Read sango Luc 24 Bible Online

Luc 24 - sango bible

Luc 24

¹Na kota ndaperere ti layenga, awali ni amu ayombo so ala leke ni ti zia na tere ti kuâ, ague na ni na du ti kuâ ti Jésus.

²Ala baa so, têne so a kanga na yanga ti du ni, a pusu ni si a zi ni awe.

³Ala li na ya ti du ni, me ala wara kuâ ti *Kota Gbia Jésus pepe.

⁴So ala ngba ti gi li ti ala na ndö ti ye so asi so, mo ye ti baa, akoli use asi, ala yu bongo so aza zango.

⁵Mbeto agbu awali ni, ala bi le ti ala na sese si akoli use so atene na ala: “Ngbanga ti nyen si ala yeke gi zo so ayeke na fini na popo ti akuâ?

⁶Lo yeke na ndo so pepe, lo zingo na kuâ awe. Ala dabe ti ala na tënë so lo tene lani na ala na ndembe so lo de na Galile,

⁷lo tene: ‘Alingbi a zia *Molenge ti Zo na maboko ti azo ti sioni, ala fâ lo na ndö ti keke ti kroa si na lango ota ni, lo yeke zingo na kuâ.’ ”

⁸Ala dabe ti ala na tënë so Jésus atene lani na ala so.

⁹Ala londo na yanga ti du ti kuâ ni si ala gue, atene tënë ti aye so kue na adisiple baleoko na oko nga na tanga ti azo ni kue.

¹⁰Awali ni ayeke Marie ti kodro ti Magdala, Jeanne na Marie mama ti Jacques. Ambeni wali so ague na ala atene nga gi tënë ni so na *awatokua.

¹¹Me awatokua ni abaa tënë ti awali ni tongana abuba tënë si ala yeda na ni pepe.

¹²Me Pierre akpe ague na yanga ti du ti kuâ ni; lo kuku, lo baa ya ni si lo baa gi akamba ti bongo ni. Na pekoni, lo kiri na ndo ti lo, li ti lo kue akpe ndali ti ye so asi so.

¹³Gi na lango ni so, adisiple use amu lege ti gue na mbeni kete kodro so iri ni Emaus. Ti londo na Jérusalem ti gue na Emaus, zo ayeke tambula na ya ti ngbonga use.

¹⁴Ala yeke tene tënë na ndö ti aye so kue asi so.

¹⁵So ala ngba ti tene tënë ni si zo oko oko ayeke fa tënë ti be ti lo na ndö ni, Jésus wani asi na popo ti ala si lo na ala ayeke tambula.

¹⁶Ala baa lo, me mbeni ye akanga lege na ala ti hinga lo.

¹⁷Jésus ahunda ala, atene: “Tënë ti nyen laa ala yeke tene si ala yeke tambula na ni so?” Tongaso ala luti, vundu agbu ala kue.

¹⁸Mbeni oko so iri ti lo ayeke Kleopas atene na lo: “Ye so asi na ya ti alango so, gi mo oko na popo ti azo ti Jérusalem laa mo ma tënë ni pepe?”

¹⁹Lo hunda ala, lo tene: “Ye ni ayeke nyen?” Ala kiri tënë na lo: “Ye so asi na Jésus, zo ti Nazaret so! Lo yeke mbeni ngangu wayanga-Nzapa na lege ti akota ye so lo sara na atënë so lo fa; lo fa ni na dawa ti Nzapa nga na dawa ti azo kue.

²⁰Akota wayango-sandaga na amakonzi ti e amu lo, aka lo titene a fâ ngbanga ti kuâ na li ti lo si a fâ lo na ndö ti keke ti kroa.

²¹Ti e, e zia be ti e ti ku e tene, lo laa lo yeke zi ande Israel na gbe ti ngbaa. Me na ndö ni kue, aye ni asi asara fadeso lango ota awe.

²²Ambeni wali so ayeke na popo ti e aga atene mbeni tënë so e hinga li ti e daa pepe. Na kota ndaperere, ala gue na yanga ti du ti kuâ ni,

²³me ala wara kuâ ni pepe. Ala kiri atene na e atene, *a-ange asi na ala si a-ange ni atene na ala atene, Jésus ayeke na fini!

²⁴Ambeni mba ti e ague na yanga ti du ti kuâ ni si ala baa so ye ni ayeke gi tongana ti so awali ni atene so; me ala baa Jésus pepe.”

²⁵Tongaso Jésus atene na ala: “Ala azo so li ti ala ayeke daa pepe so, tënë so kue awayanga-Nzapa atene ando so, ala ma na be na ni hio pepe!

²⁶Alingbi fade titene *Mesii abaa pasi kozoni si lo li na ya ti gonda ti lo pepe?”

²⁷Na pekoni, Jésus ato nda ti fa na ala nda ti tënë so ando awayanga-Nzapa kue atene na ndö ti lo na ya ti Mbeti ti Nzapa, ti londo na Moïse ngbii asi na awayanga-Nzapa kue.

²⁸So ala ga nduru na kete kodro so ala yeke gue daa, Jésus asara, mo baa mo tene, lo yeke hon ti gue.

²⁹Me ala gbanzi lo, atene: “Mo ngba na e ge, ngbanga ti so lâ aga nduru ti kui si ndo ato nda ti vuko.” Lo li na ya ti da si lo ngba na ala.

³⁰So lo na ala aduti ti te kobe, lo mu mapa, lo mu singila na Nzapa; na pekoni, lo fâ ya ni si lo mu na ala.

³¹Tongaso le ti ala azi si ala hinga lo. Na pekoni, lo girisa na le ti ala

³²si ala tene na popo ti ala: “So lo yeke tene tënë na e na lege si lo yeke fa nga na e nda ti tënë ti Mbeti ti Nzapa so, be ti e ayeke kporo fade na ya ni kâ pepe?”

³³Gi hio tongaso, ala londo si ala kiri na Jérusalem. Ala wara adisiple baleoko na oko na tanga ti azo ni so abongbi kâ.

³⁴Azo ni atene na ala: “Taa-tënë, *Kota Gbia azingo na kuâ awe! Lo si na Simon!”

³⁵Adisiple use so atene tënë ti ye so asi na ala na lege so. Ala fa nga lege so ala hinga Jésus na ni, na ndembe so lo fâ ya ti mapa si lo mu na ala.

³⁶So ala ngba ti tene tënë so, Jésus wani asi, lo luti na popo ti ala si lo tene na ala: “Siriri aduti na ala!”

³⁷Mbeto agbu ala si tere ti ala ayeke do; ala baa ti ala atene, mbeni toro laa ala baa lo so.

³⁸Jésus ahunda ala, atene: “Ala yeke gi be ti ala ngbanga ti nyen? Ala yeke dekite na be ti ala ngbanga ti nyen?

³⁹Ala baa maboko ti mbi na gere ti mbi: so taa mbi laa! Ala ndu tere ti mbi abaa! Toro ayeke na tere wala na bio pepe tongana ti so ala baa mbi yeke na ni so!” [

⁴⁰So lo yeke tene tënë ni, lo fa na ala maboko ti lo na gere ti lo.]

⁴¹Be ti ala asi na ngia, ye so asara si ala ngba ti dekite, li ti ala kue akpe. Tongaso Jésus ahunda ala, atene: “Ala yeke na mbeni ye ti tengo ni na ndo so?”

⁴²Ala ga na lo mbeni nduru zongo susu.

⁴³Lo mu ni si lo te ni na le ti ala.

⁴⁴Na pekoni, lo tene na ala: “Na ndembe so mbi de na popo ti ala, mbi tene na ala, mbi tene: ayeke nzoni atënë so kue a su na ndö ti mbi na ya ti mbeti ti *Ndia ti Moïse, ti awayanga-Nzapa na ti Abia, aye ni asi alingbi na ni.”

⁴⁵Tongaso lo sara si hingango ndo ti ala azi ti hinga nda ti Mbeti ti Nzapa.

⁴⁶Lo tene na ala: “A su na ya ti Mbeti ti Nzapa, atene: Fade *Mesii ayeke baa pasi si na lango ota ni, lo yeke zingo na kuâ.

⁴⁷Na iri ti lo, fade azo ayeke fa Nzoni Tënë na amara kue, ti to nda ni na Jérusalem. Ala yeke tene na azo titene ala zia ngbene lege ti sarango ye ti ala, ala kiri na Nzapa si fade Nzapa azi siokpari na li ti ala.

⁴⁸Ti ala, ala yeke azo so abaa aye ni na le ti ala awe.

⁴⁹Ti mbi, fade mbi yeke tokua na ndö ti ala ye so Babâ ti mbi amu zendo ni. Ti ala, ala ngba na ya ti gbata ni ngbii ala wara ngangu so alondo na nduzu.”

⁵⁰Na pekoni, Jésus amu ala, ague na ala nduru na Betanii, lo yo maboko ti lo na nduzu si lo sara tufa na ndö ti ala.

⁵¹So lo ngba ti sara tufa na ndö ti ala, lo londo na tere ti ala, lo hon si a mu lo, a gue na lo na yayu.

⁵²Ti adisiple, ala voro lo; na pekoni ala kiri na Jérusalem, be ti ala asi na kota ngia.

⁵³Lakue, ala yeke na ya ti kota da ti Nzapa si ala yeke sepela Nzapa.