Read sango Luc 8 Bible Online

Luc 8 - sango bible

Luc 8

¹Na pekoni, Jésus atambula na ya ti agbata na akete kodro; lo yeke fa na azo Nzoni Tënë ti kodro-gbia ti Nzapa. Adisiple baleoko na use ayeke na tere ti lo,

²ala na ambeni wali so lo tumba asioni yingo na ya ti ala si lo kai akobela na tere ti ala. Awali ni ayeke: Marie so a iri lo zo ti kodro ti Magdala, so ayingo mbarambara asigigi na ya ti lo,

³lo na Jeanne, wali ti Kuza, wabatango aye ti Herode, na Suzanne na ambeni wali mingi so ayeke mu ye ti ala wani ti mu maboko na Jésus na adisiple ti lo.

⁴Gba ti azo alondo na ya ti agbata oko oko kue si ala ga abongbi na tere ti Jésus; lo tene na ala toli so, lo tene:

⁵“Mbeni zo ague na yaka ti lo ti bi ale ti kobe. So lo yeke bi ale ti kobe ni, ambeni atuku na tere ti lege; azo ado ni na gere ti ala si andeke ti nduzu ate ni kue.

⁶Ambeni le ni atuku na ndö ti atêne; ala sigigi, akono si ahole, ngbanga ti so ngu ayeke na gere ni pepe.

⁷Ambeni le ni atuku na popo ti apere ti ki; apere ni akono legeoko na ale ti kobe ni si akanga ndö ti ala kue.

⁸Ambeni le ni atuku na nzoni sese; ala kono si ala oko oko ale ngbangbo oko.” So Jésus atene tënë so awe, lo dekongo, lo tene: “Zo so ayeke na mê ti mango ndo, ayeke nzoni lo ma tënë so!”

⁹Adisiple ti Jésus ahunda lo na nda ti toli so.

¹⁰Lo tene: “Ti ala, Nzapa amu na ala lege ti hinga nda ti tënë ti *Kodro-gbia ti Nzapa so angba na hondengo ni, me ti ambeni zo, a tene tënë ni na ala na lege ti atoli titene ‘ala yeke baa ndo, me ala yeke baa ye pepe; ala yeke ma ndo, me ala yeke ma ya ti atënë ni pepe.’ ”

¹¹“Nda ti toli ni ayeke so: le ti kobe ni ayeke tënë ti Nzapa.

¹²Ambeni zo ayeke tongana tere ti lege so ale ti kobe atuku daa. So ala ma tënë ni, Zabolo aga, azi tënë ni na be ti ala titene ala ma na be pepe, ngbanga ti ala soo kuâ.

¹³Ambeni zo ayeke tongana ndö ti têne so ale ti kobe atuku daa; tongana ala ma tënë ni, ala yamba ni na ngia, me tënë ni ali na ya ti be ti ala pepe; ala ma na be gi na ya ti kete ngoi, tongana ye ti tarango be asi na ala, ala do lege ni azia.

¹⁴Ale ti kobe so atuku na popo ti apere ti ki ayeke azo so ama tënë ni; me gingo be ti ala, na amosoro, na anzerengo ye ti dunia so akanga ndö ti ala si lege ti ala ti le nzoni lengo ayeke daa pepe.

¹⁵Ambeni zo ayeke tongana nzoni sese so ale ti kobe atuku daa; ala ma tënë ni na be so ayeke mbirimbiri si ayeke nzoni. Ala bata tënë ni si ala kanga be ti ala ti le lakue.”

¹⁶“Zo ayeke zia wâ na ya ti lamba ti zia ni na gbe ti ta wala na gbe ti gbogbo pepe. Me lo yeke zia ni na ndö ti mbeni ye na nduzu si azo so ayeke li na ya ti da abaa ndo nzoni.

¹⁷Ye so kue angba na hondengo ni, fade ayeke sigigi polele na le ti azo; ye so kue angba na gbe mingo, fade ayeke sigigi si azo kue ahinga tënë ni.

¹⁸Ala sara hange na lege so ala yeke ma na tënë, ngbanga ti so zo so ayeke na ye, fade a kiri amu mbeni na ndö ni na lo; me zo so ayeke na ye pepe, ataa ye so lo baa lo tene, ni yeke na ni, fade a yeke zi na maboko ti lo.”

¹⁹Mama ti Jésus na a-ita ti lo aga ti baa lo, me ala lingbi ti si na tere ti lo pepe, ngbanga ti so azo ayeke gbani gbani.

²⁰Azo atene na lo: “Mama ti mo na a-ita ti mo ayeke na gigi, ala ye ti baa mo.”

²¹Lo kiri tënë na ala: “Azo so ama tënë ti Nzapa si ala yeke sara ye alingbi na ni, ala so laa ayeke mama ti mbi na a-ita ti mbi.”

²²Mbeni lâ, Jésus na adisiple ti lo ako na ya ti ngo; lo tene na ala: “E gue na mbage ti kota ngu ni kâ.” Ala hon ague yongoro na le ti ngu ni.

²³So ala yeke hon na le ti ngu ni, Jésus alango. Mbeni kota pupu ato nda ti ya na le ti ngu ni si ngu ayeke tuku na ya ti ngo ni; ala yeke na ya ti ye ti ngangu.

²⁴Ala ga azingo Jésus, atene: “Kota zo, kota zo, e yeke kui!” Lo zingo na lango, lo suku na pupu nga na *amapo ni si ala kai, ndo ade.

²⁵Na pekoni, lo tene na adisiple ti lo: “Mabe ti ala ayeke na ndo wa?” Mbeto agbu ala, li ti ala kue akpe si ala yeke tene na popo ti ala, atene: “Koli so ayeke zo wa si lo suku na pupu nga na ngu si ala kue ama yanga ti lo so?”

²⁶Jésus na adisiple ti lo asi na mbage ti ngu ni na sese ti azo ti Zeraza, so ayeke baa le na Galile.

²⁷So Jésus alondo na ya ti ngo ni si lo yeke zu na sese, mbeni zo ti gbata ni so ayeke na asioni yingo aga atengbi na lo. Ngu mingi, zo ni ayu bongo pepe, lo yeke lango nga na ya ti da pepe, me lo yeke lango gi na popo ti adu ti kuâ.

²⁸So lo baa Jésus, lo dekongo, lo ti na gbe ti lo si lo tene tënë na kota go, lo tene: “Jésus, Molenge ti Nzapa so ayeke na yayu kâ na ndö ti aye kue, ti mo na mbi nyen? Mbi gbu gere ti mo, sara sioni na mbi pepe!”

²⁹Lo tene tongaso, ngbanga ti so Jésus asuku na sioni yingo ni ti sigigi na ya ti koli so. Lege mingi, sioni yingo ni amu lo; azo ayeke kanga maboko ti lo na gere ti lo na azingiri ti bata lo, me lo yeke fâ ya ti aye so kue si sioni yingo ni ayeke mu lo ti kpe na lo na benyama.

³⁰Jésus ahunda lo: “Iri ti mo ayeke nyen?” Lo kiri tënë: “Gbani-gbani”, ngbanga ti so asioni yingo gbani gbani laa ali na ya ti lo.

³¹Asioni yingo ni avoro tere ti ala na Jésus titene lo mu yanga na ala pepe ti gue na ya ti *kota du so alinda mingi so.

³²Andaa na ndo ni so, gba ti anguru ayeke te kobe na li ti hoto. Asioni yingo ni avoro Jésus titene lo zia ala, ala li na ya ti anguru ni; lo yeda na ala.

³³Tongaso asioni yingo ni asigigi na ya ti koli ni, ala li na ya ti anguru ni. Ala londo na loro na li ti hoto ni si ala tuku kue na ya ti ngu, ala kui.

³⁴So awabatango-nguru ni abaa ye so asi so, ala kpe si ala gue, atene tënë ni na ya ti gbata ni nga na ya ti akete kodro ti yanga ti yaka.

³⁵Azo aga ti baa ye so asi so. Ala si na tere ti Jésus si ala baa koli so lani asioni yingo asigigi na ya ti lo so. Lo yeke duti na gbe ti Jésus, lo yu bongo si li ti lo aga nzoni. Mbeto agbu ala kue.

³⁶Azo so abaa ye so asi so afa na azo ni lege so zo ti asioni yingo so aga nzoni.

³⁷Azo ti sese ti Zeraza kue ahunda na Jésus ti londo na ndo ti ala ti hon, ngbanga ti so kota mbeto agbu ala mingi. Jésus ako na ya ti ngo si lo kiri.

³⁸Koli so asioni yingo asigigi fade na ya ti lo so ahunda mingi na Jésus ti ngba na tere ti lo. Me Jésus ake na lo, atene:

³⁹“Kiri na ndo ti mo si mo fa peko ti ye so kue Nzapa asara na mo.” Koli ni ague si lo yeke fa tënë ti ye so kue Jésus asara na lo so na azo ti gbata ni kue.

⁴⁰So Jésus akiri awe, gba ti azo aku lo ti yamba lo.

⁴¹Mbeni koli so iri ti lo Yairus aga na tere ti lo; lo yeke makonzi ti da ti sambelango Nzapa. Lo ti na gbe ti Jésus, lo voro lo titene lo gue na da ti lo,

⁴²ngbanga ti so oko molenge ti lo ti wali, ngu ti lo ayeke nduru na ngu baleoko na use ayeke kui. So Jésus amu lege ti gue, azo gbani gbani ayeke na tere ti lo si ala yeke pete lo mbage na mbage.

⁴³Mbeni wali ayeke kâ, mene ayeke ga na tere ti lo mingi mingi, asara ngu baleoko na use awe. Wali so abuba aye ti lo kue na lege ti awanganga ndali ti kobela so, me zo oko awara lege ti kai kobela ni pepe.

⁴⁴Lo ga na mbage ti peko ti Jésus si lo ndu yanga ti bongo ti lo. Gi hio tongaso, kobela ti mene ni akai.

⁴⁵Jésus ahunda ndo, atene: “Zo wa laa andu mbi so?” Azo ni kue abere atene, ayeke ani pepe; Pierre atene: “Kota zo, azo ayeke gbani gbani, ala laa ayeke pete mo mbage na mbage!”

⁴⁶Me Jésus atene: “Mbeni zo andu mbi! Mbi hinga ni, ngbanga ti so mbeni ngangu asigigi na ya ti tere ti mbi.”

⁴⁷So wali ni ahinga atene, a sigigi na nda ti lo awe, tere ti lo ayeke do, lo ga, lo ti na gbe ti Jésus, lo fa na le ti azo kue ye so asara si lo ndu bongo ti Jésus. Lo fa nga lege so kobela ti lo akai gi na ndembe so lo ndu bongo ni.

⁴⁸Jésus atene na lo: “Molenge ti mbi ti wali, mabe ti mo asoo mo awe, mo gue nzoni!”

⁴⁹So Jésus ade ti tene tënë so, mbeni zo alondo na da ti Yairus si aga atene na lo: “Molenge ti mo ni akui awe; mo hunda na wafango-ye ti gue kâ senge senge pepe.”

⁵⁰Me Jésus ama tënë ni si lo tene na Yairus: “Sara mbeto pepe, ma gi na be; fade lo yeke soo kuâ.”

⁵¹So Jésus asi na da ni, lo mu lege gi na Pierre, Jean na Jacques, na babâ ti molenge ni na mama ti lo titene ala na lo ali na ya ti da ni.

⁵²Azo ni kue ayeke toto si ala yeke dema tere ndali ti molenge ni. Me Jésus atene na ala: “Ala toto pepe! Lo kui pepe, me lo yeke lango.”

⁵³Ala he lo na ngia, ngbanga ti so ala hinga atene, molenge ni akui awe.

⁵⁴Me Jésus agbu maboko ti molenge ni, lo iri lo, lo tene: “Molenge ti mbi, londo!”

⁵⁵Yingo ti lo akiri na ya ti tere ti lo si gi hio tongaso, lo londo. Jésus amu yanga, atene: “Ala mu na lo kobe, lo te.”

⁵⁶Li ti babâ na mama ti molenge-wali ni akpe; me Jésus amu yanga na ala ti tene tënë ni na zo oko pepe.