Read sango Ndia ti fani use ni 11 Bible Online

Ndia ti fani use ni 11 - sango bible

Ndia ti fani use ni 11

¹Moïse atene: Alingbi ala ye *KOTA GBIA Nzapa ti ala, ala sara ye alingbi na ye so lo mu yanga na ala ti sara, aye so ndia ti lo afa, atënë ti ndia ti lo nga na atënë ti yanga ti lo.

²Laso, mbi yeke tene tënë so na amolenge ti ala pepe; amolenge ni abaa ye ni pepe, ala hinga tënë ti ye so KOTA GBIA Nzapa ti ala asara pepe. Me mbi yeke tene tënë so na ala, ngbanga ti so ala laa ahinga atene, KOTA GBIA ayeke kota; ala baa na le ti ala ye so lo sara na lege ti ngangu ti maboko ti lo nga na lege ti maboko ti lo so lo yoro.

³Ala baa aye ti kpene na aye ti dongo be so lo sara na Ezipte, ye so lo sara na Faraon, gbia ti Ezipte nga na azo ti kodro ni kue.

⁴Ala baa nga ye so lo sara na aturugu ti Ezipte, ambarata ti ala nga na apusu ti mbarata ti ala. Biani, na ndembe so ala yeke tumba peko ti ala, azo ti Israel, KOTA GBIA asara si ngu ti kota ngu-ingo ti Asosongo aga na ndö ti ala. Lo sara si ala kui kue kpu na kpu.

⁵Lo sara ye ndali ti ala na ya ti benyama ngbii ala si na ndo so.

⁶Lo sara na Datan nga na Abiram, amolenge ti Eliab, zo ti mara ti Ruben. Na dawa ti azo ti Israel kue, KOTA GBIA asara si sese azi si amene ala, ala na asewa ti ala, ada ti ala ti bongo nga na ala so kue amu peko ti ala.

⁷Biani, ala wani abaa na le ti ala akota ye so kue KOTA GBIA asara.

⁸Nilaa, alingbi ala sara ye alingbi na atënë ti yanga ti mbi so kue mbi yeke tene na ala laso. Tongaso, fade ala yeke wara ngangu so alingbi titene ala gue, amu sese so ala yeke li na ya ni;

⁹tongaso, fade gigi ti ala ayeke gue, ayo na ya ti sese so KOTA GBIA adeba yanga ti lo ti mu na akotara ti ala nga na *ahale ti ala; *sese so ngu ti me ti bagara na mafuta ti wotoro asi singo daa.

¹⁰Moïse atene: Sese so ala yeke gue ti mu ni titene aga ti ala so, ayeke tongana Ezipte pepe so ala sigigi daa so. Kâ na Ezipte, tongana ala lu lani ale ti akobe, ala yeke suru lege na ngu titene ague, atuku na ndö ti akobe ni tongana ti so zo ayeke sara na akugbe ti kasa ti kete yaka.

¹¹Me sese so ala yeke gue ti mu ni so, ayeke sese ti ahoto na ti apopo-hoto so ngu-Nzapa ayeke pika ka daa;

¹²ayeke sese so KOTA GBIA Nzapa ti ala laa ayeke bata ni. Ti londo na tongo nda ti fini ngu ngbii asi na nda ti ngu ni, le ti lo ayeke na ndö ni.

¹³Tongana ala sara ye alingbi na atënë ti yanga ti KOTA GBIA so mbi yeke fa na ala laso, tongana ala ye KOTA GBIA Nzapa ti ala si ala sara na lo na be ti ala kue, na yingo ti ala kue,

¹⁴fade lo yeke sara titene ngu-Nzapa apika na ndö ti sese ti ala na ngoi ni so alingbi: ngu-Nzapa ti kozo ngoi na ngu-Nzapa ti ndangba ngoi. Tongaso, fade ala yeke wara anzoni le ti kobe, *ble, fini vin na mafuta.

¹⁵Fade lo yeke sara si fini pere asigigi na ya ti ngonda titene anyama ti ala ate. Ti ala, fade ala yeke te kobe, ya ti ala asi.

¹⁶Ala sara hange si mbeni ye ahanda ala pepe! Ala mu mbeni lege nde pepe, ala voro anzapa nde pepe, ala kuku na gbe ti anzapa ni nga pepe.

¹⁷Tongana ala sara aye ni so, fade ngonzo ti KOTA GBIA ayeke londo na tere ti ala, lo yeke kanga le ti nduzu si ngu-Nzapa akiri apika pepe. Sese ayeke kiri ti du ale ti kobe pepe si ala yeke kui hio na ya ti nzoni sese so KOTA GBIA amu na ala.

¹⁸Atënë ti ndia so mbi yeke fa ni na ala, alingbi ala bata ni na ya ti be ti ala nga na ya ti yingo ti ala. Titene be ti ala agirisa na ni pepe, fade ala yeke kanga ni na maboko ti ala nga na ndö ti le ti ala.

¹⁹Fade ala yeke fa ni na amolenge ti ala. Ala yeke tene tënë ni na amolenge ni na ndembe so ala duti na yanga ti da ti ala nga na ndembe so ala yeke tambula na lege, na ndembe so ala gue ti lango nga na ndembe so ala zingo na lango.

²⁰Ala yeke su ni na tere ti akadere ti yanga ti da ti ala nga na tere ti yanga ti agbagba ti agbata ti ala.

²¹Tongana ala sara ye alingbi na ni, fade ala na *ahale ti ala ayeke duti na fini na ya ti kodro so KOTA GBIA adeba yanga ti lo lani ti mu na akotara ti ala. Na ngoi so kue yayu ayeke ngba na nduzu na ndö ti sese, ala yeke duti na fini na ya ti kodro ni.

²²Biani, alingbi ala sara kue ti bata atënë ti ndia so kue mbi yeke fa na ala, ala sara ye alingbi na ni. Ala ye KOTA GBIA Nzapa ti ala, ala tambula na lege so kue lo ye, ala ngba gi na tere ti lo.

²³Tongana ala sara tongaso, fade lo yeke tumba amara nde so kue na dawa ti ala, azo ti Israel. Ala yeke mu sese ti amara so awu mingi si ala yeke ngangu ahon ala.

²⁴Ndo so kue gere ti ala ayeke do ni ayeke ga ti ala: katikati ti sese ti ala ayeke londo na benyama na mbage ti Mbongo, ague ngbii asi na ahoto ti Liban na mbage ti Banga. Mbeni katikati ni ayeke londo na yanga ti *bale ti Efrate, na mbage ti To, ague ngbii asi na yanga ti kota ngu-ingo ti Mediterane na mbage ti Do.

²⁵Zo oko ti gbu le ni na ala ayeke daa pepe. Na ndo so kue ala yeke si daa na ya ti sese ni, fade KOTA GBIA Nzapa ti ala ayeke zia kota mbeto ti ala na be ti azo ni, azo ni ayeke duti na mbeto ti ala, azo ti Israel, alingbi na zendo so lo mu lani na ala.

²⁶Ala azo ti Israel, ala ma! Laso mbi zia na dawa ti ala ti soro na popo ti aye so: tufa na dengo ba.

²⁷Tongana ala ma andia ti KOTA GBIA so mbi fa na ala laso, fade KOTA GBIA Nzapa ti ala ayeke sara tufa na ndö ti ala.

²⁸Me tongana ala ma andia ni pepe, tongana ala zia lege so mbi fa na ala ti mu peko ti anzapa nde so ala hinga ni pepe, fade KOTA GBIA ayeke deba ala.

²⁹Na ndembe so KOTA GBIA Nzapa ti ala ayeke sara titene ala li na sese so ala yeke gue ti mu ni titene aga ti ala, na ndö ti hoto ti Garizim, fade ala yeke tene tënë so aga na tufa; na ndö ti hoto ti Ebal, ala yeke tene tënë so aga na dengo ba.

³⁰— Ahoto use so ayeke na mbage ti ngu ti Jourdain kâ, na mbage ti lege so ague na Do, na sese ti azo ti mara ti Kanaan so asara kodro na popo-hoto ti ngu ti Jourdain. Ahoto ni ayeke nduru na akeke ti shene ti Mamre, abaa le na gbata ti Gilgal. —

³¹Ala ga nduru ti fâ ngu ti Jourdain awe ti gue ti mu sese so KOTA GBIA Nzapa ti ala amu na ala. Fade ala yeke mu ni titene aga ti ala si ala yeke sara kodro kâ.

³²Tongaso, fade ala yeke sara ngangu ti bata aye so kue ndia afa nga na atënë ti ndia so mbi yeke fa na ala laso.