Read sango Luc 13 Bible Online

Luc 13 - sango bible

Luc 13

¹Gi na ndembe ni so, ambeni zo aga atene na Jésus tënë ti azo ti Galile so Pilate afâ ala na ndembe so ala yeke mu *sandaga ti anyama na Nzapa.

²Jésus akiri tënë na ala, atene: “Ala baa ti ala atene, azo ti Galile so ayeke azo ti siokpari ahon tanga ti azo ti Galile si Pilate afâ ala so?

³Oko pepe! Mbi tene na ala: tongana ala zia ngbene lege ti sarango ye ti ala pepe, fade ala kue ayeke kui gi tongaso.

⁴Ka azo baleoko na miombe so da ti Siloe so ayo na nduzu ati na ndö ti ala si afâ ala kue so, ala baa ti ala atene, azo ni asara sioni ahon azo ti Jérusalem kue?

⁵Oko pepe! Mbi tene na ala: tongana ala zia ngbene lege ti sarango ye ti ala pepe, fade ala kue ayeke kui gi tongaso.”

⁶Na pekoni, Jésus atene mbeni toli, lo tene: “Mbeni zo alu ando keke ti fige na yaka ti lo. Mbeni lâ, lo ga ti gi ale ni, me lo wara ni pepe.

⁷Lo tene na zo ti kua ti yaka ni, lo tene: ‘Asara fadeso ngu ota so mbi yeke ga ti gi ale ti keke so, me mbi wara ye oko daa pepe. Mo de ni! Ndani nyen laa keke ni angba ti buba sese senge senge so?’

⁸Me zo ti kua ni akiri tënë na lo, atene: ‘Kota zo, zia angba, e baa na ya ti ngu so si. Fade mbi yeke zi du na tere ni kue, mbi yeke zia puru ti nyama na tere ni.

⁹Gbaa na ngu ti peko, fade keke ni ayeke le; tongana ale pepe, mo de ni senge.’ ”

¹⁰Na mbeni *lango ti wungo tere, Jésus ayeke fa ye na ya ti mbeni da ti sambelango Nzapa.

¹¹Mbeni wali ayeke kâ; sioni yingo ayeke na ya ti lo asara ngu baleoko na miombe awe. Sioni yingo ni asara si peko ti lo aba bango, lege ti lo ti luti mbirimbiri ayeke daa pepe.

¹²So Jésus abaa wali ni, lo iri lo si lo tene na lo: “Wali, tere ti mo aga nzoni awe!”

¹³Lo zia maboko ti lo na li ti lo. Gi hio tongaso, wali ni aluti mbirimbiri si lo yeke gonda Nzapa.

¹⁴Makonzi ti da ti sambelango Nzapa ni asara ngonzo, ngbanga ti so Jésus akai kobela na lango ti wungo tere. Tongaso lo tene na gba ti azo so, lo tene: “Alango ti sarango na kua ayeke omene. Tongaso ala ga na ya ti alango ni so si a kai akobela ti ala, me na lango ti wungo tere pepe!”

¹⁵*Kota Gbia akiri tënë na lo, atene: “Ala so tënë ti yanga ti ala ayeke nde na sarango ye ti ala so! Na lango ti wungo tere, ala oko oko ayeke zi bagara ti ala wala lele ti ala na ndo so a kanga lo daa ti gue na lo titene lo nyon ngu pepe?

¹⁶Wali so ayeke *hale ti Abraham si Satan akanga lo asara ngu baleoko na miombe. Mbi lingbi ti zi lo na ya ti kamba so lo yeke daa so na lango ti wungo tere pepe?”

¹⁷So Jésus atene tongaso, kamene agbu le ti awato ti lo kue; me ngia asi be ti gba ti azo ni ngbanga ti akota ye so lo yeke sara so.

¹⁸Jésus atene: “*Kodro-gbia ti Nzapa ayeke tongana nyen? Nyen laa mbi lingbi ti haka na ni?

¹⁹Kodro ni ayeke tongana le ti keke ti mutarde so mbeni zo amu si alu na yaka ti lo. Le ti mutarde ni asigigi, akono si aga kota keke; andeke ti nduzu asara da ti ala na ya ti amaboko ni.”

²⁰Jésus akiri atene: “Nyen laa mbi yeke mu ti haka na *Kodro-gbia ti Nzapa?

²¹Kodro ni ayeke tongana mama ti mapa so mbeni wali amu, lo bongbi na gba ti farini, lo pika ya ni si mapa ni kue asuku nzoni.”

²²Jésus amu lege ti gue na Jérusalem, lo hon na ya ti agbata na akete kodro si lo yeke fa ye na azo.

²³Mbeni zo ahunda lo, atene: “*Kota Gbia, azo so ayeke soo kuâ, wungo ti ala ayeke duti ande gi kete?” Lo kiri tënë na ala:

²⁴“Ala sara ngangu ti li na kete yanga ti da ni! Biani, mbi tene na ala, fade azo mingi ayeke gi lege ti li daa, me ala yeke sara gbaa.

²⁵“Fade wa ti da ni ayeke londo si lo yeke kanga yanga ti da ni. Tongaso ala so ayeke ngba ande na gigi, ala yeke to nda ti pika yanga ti da ni si ala tene: ‘Kota Gbia, zi na e yanga ti da ni!’ Fade lo yeke tene na ala: ‘Mbi hinga ndo so ala londo daa pepe!’

²⁶Fade ala yeke tene na lo: ‘E na mo, e te, e nyon; lani mo fa ye na ya ti abalabala ti kodro ti e.’

²⁷Me fade lo yeke tene na ala: ‘Mbi hinga ndo so ala londo daa pepe. Ala hon yongoro na tere ti mbi, ala azo so kue ayeke sara sioni!’

²⁸Kâ, gi toto na tengo pembe: ala yeke baa Abraham, Isaac na Jacob, na awayanga-Nzapa kue so aduti na *Kodro-gbia ti Nzapa, me ti ala, a bi ala na gigi.

²⁹Fade azo ayeke londo na mbage ti To, Do, Banga na Mbongo ti ga na kota matanga so ayeke duti na ya ti Kodro-gbia ti Nzapa.

³⁰Fade azo ti ndani ayeke ga azo ti li ni si azo ti li ni ayeke ga azo ti ndani.”

³¹Na ndembe ni so, ambeni *farizien aga na tere ti Jésus si ala tene na lo: “Londo na ndo so, mo gue na mbeni ndo nde, ngbanga ti so Herode ayeke gi lege ti fâ mo.”

³²Lo kiri tënë na ala, lo tene: “Ala gue, atene na zo ti mayere, zo ti gbungo kondo so, atene: ‘Mbi yeke tumba asioni yingo, mbi yeke kai akobela ti azo laso na kekereke; na lango ota ni, fade mbi yeke hunzi kua ti mbi.’

³³Me laso, kekereke na mbeni kekereke, alingbi mbi ngba na tambula ti mbi, ngbanga ti so wayanga-Nzapa alingbi ti kui yongoro na Jérusalem pepe.

³⁴“Jérusalem! Jérusalem! Mo so mo yeke fâ awayanga-Nzapa si mo yeke bo na têne azo so Nzapa atokua ala na mo! Lege mingi, mbi ye fade ti bongbi azo ti mo na gbe ti mbi tongana ti so mama ti kondo ayeke bongbi amolenge ti lo na gbe ti maboko ti lo, me mo yeda pepe!

³⁵Fade ya ti da ti ala ayeke ngba senge senge! Mbi tene na ala so, fade ala yeke kiri ti baa mbi pepe ngbii asi na ngoi so ala yeke tene ande, atene: ‘Ayeke nzoni Nzapa asara tufa na ndö ti lo so aga na iri ti *Kota Gbia!’ ”