti lo: “Ndani laa, mbi tene na ala: Ala gi be ti ala pepe ndali ti fini ti ala wala ndali ti tere ti ala, atene: ‘Fade e yeke te nyen? Fade e yeke wara bongo na ndo wa ti yu?’

²³Biani, fini ti zo ayeke kota ahon kobe si tere ti zo ayeke kota ahon bongo.

²⁴Ala baa *akpakpo: ala yeke lu kobe pepe, ala yeke ko nga ale ti kobe pepe, ala yeke na da ti batango ye daa wala gogoro pepe, me Nzapa ayeke mu kobe na ala! Ala azo, ala hon andeke so mingi!

²⁵Zo wa na popo ti ala si na lege ti gingo be ti lo, alingbi ti zia mbeni lango oko na ndö ti alango ti fini ti lo?

²⁶So akete kete ye ahon ndö ti ala so, ngbanga ti nyen si ala yeke gi be ti ala ndali ti tanga ti aye?

²⁷Ala baa akongo ti ngonda: akongo ni ayeke sara kua pepe, ala yeke fu nga bongo pepe. Me mbi tene na ala: ataa Salomon so ayeke ando na amosoro mingi, pendere ti abongo so lo yu alingbi na pendere ti akongo ni oko pepe.

²⁸Apere so ayeke na ngonda laso si kekereke azo ayeke tuku ni na le ti wâ, Nzapa ayeke leke ni pendere. Ala azo ti kete mabe, fade Nzapa ayeke sara na ala ahon ti so lo sara na apere so pepe?

²⁹Ala nga, ala gi be ti ala pepe ndali ti ye ti tengo ni wala ye ti nyongo ni, ala zia be ti ala na nduzu pepe.

³⁰Biani, azo ti dunia so ahinga Nzapa pepe laa ayeke gi aye so lakue. Me ti ala, Babâ ti ala ahinga atene, ayeke nzoni ala wara aye ni so ndali ti fini ti ala.

³¹Ala gi *Kodro-gbia ti Nzapa kozoni si fade a yeke mu na ala aye so kue na ndö ni.”

³²“Ala azo so ayeke tongana bongbi ti akete taba, ala sara mbeto pepe, ngbanga ti so a nzere na Babâ ti ala ti mu Kodro-gbia ni na ala!

³³Ala ka aye so ala yeke na ni, ala mu nginza ni na azo ti mawa. Ala gi ti wara abozo ti nginza so ayeke buba pepe; ala bata mosoro ti ala na yayu! Kâ, mosoro ni ayeke hunzi pepe: zo ti nzi alingbi ti si nduru na ni pepe, akangi alingbi nga ti te ni pepe.

³⁴Ndo so mosoro ti ala ayeke daa, be ti ala nga ayeke daa.”

³⁵“Ala bata abongo ti kua ti ala na tere ti ala! Ala bata alamba ti ala na zango ni!

³⁶Ala duti tongana azo so ayeke ku kiringo ti makonzi ti ala so ague na matanga ti mungo tere ti koli na wali. Tongana lo si si lo pika yanga ti da, ala zi ni na lo hio.

³⁷Ti ala nzoni, ala azo ti kua so makonzi ti ala ayeke kiri si lo yeke wara ala na lango pepe! Mbi tene na ala taa-tënë: fade makonzi ti ala ni ayeke yu bongo ti kua, lo yeke mu ndo na ala ti duti na tere ti meza si lo wani, lo yeke mu kobe na ala.

³⁸Ti ala nzoni, tongana lo ga na be ti bi, wala na peko ti be ti bi si lo wara ala so ala yeke ku ti yamba lo!

³⁹“Ala hinga so, tongana wa ti da ahinga ngbonga so zo ti nzi ayeke ga na ni, ka lo zia zo ti nzi ni ti kungbi yanga ti da ti lo ti li na ya ni pepe.

⁴⁰Ala nga, ala leke tere ti ala ti ku, ngbanga ti so *Molenge ti Zo ayeke ga ande na ngbonga so ala yeke ku lo na ni pepe.”

⁴¹Pierre ahunda lo, atene: “*Kota Gbia, toli so mo tene so ayeke gi ndali ti e wala ndali ti azo kue?”

⁴²Kota Gbia atene na lo: “Ndombe so ayeke sara ye na legeni si lo yeke nga zo ti hingango ndo ayeke zo wa? Lo yeke zo so makonzi ti lo azia lo na ndö ti azo ti kua ti lo titene lo mu na ala kobe tongana ngbonga ni alingbi.

⁴³Ti zo ti kua ni so nzoni, tongana makonzi ti lo akiri si awara lo na yanga ti kua ni!

⁴⁴Mbi tene na ala taa-tënë: fade makonzi ti lo ayeke zia lo ti baa ndo na ndö ti aye ti lo kue.

⁴⁵Me tongana zo ti kua ni atene na be ti lo, atene: ‘Makonzi ti mbi ayeke ga ande hio pepe’ si lo to nda ti pika akoli na awali so ayeke sara kua kâ, lo yeke te, lo yeke nyon si lo ga ngbaa ti samba,

⁴⁶fade makonzi ti zo ti kua so ayeke si na lango so zo ti kua ni ayeke ku lo pepe nga na ngbonga so lo hinga pepe. Fade makonzi ni ayeke tumba lo na kua si ayeke sara na lo ye so a yeke sara na azo so ake ti ma yanga ti Nzapa.

⁴⁷Zo ti kua so ahinga ye so makonzi ti lo aye, me lo leke ye oko pepe, wala lo sara ye alingbi na yanga ti makonzi ti lo ni pepe, fade a yeke pika lo mingi.

⁴⁸Me zo ti kua so ahinga pepe ye so makonzi ti lo aye si lo sara ye so alingbi na pika, fade a yeke pika lo gi kete. Zo so a mu na lo ye mingi, fade a yeke kiri ti hunda ye na lo mingi; zo so a mu na lo ye mingi ti bata, fade a yeke hunda na lo ye mingi.”

⁴⁹“Mbi ga ti bi wâ na ndö ti sese; ye so mbi ye ayeke titene wâ ni aza fadeso!

⁵⁰Mbi yeke ku ti wara mbeni bateme; be ti mbi ayeke ngba na nduzu ngbii asi na ngoi so mbi yeke wara ni!

⁵¹Ala baa ti ala atene, mbi ga ti zia siriri na ndö ti sese so? Oko pepe! Mbi tene na ala so, mbi ga ti kangbi popo ti azo.

⁵²Ti fadeso, azo oku so ayeke na ya ti da, fade popo ti ala ayeke kangbi; azo ota ayeke ke azo use si azo use ayeke ke azo ota.

⁵³Fade babâ ayeke ke molenge ti lo ti koli si molenge-koli ayeke ke babâ ti lo; mama ayeke ke molenge ti lo ti wali si molenge-wali ayeke ke mama ti lo; mama ti koli ayeke ke wali ti molenge ti lo si wali ayeke ke mama ti koli ti lo.”

⁵⁴Jésus akiri atene na gba ti azo so, atene: “Tongana ala baa mbinda alondo na mbage ti Do ti ga, ala tene: ‘Fade ngu ayeke pika’ si biani ngu ni ayeke pika.

⁵⁵Tongana ala baa pupu alondo na mbage ti Mbongo si ayeke ya, ala tene: ‘Ndo-wâ ayeke ga’ si biani ndo-wâ ni ayeke ga.

⁵⁶Ala so tënë ti yanga ti ala ayeke nde na sarango ye ti ala so, tongana ala baa sese na le ti nduzu, ala hinga atene ngu ayeke pika wala lâ ayeke su nzoni. Me tongana nyen laa ala hinga nda ti ngoi so e yeke daa fadeso pepe?”

⁵⁷“Ye so ayeke mbirimbiri ti sarango ni, ngbanga ti nyen laa ala wani aleke tënë ni na be ti ala pepe?

⁵⁸Tongana mo na wato ti mo ayeke gue na gbe ti ngbanga, mo sara kue ti leke tënë na lo na lege. Tongaso pepe, lo yeke gboto mo ti gue na mo na gbe ti wafango-ngbanga, wafango-ngbanga ni ayeke zia mo na maboko ti aturugu si aturugu ni ayeke bi mo na da ti kanga.

⁵⁹Mbi tene na mo: tongana a diko nginza na li ti mo si mo futa ni kue pepe, fade mo yeke sigigi na da ti kanga ni pepe.”