Read sango Luc 23 Bible Online

Luc 23 - sango bible

Luc 23

¹Azo ni kue alondo si ala gue na Jésus na gbe ti Pilate.

²Ala to nda ti bi tënë na li ti lo, atene: “E wara koli so, lo yeke pusu azo ti mara ti e ti sara wusuwusu, lo yeke kanga lege na ala titene ala futa lapo na kota gbia ti Rome; lo tene nga, ni wani, ni yeke *Mesii, ni yeke gbia.”

³Pilate ahunda lo, atene: “Mo yeke gbia ti azuife?” Jésus akiri tënë na lo, atene: “Gi tënë ni laa mo tene awe so.”

⁴Pilate atene na akota wayango-sandaga na gba ti azo ni, atene: “Mbi wara ti mbi mbeni tënë oko pepe ti fâ ngbanga na li ti koli so ndali ni.”

⁵Me ala luti na ndö ti tënë ti ala, atene: “Lo yeke pusu azo ti kodro ti sara wusuwusu na lege ti fango ye ti lo so lo yeke fa na azo ti sese ti Judée kue. Lo londo na Galile si lo yeke fa ye na azo ngbii asi na ndo so.”

⁶So Pilate ama tënë so, lo hunda ndo, lo tene: “Koli so ayeke zo ti Galile?”

⁷So lo ma a tene, lo yeke zo ti sese so Herode ayeke sara komandema na ndö ni, lo tokua lo na Herode so ayeke nga na ndembe ni so na Jérusalem.

⁸So Herode abaa Jésus, be ti lo anzere mingi, ngbanga ti so lango mingi, lo yeke na nzara ti baa lo. Lo ye ti baa Jésus ngbanga ti atënë so azo ayeke tene na ndö ti lo; lo yeke ku fade ti baa Jésus na sarango mbeni ye ti kpene.

⁹Lo hunda Jésus na atënë mingi mingi, me Jésus akiri tënë oko pepe.

¹⁰Akota wayango-sandaga na awafango-ndia ayeke daa, ala yeke tene tënë na ngangu ti bi atënë na li ti lo.

¹¹Herode na aturugu ti lo ahe Jésus na ngia si ala sara lo tongana buba zo. Ala yu na lo mbeni bongo so aza zango si ala kiri atokua lo na Pilate.

¹²Na lango ni so, songo aga na popo ti Herode na Pilate; kozoni ala ye tere pepe.

¹³Pilate airi akota wayango-sandaga, amakonzi na azo ti kodro

¹⁴si lo tene na ala: “Ala ga na mbi koli so, ngbanga ti so ala tene, lo yeke pusu azo ti kodro ti sara wusuwusu. Ala baa, mbi hunda lo na le ti ala kue na ndö ti asioni tënë so ala bi na li ti lo, me mbi baa ti mbi sioni ye oko so alingbi ti fâ ngbanga na li ti lo ndali ni pepe.

¹⁵Herode nga awara tënë na li ti lo pepe, ndani laa lo kiri lo tokua lo na e so. Tongaso, koli so asara mbeni ye so alingbi ti fâ lo ndali ni pepe.

¹⁶Fade mbi yeke mu yanga titene a pika gi lo pikango si mbi zi lo.” [

¹⁷Lakue na *matanga ti Pake, Pilate ayeke zi mbeni zo ti kanga oko na azo ti kodro ni.]

¹⁸Me azo ni kue adekongo, atene: “Fâ koli so! Mo zi na e Barabas!”

¹⁹— A kanga Barabas ndali ti mbeni wusuwusu so alondo na ya ti gbata ni nga ndali ti fango zo. —

²⁰Pilate akiri ahunda azo ni, ngbanga ti so lo ye ti zi Jésus.

²¹Me azo ni adekongo, atene: “Fâ lo na ndö ti keke ti kroa! Fâ lo na ndö ti keke ti kroa!”

²²Ti fani ota ni, lo hunda ala, lo tene: “Me sioni ye ti nyen laa koli so asara? Mbi wara mbeni tënë na li ti lo so alingbi ti fâ lo ndali ni pepe. Fade mbi yeke mu yanga titene a pika gi lo pikango si mbi zi lo.”

²³Me ala ngba gi na ndö ti tënë ni si ala yeke dekongo titene lo fâ gi Jésus fango na ndö ti keke ti kroa; dekongo ti ala ni ahon ndö ti lo.

²⁴Nilaa Pilate amu yanga titene a sara ye so ala hunda.

²⁵Lo zi koli so ayeke na da ti kanga ndali ti wusuwusu na fango zo, lo so azo ni ahunda titene a zi lo so. Ti Jésus, Pilate amu lo na ala titene ala sara ye ti be ti ala na lo.

²⁶So ala mu Jésus si ala yeke gue na lo, ala tengbi na mbeni koli so azo ahinga lo na iri ti Simon, zo ti kodro ti Sirene; lo londo na yaka si lo yeke kiri na kodro. Ala gbu lo si ala zia keke ti kroa ni na ndö ti go ti lo titene lo yo ni, lo gue na ni na peko ti Jésus.

²⁷Azo gbani gbani ayeke mu peko ti Jésus; ambeni wali nga ayeke na popo ti azo ni. Ala zia maboko na ndö ti go ti ala si ala yeke toto ndali ti lo.

²⁸Jésus abaa ndo na mbage ti ala si lo tene na ala: “Awali ti Jérusalem, ala toto ndali ti mbi pepe! Me ala toto ndali ti ala wani na amolenge ti ala,

²⁹ngbanga ti so alango ayeke si ande so fade azo ayeke tene: ‘Ti ala nzoni, ala awali so ayeke awali ti dungo ni pepe, na ala so adu ya ti ala pepe, na ala so molenge anyon me ti ala laoko pepe!’

³⁰Tongaso na ya ti alango ni so, fade azo ayeke tene na akota hoto: ‘Ala ti na ndö ti e!’ Ala yeke tene nga na akete hoto: ‘Ala honde e!’

³¹Tongana azo asara tongaso na fini keke, fade ti holengo keke ayeke duti tongana nyen?”

³²Azo amu nga ambeni koli use so ayeke asioni zo, ague na ala ti fâ ala legeoko na Jésus.

³³So ala si na ndo so a iri ni “Ndo-ti-abio-ti-li”, ala kanga Jésus na ndö ti mbeni keke ti kroa si ala kanga nga asioni zo use so na ndö ti ambeni keke ti kroa, mbeni na mbage ti maboko ti lo ti koli, mbeni na mbage ti maboko ti lo ti wali.

³⁴Jésus atene: “Babâ, zi tënë na li ti ala, ngbanga ti so ala hinga ye so ala yeke sara pepe.” Ala bi *dee titene ala kangbi ya ti bongo ti lo na popo ti ala.

³⁵Azo ni aluti kâ si ala yeke baa ndo. Amakonzi ti azuife ayeke he lo, atene: “Lo soo ambeni zo na kuâ. Tongana lo yeke *Mesii so Nzapa asoro lo biani, ayeke nzoni lo soo tere ti lo wani na kuâ fadeso!”

³⁶Aturugu nga ayeke he lo; ala ga nduru, ala mu na lo kpingo vin si ala tene:

³⁷“Tongana mo yeke gbia ti azuife, soo tere ti mo wani na kuâ e baa!”

³⁸Na li ti keke ti kroa ni ala su mbeni mbeti atene: “So gbia ti azuife laa!”

³⁹Mbeni oko ti asioni zo so a kanga ala na ndö ti keke ti kroa azonga Jésus, atene: “Mo yeke Mesii pepe? Mo soo tere ti mo wani na kuâ si mo soo nga e ma!”

⁴⁰Me mba ti lo ni asuku na lo, atene: “Mo kpe mbeto ti Nzapa pepe? Mo nga, mo yeke baa gi mara ti pasi so lo yeke baa so!

⁴¹Ti e, ye ni ayeke na legeni, ngbanga ti so e yeke wara gi aye ti peko ti ye so e sara; me ti lo, lo sara mbeni ye ti sioni oko pepe.”

⁴²Na pekoni, lo tene: “Jésus, tongana mo kiri ande ti le-gbia, dabe ti mo na mbi!”

⁴³Jésus atene na lo: “Mbi tene na mo taa-tënë: gi laso, laso, mo yeke duti legeoko na mbi na *paradi.”

⁴⁴So bekombite aga nduru awe, ndo avuko na ya ti kodro ni kue, ngbii asi na ngbonga ota.

⁴⁵Le ti lâ avuko vukongo; ridoo so a kanga na ya ti kota da ti Nzapa, ya ni asuru use, taa na be ni.

⁴⁶Jésus adekongo ngangu, atene: “Babâ, mbi zia yingo ti mbi na maboko ti mo.” Na peko ti tënë so, Jésus akui.

⁴⁷So kapita ti aturugu ti Rome abaa ye ni tongaso, lo gonda Nzapa si lo tene: “Taa-tënë, koli so ayeke zo ti mbirimbiri!”

⁴⁸Gba ti azo so aga fade ti baa ye so kue asi so, so ala baa ye ni awe, ala zia maboko ti ala na ndö ti go ti ala si ala yeke kiri na da.

⁴⁹Azo so kue aye Jésus, ala na awali so alondo na Galile si aga na peko ti lo, ala luti ti ala yongoro si ala yeke baa ye ni.

⁵⁰Mbeni koli ayeke daa so iri ti lo Joseph, lo yeke mbeni zo ti kota ndo ti fango ngbanga, lo yeke nzoni zo si lo yeke nga zo ti mbirimbiri.

⁵¹Ye so amba ti lo aleke na be ti ala ti sarango ni so, lo yeda na ni pepe; lo ke tënë ti ye so ala sara so. Lo yeke zo ti Arimate, mbeni gbata ti azuife si lo yeke ku ngoi so Nzapa ayeke ga ti le-gbia na ndö ti azo.

⁵²Lo gue, lo baa Pilate si lo hunda lo ti mu kuâ ti Jésus.

⁵³Lo zi kuâ ni na ndö ti keke ti kroa, lo kanga na vuru bongo si lo lu ni na ya ti mbeni du so a zi na ya ti têne so ade a lu zo daa pepe.

⁵⁴Lango ni so ayeke lango ti lekengo aye ndali ti lango ti matanga; *lango ti wungo tere aga nduru awe.

⁵⁵Awali so amu peko ti Jésus, ngbene ye na Galile so aga na peko ti Joseph; ala baa du ti kuâ ni si ala baa nga lege so azo azia kuâ ti Jésus na ya ni.

⁵⁶Na pekoni, ala kiri na ya ti gbata ni si ala leke ayombo na aye so azo ayeke zia na tere ti kuâ. Na lango ti wungo tere, ala duti ti wu tere ti ala tongana ti so atënë ti ndia afa.