Read sango Ndia ti fani use ni 18 Bible Online

Ndia ti fani use ni 18 - sango bible

Ndia ti fani use ni 18

¹Moïse atene: Fade awayango-sandaga, azo ti mara ti Lévi, na tanga ti azo ti mara ti Lévi kue ayeke wara sese pepe titene aga ti ala, tongana tanga ti azo ti Israel. Ala yeke wara kobe ti ala na lege ti *asandaga so azo ayeke ga na ni ti mu na *KOTA GBIA nga na lege ti ambeni ye so aga ti KOTA GBIA awe.

²Azo ti mara ti Lévi ayeke wara sese pepe titene aga ti ala na popo ti a-ita ti ala, azo ti Israel. Ye ti azo ti mara ti Lévi ayeke KOTA GBIA, alingbi na tënë so lo tene na ala.

³Ye so ayeke ti awayango-sandaga ayeke abagara, ataba wala angasa so azo ti Israel ayeke mu na sandaga ti beoko: alingbi a mu na awayango-sandaga ni maboko ti nyama ni, angbangba ni na ya ni.

⁴Fade ala, azo ti Israel, ala yeke mu nga na awayango-sandaga ni akozo le ti kobe ti ala: *ble, fini vin na mafuta; ala yeke mu nga na awayango-sandaga ni akozo kua ti tere ti ataba ti ala.

⁵Biani, KOTA GBIA Nzapa ti ala asoro Lévi, lo na *ahale ti lo na popo ti amara ti Israel kue titene ala sara kua na iri ti KOTA GBIA lakue.

⁶Mbeni lâ, tongana mbeni zo ti mara ti Lévi ayeke na nzara ti londo na ya ti mbeni gbata ti Israel, ndo so lo sara kodro daa, ti gue na ndo so KOTA GBIA ayeke soro ni,

⁷fade lo yeke sara kua kâ na iri ti KOTA GBIA Nzapa ti lo, tongana ti a-ita ti lo, azo ti mara ti Lévi so kue ayeke luti na dawa ti KOTA GBIA.

⁸Ti lo kobe ni ayeke duti legeoko na ti ala si nginza so lo yeke wara na peko ti kango akungba ti asewa ti lo ayeke ga na ndö ni.

⁹Moïse atene: Tongana ala li ande na sese so *KOTA GBIA amu na ala, fade ala yeke manda sioni sarango ye ti amara ni so pepe; sioni sarango ye so zo alingbi ti baa na le ti lo fani use pepe so.

¹⁰Ala azo ti Israel, alingbi a wara na popo ti ala pepe mbeni zo oko so ayeke gbi molenge ti lo ti koli wala molenge ti lo ti wali ti mu na *sandaga. Alingbi a wara na popo ti ala pepe azo ti sarango mazi, azo ti bango nda ti aye, azo ti bingo zeke, azo ti yoro,

¹¹azo ti kangango zo na yoro, wala ambeni mara ti azo ti sarango tënë na atoro.

¹²Biani, zo ti sarango ye tongaso ayeke sioni mingi na le ti KOTA GBIA. Ndani laa, fade KOTA GBIA Nzapa ti ala ayeke tumba amara ni so na dawa ti ala, azo ti Israel.

¹³Me ti ala, azo ti Israel, alingbi ala duti nzoni kue ndali ti KOTA GBIA Nzapa ti ala.

¹⁴Amara so ala yeke gue ti tumba ala ti mu sese ti ala, ayeke ma azo ti bango nda ti aye na azo ti yoro. Me ti ala, azo ti Israel, KOTA GBIA Nzapa ti ala ake titene ala sara ye tongaso.

¹⁵Fade KOTA GBIA Nzapa ti ala ayeke sara titene mbeni wayanga-Nzapa tongana mbi, abaa gigi na popo ti ala; lo yeke duti mbeni ita ti ala. Fade ala yeke ma yanga ti lo!

¹⁶Ye so ala hunda lani na KOTA GBIA Nzapa ti ala, na lango so ala bongbi na gbe ti hoto ti Horeb laa. Ala tene lani: “E wani, e ye ti ma go ti KOTA GBIA Nzapa ti e mbeni pepe! E ye ti baa kota wâ so mbeni pepe! E ye ti kui pepe!”

¹⁷Tongaso KOTA GBIA atene na mbi: “Tënë ti azo so ayeke na legeni.

¹⁸Fade mbi yeke tokua na ala mbeni wayanga-Nzapa tongana mo; wayanga-Nzapa ni ayeke duti mbeni ita ti ala. Mbi yeke zia tënë ti mbi na yanga ti lo si lo yeke tene na ala atënë so kue mbi yeke mu yanga na lo ti tene.

¹⁹Tongana mbeni zo ake ti ma tënë so wayanga-Nzapa ni ayeke tene na iri ti mbi, fade mbi wani, mbi yeke hunda zo ni ngbanga ti tënë ni.

²⁰Me mbeni wayanga-Nzapa so atene tënë ti li ti lo wani na iri ti mbi, andaa mbi laa mbi zia tënë ni na yanga ti lo pepe, wala lo tene tënë na azo na iri ti ambeni nzapa nde, fade a yeke fâ wayanga-Nzapa so.”

²¹Fade ala yeke hunda tere ti ala, atene: “Tënë so alondo na KOTA GBIA pepe, fade e yeke hinga ni tongana nyen?”

²²Tongana wayanga-Nzapa ni atene mbeni tënë na iri ti KOTA GBIA si peko ti tënë asi alingbi na ni pepe, wala aga taa-tënë pepe, andaa tënë ti lo ni alondo na KOTA GBIA pepe. Wayanga-Nzapa ni atene tënë ti li ti lo wani. Alingbi ala, azo ti Israel, ala sara mbeto ti wayanga-Nzapa ni pepe!