Read sango Luc 3 Bible Online

Luc 3 - sango bible

Luc 3

¹Na ngu baleoko na oku so Tibere ayeke kota gbia ti Rome, Ponse Pilate ayeke govoronere na sese ti Judée, Herode, kota komanda na sese ti Galile, ita ti lo Philippe ayeke kota komanda na sese ti Iture na ti Trakonite si Lisanias ayeke kota komanda na sese ti Abilene;

²Hane na Kaife ayeke akota wayango-sandaga. Tënë ti Nzapa asi na Jean, molenge ti Zakarii na ndembe so Jean ayeke na benyama.

³Lo gue na sese so kue ayeke na yanga ti ngu ti Jourdain, lo to mbela na azo, lo tene: “Ala zia ngbene lege ti sarango ye ti ala, ala wara bateme si Nzapa azi siokpari na li ti ala.”

⁴Ye so asi alingbi na tënë so ando wayanga-Nzapa Ésaïe atene: “Mbeni zo ayeke dekongo na benyama kâ, atene: ‘Ala leke lege ti *Kota Gbia! Ala sara si lege ti lo aluti mbirimbiri!

⁵Akota du kue ti apopo-hoto, ala kanga ni, akota hoto na akete hoto, ala de ni na sese si ndo ni aga kpangbara; alege so aba bango, ala leke ni si aga mbirimbiri, alege so atêne ayeke daa, ala zi atêne ni si alege ni aga nzoni’,

⁶tongaso si fade azo kue abaa lege so Nzapa ayeke soo azo na kuâ!”

⁷Gba ti azo aga na Jean titene lo batize ala si lo tene na ala, lo tene: “Ala, asioni mara ti ngbo! Zo wa laa afa na ala lege ti kpe ngonzo ti Nzapa so ayeke ga so?

⁸Ala sara ye so afa atene, ala zia ngbene lege ti sarango ye ti ala awe! Ala tene na be ti ala pepe, atene: ‘Abraham ayeke kotara ti e!’ Biani, mbi tene na ala: Nzapa alingbi ti mu atêne so ti sara si aga amolenge ti Abraham!

⁹Fadeso, do ayeke na gunda ti akeke ti de ni: keke so kue ale nzoni lengo pepe, fade a yeke de ni ti bi na le ti wâ.”

¹⁰Gba ti azo ni ahunda Jean, atene: “Nyen laa e lingbi ti sara?”

¹¹Lo kiri tënë na ala, lo tene: “Zo so ayeke na bongo use, ayeke nzoni lo mu mbeni oko na zo so ayeke na ni pepe. Zo so ayeke na ye ti tengo ni, ayeke nzoni lo mu mbeni na zo so ayeke na ni pepe.”

¹²Azo ti rongo nginza ti lapo nga aga titene Jean abatize ala. Ala tene na lo: “Wafango-ye, nyen laa e lingbi ti sara?”

¹³Lo tene na ala: “Ye so a hunda na azo ti futa ni, ala hunda mbeni ye na ndö ni pepe.”

¹⁴Aturugu nga ahunda lo, atene: “Ti e, nyen laa e lingbi ti sara?” Lo tene na ala: “Ala sara ngangu na azo pepe ti mu nginza ti ala, ala tene nga tënë ti mvene na li ti azo pepe ti mu nginza ti ala, me ala zia be ti ala gi na ndö ti futa ti ala.”

¹⁵Azo ni ayeke ku gango ti *Mesii si ala kue ayeke hunda tere ti ala, atene: “Jean laa ayeke Mesii ni?”

¹⁶Jean akiri tënë na ala kue, atene: “Ti mbi, mbi yeke batize ala na ngu, me lo so lo yeke ga ande, ngangu ti lo ahon ti mbi: mbi kpa zo ti zi akamba ti poro ti gere ti lo pepe. Fade lo yeke batize ala na Yingo-Vuru nga na wâ.

¹⁷Lo gbu ye ti pengo na ale ti kobe na maboko ti lo, lo yeke leke ndo ti pikango ale ti kobe ti lo daa. Na pekoni, lo yeke zia ni na ya ti gogoro, me fade lo yeke bongbi aporo ni ti gbi ni na ya ti wâ so ayeke mingo laoko pepe.”

¹⁸Jean amu ambeni wango mingi na azo ni ti fa Nzoni Tënë na ala.

¹⁹Jean asuku na Herode so lo yeke kota komanda, ngbanga ti so lo mu Herodiade, wali ti ita ti lo si lo sara nga asioni ye mingi.

²⁰Tongaso Herode akiri asara mbeni ye ti sioni so ahon ndoni: lo mu yanga si a gbu Jean, a bi lo na da ti kanga.

²¹So azo kue awara bateme awe, Jésus nga aga si lo wara bateme. So lo yeke sambela, yanga ti yayu azi,

²²Yingo-Vuru azu na ndö ti lo tongana *mbipa. Mbeni go alondo na yayu, atene: “Mo yeke Molenge ti mbi so mbi ye mo mingi, be ti mbi anzere na mo mingi.”

²³So Jésus ato nda ti kua ti lo, andaa lo yeke nduru na ngu baleota. Azo abaa ti ala atene, lo yeke molenge ti Joseph, molenge ti Eli.

²⁴Eli ayeke molenge ti Matat; Matat ayeke molenge ti Lévi; Lévi ayeke molenge ti Melki; Melki ayeke molenge ti Yanai; Yanai ayeke molenge ti Joseph;

²⁵Joseph ayeke molenge ti Matatias; Matatias ayeke molenge ti Amos; Amos ayeke molenge ti Nahum; Nahum ayeke molenge ti Esli; Esli ayeke molenge ti Nagai;

²⁶Nagai ayeke molenge ti Maat; Maat ayeke molenge ti Matatias; Matatias ayeke molenge ti Semein; Semein ayeke molenge ti Yosek; Yosek ayeke molenge ti Yoda;

²⁷Yoda ayeke molenge ti Yohanan; Yohanan ayeke molenge ti Resa; Resa ayeke molenge ti Zorobabel; Zorobabel ayeke molenge ti Shealtiel; Shealtiel ayeke molenge ti Neri;

²⁸Neri ayeke molenge ti Melki; Melki ayeke molenge ti Adi; Adi ayeke molenge ti Kosam; Kosam ayeke molenge ti Elmadam; Elmadam ayeke molenge ti Er;

²⁹Er ayeke molenge ti Jésus; Jésus ayeke molenge ti Eliezer; Eliezer ayeke molenge ti Yorim; Yorim ayeke molenge ti Matat; Matat ayeke molenge ti Lévi;

³⁰Lévi ayeke molenge ti Siméon; Siméon ayeke molenge ti Juda; Juda ayeke molenge ti Joseph; Joseph ayeke molenge ti Yonam; Yonam ayeke molenge ti Eliakim;

³¹Eliakim ayeke molenge ti Melea; Melea ayeke molenge ti Mena; Mena ayeke molenge ti Matata; Matata ayeke molenge ti Natan; Natan ayeke molenge ti David;

³²David ayeke molenge ti Yese; Yese ayeke molenge ti Obed; Obed ayeke molenge ti Booz; Booz ayeke molenge ti Sala; Sala ayeke molenge ti Nashon;

³³Nashon ayeke molenge ti Aminadab; Aminadab ayeke molenge ti Admin; Admin ayeke molenge ti Arni; Arni ayeke molenge ti Hesron; Hesron ayeke molenge ti Peres; Peres ayeke molenge ti Juda;

³⁴Juda ayeke molenge ti Jacob; Jacob ayeke molenge ti Isaac; Isaac ayeke molenge ti Abraham; Abraham ayeke molenge ti Tera; Tera ayeke molenge ti Nahor;

³⁵Nahor ayeke molenge ti Serug; Serug ayeke molenge ti Reu; Reu ayeke molenge ti Peleg; Peleg ayeke molenge ti Eber; Eber ayeke molenge ti Shela;

³⁶Shela ayeke molenge ti Kenan; Kenan ayeke molenge ti Arpaksad; Arpaksad ayeke molenge ti Sem; Sem ayeke molenge ti Noe; Noe ayeke molenge ti Lemek;

³⁷Lemek ayeke molenge ti Matusalem; Matusalem ayeke molenge ti Henok; Henok ayeke molenge ti Yered; Yered ayeke molenge ti Malaleel; Malaleel ayeke molenge ti Kenan.

³⁸Kenan ayeke molenge ti Enos; Enos ayeke molenge ti Set; Set ayeke molenge ti Adam; Adam ayeke molenge ti Nzapa.