Read sango Ndia ti fani use ni 10 Bible Online

Ndia ti fani use ni 10 - sango bible

Ndia ti fani use ni 10

¹Moïse atene: Tongaso *KOTA GBIA amu yanga na mbi, atene: “Mo leke ambeni kpangbara têne use tongana ti kozoni so; mo leke nga mbeni sanduku ti keke. Na pekoni, mo ga na li ti hoto na mbage ti mbi.

²Na ndö ti akpangbara têne ni, fade mbi yeke su gi atënë so ayeke na ndö ti akozo kpangbara têne so mo fâ ya ni so. Na pekoni, mo yeke zia akpangbara têne ni na ya ti sanduku ni.”

³Tongaso mbi leke sanduku ni na keke ti akasia, mbi leke akpangbara têne use tongana ti kozoni so si mbi gue na ni na li ti hoto ni.

⁴KOTA GBIA asu na ndö ti afini kpangbara têne ni gi atënë so lo su na ndö ti akozo têne ni so, so ti tene Andia baleoko so lo tene lani tënë ni na ya ti wâ, na lango so ala bongbi na gbe ti hoto so. Na pekoni, lo mu na mbi akpangbara têne ni.

⁵Mbi kiri mbi londo na li ti hoto ni, mbi zu; mbi zia atêne ni na ya ti sanduku so mbi leke ni so. Akpangbara têne ni angba na ya ni, alingbi na yanga so KOTA GBIA amu lani na mbi. —

⁶Azo ti Israel alondo na ndo so adu ti ngu ti Bene-Yakan ayeke daa si ala si na Mosera. Kâ, Aaron akui si a lu lo. Molenge ti lo ti koli Elazar aga wayango-sandaga na peko ti lo.

⁷Ala londo na ndo so ala si na Gudgoda, ala londo na Gudgoda ala si na Yotbata, sese so ngu ayeke daa mingi.

⁸Na ngoi ni so, KOTA GBIA azia azo ti mara ti Lévi nde titene ala yo sanduku ti mbuki ti lo, ala luti na dawa ti KOTA GBIA ti sara kua ti lo, ti sara tufa na ndö ti azo na iri ti lo. Azo ti mara ti Lévi angba ti sara akua so ngbii asi laso.

⁹Ndani laa, azo ti mara ti Lévi awara sese pepe na popo ti tanga ti amara ni titene aga ti ala tongana a-ita ti ala. Me ye so azo ti mara ti Lévi awara titene aga ti ala ayeke pasa ti sarango kua ti KOTA GBIA, alingbi na tënë so KOTA GBIA Nzapa ti ala, azo ti Israel atene na ala. —

¹⁰Mbi ngba na li ti hoto ni lango baleosio na bi baleosio tongana ti kozoni. Ti so ni, KOTA GBIA akiri ama sambela ti mbi si lo zia lege ti fâ ala kue.

¹¹KOTA GBIA atene na mbi: “Londo! Mo mu li ti tambula ni na azo ni. Alingbi ala gue, amu sese so mbi deba yanga ti mbi na akotara ti ala ti mu na ala so!”

¹²Moïse atene: Ala azo ti Israel, ye so *KOTA GBIA Nzapa ti ala ayeke ku na mbage ti ala fadeso ayeke nyen? Lo yeke ku gi titene ala kpe mbeto ti lo, ala sara ye so kue lo ye, ala ye lo si ala sara kua na lo na be ti ala kue, na yingo ti ala kue.

¹³Lo ye titene ala sara ye alingbi na atënë ti ndia ti lo nga na aye so ndia ti lo afa; mbi fa ni na ala laso titene ala duti nzoni.

¹⁴Yayu so akono ahon ndoni, sese na aye so kue ayeke na ndö ni ayeke ti KOTA GBIA Nzapa ti ala.

¹⁵Me na popo ti amara kue, gi akotara ti ala oko laa be ti KOTA GBIA agbu ala si lo ye ala. Fadeso, ala *ahale ti ala laa lo soro ala na popo ti amara kue, tongana ti so a yeke baa ni laso so.

¹⁶Tongaso, alingbi ala fâ be ti ala na *ganza, ala kiri asara ngangu li na KOTA GBIA pepe.

¹⁷Biani, KOTA GBIA Nzapa ti ala ayeke kota mingi, lo hon anzapa kue, lo yeke Kota Gbia mingi lo hon agbia kue; lo yeke kota, lo yeke ngangu mingi si lo yeke zia mbeto na be ti zo. Lo yeke mu mbage ti mbeni zo pepe, zo alingbi ti pete goro na lo pepe.

¹⁸Lo yeke gbu koko ti anyindu na awali-mua; lo ye awande si lo yeke mu na ala kobe ti tengo ni na bongo ti yungo ni.

¹⁹Tongaso, alingbi ala nga, ala ye awande, ngbanga ti so ala, azo ti Israel, ala yeke ando awande na sese ti Ezipte.

²⁰Alingbi ala kpe mbeto ti KOTA GBIA Nzapa ti ala, ala voro lo, ala ngba gi na tere ti lo, ala deba yanga ti ala gi na iri ti lo.

²¹Lo laa alingbi ala sepela lo, lo laa lo yeke Nzapa ti ala. Ndali ti ala laa lo sara akota ye na aye ti ziango mbeto na be ti zo so ala wani abaa na le ti ala so.

²²Na ndembe so akotara ti ala ague na sese ti Ezipte, wungo ti ala ayeke ando balembarambara senge. Fadeso, KOTA GBIA Nzapa ti ala asara si ala wu gbani gbani tongana atongoro ti le ti nduzu.