Read sango Ndia ti fani use ni 17 Bible Online

Ndia ti fani use ni 17 - sango bible

Ndia ti fani use ni 17

¹Bagara, wala taba wala ngasa so mbeni mbage ti tere ti lo abuba wala so mbeni sioni ye ayeke na tere ti lo, alingbi ala mu lo na *sandaga na *KOTA GBIA Nzapa ti ala pepe. Biani, so ayeke ye ti sioni mingi na le ti KOTA GBIA Nzapa ti ala.

²Mbeni ye tongaso alingbi ti si: na ya ti mbeni gbata so fade KOTA GBIA Nzapa ti ala ayeke mu na ala, mbeni koli wala mbeni wali asara ye so anzere na le ti KOTA GBIA Nzapa ti ala pepe. Zo ni abuba ya ti *mbuki ti ala na KOTA GBIA,

³lo mu peko ti ambeni nzapa nde, lo kuku na gbe ti ala ti voro ala. Ataa lâ, wala nze na aye so ayeke mingi mingi na le ti nduzu, zo ni akuku na gbe ti ala ti voro ala. Laoko KOTA GBIA amu yanga na ala ti sara ye tongaso pepe!

⁴Tongana ala ma tënë ti ye tongaso, fade ala yeke gi nda ti tënë ni mbirimbiri. Tongana ala hinga atene, zo ni asara sioni ye mingi tongaso biani na sese ti Israel,

⁵ala yeke sigigi na zo ni, ataa lo yeke koli wala wali, na yanga ti gbagba ti gbata ni; ala yeke bo lo na têne si lo kui.

⁶Zo so a fâ ngbanga ti kuâ na li ti lo, fade a yeke fâ lo gi na peko ti tënë ti yanga ti azo use wala ota; me na peko ti tënë ti yanga ti zo oko pepe.

⁷Azo so abaa lo na sarango ye ni so laa ayeke bo lo na têne kozoni ti fâ lo. Na pekoni, tanga ti azo ti kodro ni ayeke bo lo. Lege so fade ala yeke zi sioni ye na popo ti ala laa.

⁸Moïse atene: Mbeni zo alingbi ti fâ mba ti lo, wala zo apika mba ti lo si lo wara ka, wala mbeni tënë nde asi; tongana tënë ni akara awafango-ngbanga ti gbata ti ala, fade ala yeke gue na tënë ni na ndo so *KOTA GBIA Nzapa ti ala ayeke soro ni.

⁹Ala yeke gue ti baa awayango-sandaga, azo ti mara ti Lévi, nga na wafango-ngbanga so ayeke sara kua kâ na lango ni so. Awayango-sandaga ni na wafango-ngbanga ni ayeke fa na ala lege ti fango ya ti tënë ni.

¹⁰Fade ala, azo ti Israel, ala yeke sara ye alingbi gi na ngbanga so azo ni ayeke fâ na ndo so KOTA GBIA ayeke soro ni. Ala yeke sara ye kue alingbi na yanga so azo ni amu.

¹¹Yanga so azo ni ayeke mu na ala na ngbanga so ala yeke fâ ni, fade ala, azo ti Israel, ala yeke sara ye alingbi na ni. Ya ti ngbanga so azo ni afâ, ala yeke zia ni ti hon mbage na mbage pepe.

¹²Tongana mbeni zo na ya ti baba ti lo, ake ti ma tënë ti wayango-sandaga so aluti kâ na dawa ti KOTA GBIA Nzapa ti ala, wala wafango-ngbanga ni, fade a yeke fâ zo ni. Lege so fade ala yeke zi sioni ye na sese ti Israel laa.

¹³Azo kue ayeke ma tënë ni si fade mbeto ayeke gbu ala; tongaso, mbeni zo ayeke kiri ti sara ye ti baba tongaso pepe.

¹⁴Moïse atene: Ala azo ti Israel, fade ala yeke li na sese so KOTA GBIA Nzapa ti ala ayeke mu na ala titene aga ti ala si ala yeke sara kodro kâ. E hinga pepe, mbeni lâ, fade ala yeke tene: “E ye ti wara mbeni gbia ti duti na li ti e tongana ti ambeni mara so angoro e.”

¹⁵Tongana ala mu mbeni gbia ti duti na li ti ala, fade ala yeke mu gi gbia so *KOTA GBIA Nzapa ti ala wani ayeke soro lo. Gbia ni ayeke duti mbeni wande pepe, me mbeni zo ti Israel so ayeke ita ti ala.

¹⁶Ye oko, alingbi gbia ni aduti na ambarata gbani gbani pepe. Alingbi lo tokua azo na Ezipte pepe titene ala gue, avo gba ti ambarata, ngbanga ti so KOTA GBIA atene lani na ala, atene: “Fade ala yeke kiri ti gue na kodro so pepe!”

¹⁷Alingbi gbia ni aduti na gba ti awali pepe; tongaso pepe, fade awali ni ayeke sara titene be ti lo ahon yongoro na KOTA GBIA. Alingbi lo duti nga na gba ti nginza nga na gba ti lôro pepe.

¹⁸Tongana gbia ni ako na ndö ti mbata ti lo ti gbia awe, fade lo yeke su ndali ti lo wani mbeti ti *Ndia so na ya ti mbeni mbeti nde; so ti tene mbeti ti Ndia so awayango-sandaga, azo ti mara ti Lévi ayeke bata ka ni.

¹⁹Lo yeke bata buku ni na tere ti lo si lo yeke diko ni na lango ti fini ti lo kue. Tongaso, fade lo yeke manda ti kpe mbeto ti KOTA GBIA Nzapa ti lo, lo yeke sara kue ti sara ye alingbi na ni nga na atënë ti ndia so kue ayeke na ya ni.

²⁰Fade ayeke sara si lo baa tere ti lo pepe tongana kota zo so ahon a-ita ti lo. Lo yeke zia lege ti atënë ti ndia ni pepe ti hon mbage na mbage. Lo na *ahale ti lo ayeke ngba ti sara komandema na ndö ti azo ti Israel aninga.