Read sango Luc 6 Bible Online

Luc 6 - sango bible

Luc 6

¹Na mbeni *lango ti wungo tere, Jésus ayeke hon na ya ti ayaka ti *ble; adisiple ti lo afâ ambeni li ti ble ni, ala foro ni na ya ti maboko ti ala si ala yeke te.

²Ambeni *farizien atene na ala: “Ngbanga ti nyen si ala yeke sara ye so *Ndia ake titene zo asara ni na lango ti wungo tere?”

³Jésus akiri tënë na ala: “Ye so David asara ando na ndembe so nzara agbu lo, lo na azo so amu peko ti lo, ala diko tënë ni pepe?

⁴Lo li na ya ti da ti Nzapa, lo mu mapa so a mu na *sandaga na Nzapa, lo te ni si lo mu mbeni na azo so amu peko ti lo; andaa a mu lege gi na awayango-sandaga oko ti te mapa ni!”

⁵Na pekoni, Jésus akiri atene na ala: “*Molenge ti Zo laa ayeke makonzi ti lango ti wungo tere.”

⁶Na mbeni lango nde ti wungo tere, Jésus ali na ya ti da ti sambelango Nzapa si lo yeke fa ye na azo. Kâ, mbeni koli ayeke daa so maboko ti lo ti koli abuba.

⁷Le ti awafango-ndia na *afarizien kue ayeke gi na tere ti Jésus; ala yeke ku ti baa wala lo yeke kai kobela na *lango ti wungo tere titene ala wara mbeni tënë ti bi na li ti lo.

⁸Me Jésus ahinga atënë ti be ti ala. Nilaa lo tene na koli so maboko ti lo abuba so, lo tene: “Londo, mo luti na ndo so na le ti azo kue!” Koli ni alondo si lo luti.

⁹Na pekoni, Jésus ahunda ala, atene: “Mbi hunda ala: *Ndia ti e afa nyen? A fa na e ti sara nzoni wala sioni, ti soo zo na kuâ wala ti fâ zo na lango ti wungo tere?”

¹⁰Jésus abaa le ti ala oko oko kue si lo tene na koli ni: “Yoro ya ti maboko ti mo!” Lo yoro ni si maboko ti lo aga nzoni.

¹¹Ngonzo agbu awafango-ndia na afarizien si ala yeke tene tënë na popo ti ala na ndö ti ye so ala lingbi ti sara na Jésus.

¹²Mbeni lâ, Jésus ague na li ti mbeni hoto ti sambela; lo sambela Nzapa na bi ni so kue.

¹³So ndo ahan awe, lo iri adisiple ti lo si lo soro ambeni baleoko na use, lo di iri ti ala *awatokua.

¹⁴Azo ni ayeke Simon, so Jésus adi iri ti lo Pierre na André ita ti lo, Jacques, Jean, Philippe, Barthélemy,

¹⁵Matthieu, Thomas, Jacques, molenge ti Alfe, Simon so azo atene lo yeke tiri ndali ti lipandaa ti kodro,

¹⁶Judas, molenge ti Jacques, na Judas Iskariote so ayeke ga ande zo ti kango Jésus.

¹⁷Jésus na *awatokua ti lo alondo na li ti hoto ni azu si lo luti na mbeni ndo so ayeke kpangbara. Adisiple ti lo mingi mingi ayeke kâ, ala na gba ti azo so asi singo. Azo ni alondo na ya ti agbata ti Judée kue, na Jérusalem, na agbata ti Tir na Sidon so ayeke na yanga ti kota ngu-ingo.

¹⁸Ala ga ti ma tënë ti Jésus, ala ga nga titene lo kai kobela ti ala. Ala so asioni yingo ayeke sara pasi na ala, tere ti ala nga aga nzoni.

¹⁹Azo kue ayeke gi lege ti ndu tere ti lo, ngbanga ti so mbeni ngangu ayeke sigigi na ya ti tere ti lo si ayeke sara titene tere ti ala kue aga nzoni.

²⁰Jésus abaa ndo na mbage ti adisiple ti lo si lo tene: “Ti ala nzoni, ala so ayeke awayere, ngbanga ti so *Kodro-gbia ti Nzapa ayeke ti ala!

²¹Ti ala nzoni, ala so nzara ayeke sara ala fadeso, ngbanga ti so fade ya ti ala ayeke si! Ti ala nzoni, ala so ayeke toto fadeso, ngbanga ti so fade ala yeke he ngia!

²²“Ti ala nzoni, ala so azo ake ala, atumba ala, azonga ala si ayeke diko asioni tënë na iri ti ala ndali ti *Molenge ti Zo!

²³Na ndembe ni so, ala duti na ngia, ala dodo na ngia, ngbanga ti so futa ti ala ayeke ande kota na yayu! Biani, akotara ti ala asara ando gi tongaso na awayanga-Nzapa.

²⁴Me mawa na ala, azo ti mosoro, ngbanga ti so ala wara ye ti dengo be ti ala awe!

²⁵Mawa na ala, ala so ya ti ala asi fadeso, ngbanga ti so fade nzara ayeke sara ala! Mawa na ala, ala so ayeke he ngia fadeso, ngbanga ti so fade ye ti vundu ayeke si na ala si ala yeke toto!

²⁶Mawa na ala, ala so azo kue ayeke tene nzoni tënë ti ala! Biani, akotara ti ala asara ando gi tongaso na awayanga-Nzapa ti mvene!”

²⁷“Me mbi tene na ala, ala so ayeke ma mbi so: Ala ye awato ti ala, ala sara nzoni na azo so ake ala!

²⁸Ala sara tufa na ndö ti azo so adeba ala, ala sambela ndali ti azo so asara ngangu na ala!

²⁹Tongana mbeni zo apika ngbangba ti mo, yoro nga na lo mbage ni lo pika. Tongana mbeni zo amu kota bongo ti mo, zia lo mu nga nduzu bongo ti mo.

³⁰Tongana mbeni zo ahunda ye na mo, mu ni na lo; tongana mbeni zo amu mbeni ye ti mo, hunda lo ti kiri na ni na mo pepe.

³¹Ye so ala ye titene azo asara na ala, ala sara nga ye ni na azo.

³²Tongana ala ye gi azo so aye ala, ye titene azo agonda ala ndali ni ayeke so wa? Azo ti siokpari nga aye gi azo so aye ala.

³³Tongana ala sara nzoni gi na azo so asara nzoni na ala, ye titene azo agonda ala ndali ni ayeke so wa? Azo ti siokpari nga ayeke sara gi tongaso.

³⁴Tongana ala sara boon gi na azo so ala hinga atene, fade azo ni ayeke kiri na ni na ala, ye titene azo agonda ala ndali ni ayeke so wa? Azo ti siokpari nga ayeke sara boon na amba ti ala titene na pekoni, ala kiri na ni na ala.

³⁵Me ala ye awato ti ala, ala sara nzoni na azo! Ala sara boon na azo, me ala ku ti wara mbeni ye na peko ni pepe. Tongaso si ala yeke wara ande kota ye ti nzoni na pekoni si ala yeke duti amolenge ti Nzapa so ayeke na yayu kâ na ndö ti aye kue. Nzapa ayeke sara nzoni na azo so ahinga ti mu singila pepe nga na azo ti sioni.

³⁶Ala sara nzoni be mingi na azo tongana ti so Babâ ti ala ayeke sara nzoni be mingi na azo.”

³⁷“Ala fâ ngbanga na li ti azo pepe si Nzapa afâ nga ngbanga na li ti ala pepe; ala zia tënë na li ti azo pepe si Nzapa azia nga tënë na li ti ala pepe; ala zi tënë na li ti azo si Nzapa azi nga tënë na li ti ala.

³⁸Ala mu ye na azo si Nzapa amu nga ye na ala. Fade a yeke mu ye ti hakango na ye, a haka ye na ya ni, a pete ndö ni, a yingi ni ngbii asi meke meke si a tuku ni na yanga ti bongo ti ala. Ye so ala yeke mu ti haka na ye na amba ti ala, gi ni laa a yeke mu nga ti haka na ye na ala.”

³⁹Jésus akiri atene na ala mbeni toli, atene: “Waziba alingbi ti fa lege na mba ti lo waziba? Fade ala use kue ayeke ti na ya ti du pepe?

⁴⁰Zo ti mandango ye ahon wafango-ye na lo pepe; me tongana lo manda ye nzoni, fade lo ga tongana wafango-ye na lo.

⁴¹Ngbanga ti nyen laa mo yeke baa gi kete pere so ayeke na le ti mba ti mo si mo yeke baa kota keke so ayeke na le ti mo so pepe?

⁴²Tongana nyen laa mo yeke tene na mba ti mo, mo tene: ‘Ita, ku mbi zi pere so ayeke na le ti mo’ si ti mo, mo yeke baa kota keke so ayeke na le ti mo so pepe? Mo so tënë ti yanga ti mo ayeke nde na sarango ye ti mo so, ayeke nzoni mo zi kota keke so ayeke na le ti mo so kozoni si na pekoni, mo baa ndo nzoni ti zi pere so ayeke na le ti mba ti mo.”

⁴³“Nzoni keke ayeke le fungo lengo ni pepe si keke so abuba ayeke le nga nzoni lengo ni pepe.

⁴⁴A yeke hinga keke oko oko gi na lege ti lengo ti lo. A yeke ko afige na tere ti akeke ti ki pepe si a yeke ko nga ale ti *vinye na ya ti akamba ti ki pepe.

⁴⁵Nzoni zo ayeke sigigi na anzoni ye so ayeke na be ti lo; me sioni zo ayeke sigigi na asioni ye so ayeke na be ti lo. Biani, ye so asi be ti zo laa ayeke sigigi na lege ti tënë ti yanga ti lo.”

⁴⁶“Ngbanga ti nyen laa ala yeke iri mbi: ‘*Kota Gbia, Kota Gbia’, me ala sara ye alingbi na tënë so mbi tene so pepe?

⁴⁷Zo so aga na mbi, lo ma tënë ti mbi si lo sara ye alingbi na ni, lo kpa zo wa? Mbi ye ti fa ni na ala:

⁴⁸lo yeke tongana zo so ayeke sara da; lo zi du so ali si lo leke gere ti da ni na ndö ti têne. Ngu asuku amu ndo kue, ngu asua ngangu, apika tere ti da ni, me da ni ayingi oko pepe, ngbanga ti so lo sara da ni nzoni.

⁴⁹Me zo so ama atënë ti mbi si lo sara ye alingbi na ni pepe, lo yeke tongana zo so asara da na ndö ti senge sese, gere ti da ni ayeke daa pepe. Ngu asua ngangu, apika tere ti da ni si gi hio tongaso, da ni akungbi, ati si abuba kue.”