Read sango Ndia ti fani use ni 19 Bible Online

Ndia ti fani use ni 19 - sango bible

Ndia ti fani use ni 19

¹Moïse atene: Ala azo ti Israel, fade *KOTA GBIA Nzapa ti ala ayeke zi ambeni mara nde na sese ni si lo yeke mu na ala sese ni. Ala yeke tumba amara ni si ala yeke lango na ya ti agbata ti amara ni nga na ya ti ada ti ala.

²Sese so KOTA GBIA Nzapa ti ala ayeke mu na ala titene aga ti ala so, fade ala yeke kangbi ya ni ota; na pekoni, ala yeke soro agbata ota na ya ti sese ni si ala yeke suru alege ti gue na ya ti agbata ni. Tongaso si zo so afâ mba ti lo, lo lingbi ti kpe kâ ti bata tere ti lo.

⁴Zo so afâ mba ti lo, me lo sara ni na mbana pepe si lo zia nga mba ti lo ni na be ti lo kozoni pepe, gi zo ti fango zo tongaso laa alingbi ti kpe na ya ti mbeni gbata ni oko ti soo fini ti lo.

⁵Tapande ti mbeni ye so alingbi ti si ayeke so: azo use ague na ya ti gbako ti de keke. Mbeni oko ayo do ti lo ti de keke; wen ti do ni azi na yanga ti keke ni si apika mba ti lo si afâ lo. Zo so afâ mba ti lo na mbana pepe so alingbi ti kpe na ya ti mbeni gbata ni oko si lo soo fini ti lo,

⁶tongaso si na ya ti ngonzo ti lo ti wâ, zo so alingbi ti kiri peko ti fango zo ni na lo, atumba peko ti lo pepe. E hinga pepe, so lege angba ti yo, fade lo yeke wara lo na lege, lo gbu lo si lo fâ lo. Biani, alingbi a fâ zo ti fango mba ti lo ni pepe, ngbanga ti so lo ke mba ti lo kozoni pepe.

⁷Ndani laa, mbi mu yanga na ala titene ala soro agbata ota so azo ayeke kpe daa ti bata tere ti ala.

⁸Tongana KOTA GBIA Nzapa ti ala asara si sese ti ala akono, alingbi na deba ti yanga so lo de lani na akotara ti ala nga na zendo so lo mu na ala,

⁹fade ala yeke kiri ti wara agbata ota ti zia na ndö ti agbata ota ti kozoni so. — Titene lo sara ye so, alingbi ala sara ye alingbi na atënë ti ndia so kue mbi yeke fa na ala laso, ala ye KOTA GBIA Nzapa ti ala, ala tambula lakue na lege so lo fa na ala. —

¹⁰Tongaso, zo so asara sioni ye pepe, fade a yeke tuku mene ti lo pepe na ya ti kodro so KOTA GBIA Nzapa ti ala amu ni titene aga ti ala. Tongaso pepe, fade ngbanga ti mene ti zo ni ayeke ga na li ti ala.

¹¹Me tongana mbeni zo ake mba ti lo, lo hara mba ti lo ni, lo gbu lo si lo pika lo na kuâ, na pekoni lo kpe, lo gue ti bata tere ti lo na ya ti mbeni gbata ni oko,

¹²fade *akangba ti gbata ti lo ayeke tokua azo ti gbu lo. Ala yeke zia lo na maboko ti zo ti hundango tënë ti mene ti wakuâ ni si zo ti hundango tënë ti mene ni ayeke fâ zo ti fango zo ni.

¹³Fade ala yeke baa mawa ti zo so pepe. Tongaso, fade ala yeke zi na sese ti Israel mene ti mbeni zo so asara sioni pepe si a fâ lo; tongaso ala yeke duti nzoni.

¹⁴Moïse atene: Ala azo ti Israel, na kodro so *KOTA GBIA Nzapa ti ala ayeke mu na ala titene aga ti ala, fade ala yeke wara asese. Atêne so azo so aga kozoni alu ti fa maka ti sese ti ala na ti azo so ayeke nduru na ala, alingbi ala zi ni ti pusu na dawa pepe.

¹⁵Moïse atene: Tongana mbeni zo asara sioni wala lo sara mbeni mara ti siokpari wa, tënë ti yanga ti zo oko alingbi pepe titene ala fâ ngbanga na li ti zo ni. Alingbi azo use wala ota abaa zo ni na sarango ye ni si tënë ni aduti taa-tënë.

¹⁶Tongana mbeni sioni zo alondo ti bi tënë na li ti mbeni zo senge senge atene, zo ni asara sioni ye,

¹⁷alingbi azo use so awara tënë na popo ti ala so ague na da ti KOTA GBIA. Ala yeke fa tënë ti ala ni na awayango-sandaga nga na awafango-ngbanga so ayeke sara kua na ndembe ni so.

¹⁸Awafango-ngbanga ayeke gi nda ti tënë ni mbirimbiri. Tongana ala baa so sioni zo ni atene mvene na le ti ngbanga, lo bi tënë senge senge na li ti ita ti lo,

¹⁹fade ala, azo ti Israel, ala yeke sara na zo ni gi ye so lo ye fade ti sara na ita ti lo so. Lege so ala yeke zi sioni ye na popo ti ala laa.

²⁰Fade tanga ti azo ayeke ma tënë ti ye so si mbeto ayeke gbu ala. Tongaso, fade ala yeke kiri ti sara sioni ye tongaso pepe na popo ti ala.

²¹Ala yeke baa mawa ti zo pepe: tongana lo fâ zo, alingbi a fâ nga lo; tongana lo koro le ti zo, alingbi a koro nga le ti lo; tongana lo fâ pembe ti zo, alingbi a fâ nga pembe ti lo; tongana lo kungbi maboko ti zo, alingbi a kungbi nga maboko ti lo; tongana lo kungbi gere ti zo, alingbi a kungbi nga gere ti lo.