Read sango Luc 14 Bible Online

Luc 14 - sango bible

Luc 14

¹Na mbeni *lango ti wungo tere, Jésus ali na ya ti da ti mbeni makonzi ti *afarizien ti te kobe. Le ti azo kue ayeke baa gi lo.

²Mbeni zo so kobela ti sukungo tere ayeke sara lo ayeke na dawa ti Jésus.

³Jésus ahunda awafango-ndia na afarizien, atene: “*Ndia amu lege na zo titene lo kai kobela na tere ti zo na lango ti wungo tere, wala lo lingbi ti sara ni pepe?”

⁴Me azo ni azi yanga oko pepe. Tongaso Jésus amu zo ti kobela ni, lo kai kobela ti lo si lo tene na lo, lo gue.

⁵Na pekoni, lo tene na ala: “Na popo ti ala, zo wa laa, tongana molenge ti lo wala bagara ti lo ati na ya ti du ti ngu na lango ti wungo tere, lo yeke gue ti gboto lo daa hio pepe, zo wa?”

⁶Me azo ni alingbi ti kiri tënë na lo pepe.

⁷Jésus atene mbeni toli na azo so a tisa ala ti te kobe. Lo tene toli ni, ngbanga ti so lo baa ala yeke gi akozo ngende ti duti daa; lo tene na ala:

⁸“Tongana mbeni zo atisa mo na matanga ti mungo tere ti koli na wali, ayeke nzoni mo gue, mo duti na ndö ti kozo ngende pepe. Mo hinga pepe, zo so atisa mo so, lo tisa nga mbeni zo so ayeke kota ahon mo

⁹si zo so atisa ala use kue so aga atene na mo: ‘Zia ngende ti mo na lo.’ Fade mo yeke gue na kamene na le ti mo ti duti na ndö ti ngende ti ndani.

¹⁰Me tongana mbeni zo atisa mo ti te kobe, ayeke nzoni mo gue, mo duti na ndö ti ngende ti ndani si zo so atisa mo so aga atene na mo: ‘Ita, gue, mo duti kâ na li ni.’ Tongaso, fade mo ne na le ti azo so kue mo na ala ayeke te kobe so.

¹¹Biani, zo so kue asara tere ti lo tongana kota zo, fade a sara si lo ga kete zo; zo so asara tere ti lo tongana kete zo, fade a sara si lo ga kota zo.”

¹²Na pekoni, Jésus atene na zo so atisa lo so, atene: “Tongana mo leke kobe ti kota lâ, wala ti lakui, mo tisa pepe azo so mo na ala aye tere, wala a-ita ti mo, wala asongo ti mo, wala azo ti mosoro so mo na ala aduti ndo oko. Tongana mo tisa ala, fade ala nga ayeke tisa mo si mo yeke wara ye ti pekoni.

¹³Me tongana mo sara matanga, ayeke nzoni mo tisa azo ti mawa, na ala so mbage ti tere ti ala abuba, na ala so gere ti ala aba bango na awaziba.

¹⁴Fade mo yeke duti na ngia, ngbanga ti so ala yeke na ye ti kiri na ni na mo pepe. Me Nzapa ayeke kiri ni ande na mo na ngoi so azo ti mbirimbiri ayeke zingo na kuâ.”

¹⁵Na mango tënë so, mbeni zo so aga na matanga ni atene na Jésus: “Ti lo nzoni, zo so ayeke te ande kobe na *Kodro-gbia ti Nzapa!”

¹⁶Jésus akiri tënë na lo: “Mbeni zo asara mbeni kota matanga si lo tisa azo mingi mingi.

¹⁷So ngbonga ti tengo kobe ni alingbi awe, lo tokua zo ti kua ti lo ti tene na azo so lo tisa ala so, atene: ‘Ala ga fadeso! A leke ye ni kue awe!’

¹⁸Me ala oko oko kue ato nda ti gbu gere ti lo atene, lege titene ala gue ayeke daa pepe. Kozo zo ni atene: ‘Mbi vo mbeni yaka, mbi yeke gue ti baa ni. Mbi gbu gere ti mo, lege ti mbi ti gue na matanga ni ayeke daa pepe.’

¹⁹Mbeni atene ti lo: ‘Mbi vo abagara baleoko, mbi yeke gue ti tara ala. Mbi gbu gere ti mo, lege ti mbi ti gue na matanga ni ayeke daa pepe.’

²⁰Mbeni atene ti lo: ‘Mbi mu wali gi fafadeso, mbi lingbi ti gue pepe.’

²¹Zo ti kua ni akiri si lo fa peko ti tënë ni na makonzi ti lo. Tongaso, ngonzo agbu makonzi ti da ni si lo tene na zo ti kua ti lo ni, lo tene: ‘Gue fafadeso na ndo so azo abongbi daa, na ndö ti abalabala ti gbata ni, mo iri azo ti mawa, azo so mbage ti tere ti ala abuba, awaziba na ala so gere ti ala aba bango, mo ga na ala na ndo so.’

²²Na pekoni, zo ti kua ni akiri aga si lo tene na lo: ‘Kota zo, ye so mo mu yanga daa na e ti sarango ni so, e sara ni awe, me ambeni ndo angba senge.’

²³Tongaso makonzi ni atene na zo ti kua ni: ‘Gue na ndö ti alege nga na tere ti agbagba, mo mu azo na ngangu mo ga na ala, tongaso si ya ti da ti mbi asi singo.’

²⁴Mbi tene na ala, azo so mbi tisa ala kozoni so, fade mbeni oko ayeke te kobe ti mbi pepe.”

²⁵Jésus na gba ti azo ayeke tambula oko na lege ti gue. Lo baa ndo na peko si lo tene na ala:

²⁶“Tongana zo aga na mbi, alingbi lo ye mbi ahon babâ ti lo, mama ti lo, wali ti lo, amolenge ti lo, a-ita ti lo ti koli na ti wali nga na tere ti lo wani si lo duti disiple ti mbi.

²⁷Zo so ayo keke ti kroa ti lo pepe si lo mu peko ti mbi pepe, lo lingbi ti duti disiple ti mbi pepe.

²⁸Na popo ti ala, tongana mbeni zo aye ti sara mbeni kota da so ayo na nduzu, lo yeke duti kozoni ti gbu li ti lo ti baa wala lo yeke na nginza so alingbi ti hunzi na da ni.

²⁹Me tongana lo leke gi gere ti da ni si na pekoni, lo hunzi ni pepe, fade azo so kue ayeke baa lo, ayeke he lo,

³⁰atene: ‘Koli so ato nda ti sarango da, me hunzingo ni akara lo!’

³¹Wala tongana mbeni gbia aye ti gue ti tiri bira na mbeni gbia, lo yeke duti kozoni ti gbu li ti lo ti baa wala lo na aturugu saki baleoko, lo lingbi ti hon ndö ti gbia so ayeke ga na aturugu saki baleuse ti tiri na lo.

³²Tongana lo baa lo lingbi pepe, so mbeni gbia ni angba yongoro, lo yeke tokua ambeni zo ti lo ti hunda titene ala leke songo na popo ti ala.

³³Legeoko tongaso, na popo ti ala, zo so azia aye ti lo kue pepe, lo lingbi ti duti disiple ti mbi pepe.”

³⁴“Ingo ayeke nzoni ye; me tongana nzerengo ti ingo ahon awe, fade zo ayeke sara tongana nyen ti kiri na ni daa?

³⁵Alingbi ti sara nzoni na sese, wala na yaka pepe; a yeke tuku ni na gigi. Zo so ayeke na mê ti mango ndo, ayeke nzoni lo ma tënë so!”