Read sango Luc 21 Bible Online

Luc 21 - sango bible

Luc 21

¹Na ya ti kota da ti Nzapa, Jésus abaa ndo na tere ti lo si lo baa ambeni zo ti mosoro so ayeke bi nginza na ya ti sanduku ti nginza.

²Lo baa nga mbeni wali-mua so ayeke wayere mingi, lo bi akete kete le ti nginza use na ya ni.

³Tongaso Jésus atene: “Mbi tene na ala taa-tënë: wali-mua so ayeke wayere so abi ti lo nginza ni ahon tanga ti azo kue.

⁴Biani, tanga ti azo ni abi ti ala nginza so ala yeke na ye ti sarango na ni pepe; me ti lo, na ya ti yere ti lo, lo bi nginza so kue angba na lo ti te na kobe.”

⁵Ambeni zo ayeke tene tënë ti kota da ti Nzapa si ala yeke gonda pendere ti atêne na anzoni ye so azo amu na Nzapa si a leke na da ni.

⁶Jésus atene: “Ye so ala yeke baa so, ambeni lango ayeke ga so fade têne oko ayeke ngba na ndö ti mba ti lo pepe; ye so kue ayeke tuku na sese.”

⁷Ala hunda lo, atene: “Wafango-ye, ye ni ayeke si ande lawa? Nyen laa ayeke fa lango so aye so ayeke si na ni?”

⁸Jésus akiri tënë, atene: “Ala sara hange si mbeni zo ahanda ala pepe! Biani, fade azo mingi ayeke ga na iri ti mbi si zo oko oko ayeke tene: ‘Mbi laa mbi yeke *Mesii!’ Azo ni ayeke tene nga, atene: ‘Ngoi ni alingbi awe!’ Ala azo ti mbi, ala mu peko ti azo ni so pepe!

⁹Tongana ala ma tënë ti bira na tënë ti wusuwusu, ala sara mbeto pepe! Biani, alingbi aye so asi, me so laa ayeke hunzingo ti aye kue pepe.”

¹⁰Na pekoni, Jésus atene na ala: “Fade mbeni mara ayeke londo ti tiri na mbeni mara, mbeni kodro-gbia ayeke londo ti tiri na mbeni kodro-gbia;

¹¹sese ayeke yingi ngangu si kobela ti bubango kodro nga na kota nzara ayeke sara azo na ando nde nde; ambeni ye ti ziango mbeto na be ti zo na aye ti kpene ayeke sigigi na le ti nduzu.

¹²Me kozoni si aye so kue asi, fade azo ayeke gbu ala ti sara ngangu na ala, azo ayeke gue na ala na ya ti ada ti sambelango Nzapa, azo ayeke bi ala na da ti kanga; azo ayeke gue na ala na gbe ti agbia nga na gbe ti agovoronere ndali ti iri ti mbi.

¹³Tongaso si fade ala yeke wara lege ti tene tënë ti mbi na le ti azo kue.

¹⁴Ala leke na be ti ala biani ti gi be ti ala kozoni pepe ndali ti tënë so ala yeke tene ti gbu koko ti ala.

¹⁵Biani, fade mbi wani, mbi yeke mu na ala tënë ti tenengo ni na ndara so awato ti ala alingbi pepe ti dekite na ni wala ti ke ni.

¹⁶Ababâ ti ala, amama ti ala, a-ita ti ala, asongo ti ala na amba ti ala so ala na ala aye tere ayeke ka ala; a yeke fâ ambeni zo mingi na popo ti ala.

¹⁷Azo kue ayeke ke ala ndali ti iri ti mbi.

¹⁸Me fade mbeni kua ti li ti ala oko ayeke girisa pepe.

¹⁹Ala gbu ngangu si fade ala soo kuâ!”

²⁰“Tongana ala baa ande aturugu angoro Jérusalem kue, ayeke nzoni ala hinga atene, a ga nduru ti buba gbata ni awe.

²¹Tongaso, azo so ayeke na sese ti Judée, alingbi ala kpe ague na li ti ahoto; azo so ayeke na Jérusalem, alingbi ala sigigi na ya ni; azo so ayeke na yaka, alingbi ala kiri na ya ti gbata ni pepe.

²²Biani, alango ni so ayeke duti alango so Nzapa ayeke kiri na azo peko ti aye ti sioni so kue ala sara si ye so kue Mbeti ti Nzapa atene tënë ni ayeke si alingbi na ni!

²³Ye ni ayeke duti ande ye ti mawa na awali so ayeke na ngo na ala so angba ti mu me na amolenge na ya ti alango ni so! Biani, fade azo ti sese ayeke baa pasi ahon ndoni si ngonzo ti Nzapa ayeke londo na tere ti ala!

²⁴Fade a yeke fâ azo ni na yongoro zeme, a yeke gbu ala ti gue na ala na ya ti akodro kue. Amara kue ayeke buba gbata ti Jérusalem kue ngbii ngoi ti ala ahunzi si.”

²⁵“Fade ambeni ye ti kpene ayeke sigigi na le ti lâ, na le ti nze, na le ti atongoro. Na ndö ti sese, fade be ti azo kue ayeke gi na nduzu, ala yeke duti gi na mbeto ndali ti toto ti kota ngu-ingo na *amapo ni.

²⁶Na mbage, fade azo ayeke kui na mbeto ndali ti aye ti pasi so ayeke si na ndö ti dunia so, ngbanga ti so fade angangu so ayeke le ti nduzu ayeke yingi.

²⁷Tongaso azo ayeke baa *Molenge ti Zo so ayeke ga na ya ti mbinda na ngangu ti lo kue, na gonda ti lo kue.

²⁸Tongana aye ni so ato nda ti singo ni, ala gbu ngangu, ala mu li ti ala na nduzu, ngbanga ti so Nzapa aga nduru ti zi ala na ya ti pasi awe!”

²⁹Na pekoni, Jésus atene na ala mbeni toli, lo tene: “Ala baa keke ti fige na ambeni keke kue!

³⁰Gi so afini kugbe ayeke sigigi daa, ala hinga atene, ngoi ti lungo ale ti kobe aga nduru awe.

³¹Legeoko nga, tongana ala baa aye so asi, ayeke nzoni ala hinga atene, kodro-gbia ti Nzapa aga nduru awe.

³²Mbi tene na ala taa-tënë: fade azo ti fadeso ayeke kui kue pepe kozoni si aye so kue asi.

³³Fade yayu na sese ayeke hon, me atënë ti mbi ayeke hon oko pepe.”

³⁴“Ala sara hange! Ala zia be ti ala kue na nyongo samba ahon ndoni na tengo kobe ahon ndoni pepe, ala gi be ti ala na ndö ti gigi ti ala pepe. Tongana ala sara hange pepe, lango ni so ayeke wara ala

³⁵tongana ti so gbanda ayeke gbu nyama. Biani, lango ni so ayeke si ti wara azo ti sese kue tongana ti so gbanda ayeke gbu nyama.

³⁶Tongaso ala lango pepe! Ala ngba ti sambela lakue si ala wara ngangu ti sigigi na ya ti aye so ayeke si ande so si ala wara lege ti luti na nduzu na dawa ti *Molenge ti Zo.”

³⁷Na kota lâ, Jésus ayeke fa ye na azo na ya ti kota da ti Nzapa; me na lakui, lo yeke gue ti lango na ndö ti hoto so a iri ni hoto ti a-olive.

³⁸Na kota ndaperere, azo ti gbata ni kue ayeke ga na tere ti lo na ya ti kota da ti Nzapa ti ma lo.