Read sango Ndia ti fani use ni 15 Bible Online

Ndia ti fani use ni 15 - sango bible

Ndia ti fani use ni 15

¹Moïse atene: Lakue na peko ti ngu mbarambara, alingbi ala zi yongo na li ti amba ti ala.

²Lege ti zingo yongo ni ayeke tongaso: Tongana a to mbela na iri ti *KOTA GBIA tënë ti zingo yongo na li ti azo awe, zo so kue asara boon ti nginza na mba ti lo, zo ti Israel, fade lo yeke zia lege ti hundango boon ni. Lo yeke gbu mba ti lo ni, wala ita ti lo, zo ti Israel ni na ngangu pepe titene lo futa na lo yongo ni.

³Ala lingbi ti gbu wande na ngangu titene lo futa na ala yongo ti ala; me ala yeke zi yongo na li ti ita ti ala, zo ti Israel.

⁴Me alingbi fade ti wara wayere na popo ti ala, azo ti Israel pepe, ngbanga ti so KOTA GBIA Nzapa ti ala ayeke sara tufa na ndö ti ala na ya ti sese so ala yeke mu ni titene aga ti ala.

⁵Lo yeke sara tufa na ndö ti ala gi tongana ala ma yanga ti KOTA GBIA Nzapa ti ala, ala sara kue ti sara ye alingbi na atënë ti ndia ti lo so mbi yeke fa ni na ala laso.

⁶Biani, fade KOTA GBIA Nzapa ti ala ayeke sara tufa na ndö ti ala alingbi na zendo so lo mu. Ala yeke sara boon ti nginza na gba ti amara nde; me ti ala, azo ti Israel, ala yeke hunda boon na maboko ti zo oko pepe. Ala yeke sara komandema na ndö ti gba ti amara nde; me zo oko ti mbeni mara nde ayeke sara komandema na ndö ti ala pepe.

⁷Tongana mbeni wayere ayeke na popo ti a-ita ti ala, azo ti Israel, na ya ti mbeni gbata oko ti sese so KOTA GBIA Nzapa ti ala ayeke mu na ala, alingbi ala kpengba be ti ala pepe, ala kanga nga maboko ti ala pepe ti sara boon na lo.

⁸Me fade ala yeke zi maboko ti ala ti sara boon na lo alingbi na ye so lo hunda.

⁹Me hange! Alingbi ala wara sioni gbungo-li pepe ti tene na be ti ala, atene: “Ngu mbarambara aga nduru ti lingbi awe, ngu ti zingo yongo na li ti azo.” Ita ti ala so ye atia lo, ala baa lo na sioni le pepe si ala ke ti mu ye na lo. Tongaso pepe, lo yeke toto na iri ti ala na KOTA GBIA si fade ye so ayeke ga siokpari ti ala.

¹⁰Ala mu ye na ita ti ala ni, ala mu ni na lo na nzoni be. Ndali ni, fade KOTA GBIA Nzapa ti ala ayeke sara tufa na ndö ti ala na ya ti akua ti ala kue nga na ya ti aye so kue ala ye ti sara.

¹¹Awayere ayeke duti daa lakue na ya ti kodro ti ala, azo ti Israel. Ndani laa, mbi mu yanga na ala, mbi tene: alingbi ala zi maboko ti ala ti mu ye na a-ita ti ala, azo ti mawa nga na awayere so ayeke na ya ti kodro ti ala.

¹²Moïse atene: Tongana mbeni ita ti ala hebro, koli wala wali, aka tere ti lo na ala si lo sara kua na ala tongana ngbaa, fade lo yeke sara kua ni na ya ti ngu omene. Na ngu mbarambara ni, ala yeke zi lo na gbe ti ngbaa ni.

¹³Me tongana ala zi lo, ala zia lo titene lo gue maboko ti lo senge pepe.

¹⁴Fade ala yeke mu na lo mbage ti anzoni ye so *KOTA GBIA asara tufa na ndö ti ala si ala wara ni so: ataba na angasa, *ble na vin.

¹⁵Ayeke nzoni ala dabe ti ala so ala wani, ala yeke ando angbaa na sese ti Ezipte si KOTA GBIA Nzapa ti ala azi ala. Ndani laa, mbi yeke mu yanga so na ala laso.

¹⁶Me tongana ngbaa ni ake ti gue si lo tene na ala: “Mbi ye ti zia mo pepe”. Biani, lo ye ala na azo ti sewa ti ala si lo duti nzoni na ndo ti ala,

¹⁷fade ala yeke mu mbeni kota sua, ala koro na mê ti lo na tere ti yanga ti da. Tongaso, fade lo yeke duti ngbaa ti ala kpu na kpu. Fade ala yeke sara nga legeoko tongaso na ngbaa ti ala ti wali.

¹⁸Alingbi be ti ala aso pepe ndali ti zingo zo na gbe ti ngbaa. Biani, kua so ngbaa ni asara na ala na ya ti ngu omene, lo sara si ala wara ye na peko ni fani use ahon ye so ala lingbi fade ti wara na peko ti kua ti zo ti kua so a yeke futa lo futango. Ala zi zo ni na gbe ti ngbaa, tongaso si fade KOTA GBIA Nzapa ti ala ayeke sara tufa na ndö ti ala na ya ti aye so kue ala yeke sara.

¹⁹Moïse atene: Ala azo ti Israel, fade ala yeke mu akozo molenge-koli ti abagara ti ala, ti ataba na ti ngasa ti ala, ala zia ni nde ndali ti *KOTA GBIA Nzapa ti ala. Ala yeke mu kozo molenge ti koli-bagara ti fâ na yaka pepe, ala yeke fâ kua ti tere ti kozo molenge ti taba pepe.

²⁰Lakue na ya ti ngu oko oko, ala na azo ti sewa ti ala, ala yeke te akozo molenge ti anyama ni so na dawa ti KOTA GBIA Nzapa ti ala na ndo so lo yeke soro ni.

²¹Tongana mbeni mbage ti tere ti nyama oko abuba, gere ti lo wala le ti lo, wala mbeni sioni ye nde ayeke na tere ti lo, ala mu lo na *sandaga na KOTA GBIA Nzapa ti ala pepe.

²²Ala yeke te nyama ni na ndo ti ala. Ataa zo so ayeke *sioni, wala zo so ayeke *nzoni, lo lingbi ti te nyama ni senge, tongana ti so zo ayeke te fade dengbe wala tagba.

²³Me fade ala yeke te mene ti nyama ni pepe. Ala yeke tuku ni na sese tongana ti so a yeke tuku ngu.