Read sango Ndia ti fani use ni 20 Bible Online

Ndia ti fani use ni 20 - sango bible

Ndia ti fani use ni 20

¹Moïse atene: Ala azo ti Israel, tongana ala yeke gue ande ti tiri bira na awato ti ala, tongana ala baa ambarata, na apusu ti mbarata nga na gba ti aturugu so ahon ti ala, alingbi ala sara mbeto pepe. Biani, *KOTA GBIA Nzapa ti ala so asara si ala sigigi na Ezipte ayeke na ala.

²Na ndembe so ala ga nduru ti tiri bira, fade wayango-sandaga ayeke ga nduru na aturugu si lo tene ala,

³lo tene: “Aturugu ti Israel, ala ma! Laso, ala yeke gue ti tiri bira na awato ti ala. Ayeke nzoni ala luti tongana koli, ala sara mbeto pepe, li ti ala aga kirikiri pepe, tere ti ala ado na dawa ti awato ti ala ni pepe!

⁴Biani, KOTA GBIA Nzapa ti ala ayeke tambula legeoko na ala, lo yeke tiri bira na awato ti ala ndali ti ala ti sara si ala, azo ti Israel, ala so benda.”

⁵Na pekoni, fade akapita so kua ti ala ayeke ti mungo azo na kua ti turugu ayeke tene na aturugu ni, atene: “Na popo ti ala, zo wa laa asara fini da si lo de ti lango na ya ni pepe? Ayeke nzoni lo kiri na yanga-da. Tongaso pepe, tongana lo kui na yanga ti bira, fade mbeni zo nde ayeke lango na ya ti da ti lo ni.

⁶Zo wa laa afâ yaka ti *vinye si lo de ti fâ akozo le ni pepe? Ayeke nzoni lo kiri na yanga-da. Tongaso pepe, tongana lo kui na yanga ti bira, fade mbeni zo nde ayeke fâ akozo le ti vinye ti lo ni.

⁷Zo wa laa ahunda tënë ti mungo wali si ade lo na wali ni amu tere pepe? Ayeke nzoni lo kiri na yanga-da. Tongaso pepe, tongana lo kui na yanga ti bira, fade mbeni koli nde ayeke mu wali ni.”

⁸Fade akapita ayeke kiri ti tene na aturugu ni, atene: “Na popo ti ala, zo wa laa ayeke na mbeto si be ti lo awoko? Ayeke nzoni lo kiri na yanga-da si lo sara titene be ti a-ita ti lo awoko pepe tongana ti lo.”

⁹Tongana akapita ahunzi ti tene tënë na aturugu ni awe, fade ala yeke soro ambeni makonzi ti aturugu ti zia ala na li ti aturugu ni kue.

¹⁰Tongana ala ga nduru na mbeni gbata ti tiri bira na ni, fade ala yeke mu tënë ti siriri na azo ni.

¹¹Tongana azo ti gbata ni ayeda na tënë ti siriri ni, tongana ala zi ayanga ti gbata ni na ala, fade azo ti gbata ni kue ayeke ga azo ti sarango angangu kua na gbe ti ala, azo ti Israel.

¹²Me tongana azo ti gbata ni ake tënë ti siriri ni si ala londo ti tiri bira na ala, azo ti Israel, fade ala yeke ngoro gbata ni ti mu ni na bira.

¹³Fade KOTA GBIA Nzapa ti ala ayeke zia gbata ni na maboko ti ala si ala yeke fâ akoli ti gbata ni kue.

¹⁴Aye so ala yeke gbu na peko ti bira si ala yeke bata ni ayeke awali, amolenge, anyama na aye so kue ayeke na ya ti gbata ni. Aye ti awato ti ala so ala yeke mu ni, fade ala yeke te ni senge; KOTA GBIA Nzapa ti ala amu ni na ala awe.

¹⁵Ala yeke sara gi mara ti ye ni so na agbata so kue ayeke yongoro mingi, so ti tene agbata ti amara so ayeke pepe na ya ti kodro so ala yeke gue ti duti daa.

¹⁶Ti agbata ti amara so KOTA GBIA Nzapa ti ala ayeke mu ni na ala titene aga ti ala, ye so kue ayeke na fini, fade ala yeke zia ni pepe titene angba na fini.

¹⁷Ala yeke fâ azo ti mara ti Het, ti Amori, ti Kanaan, ti Perizi, ti Hivi na ti Yebus kue ti hunzi ala, alingbi na yanga so KOTA GBIA Nzapa ti ala amu na ala.

¹⁸Tongaso si amara ni so amanda na ala, azo ti Israel pepe, asioni sarango ye so amara ni ayeke sara ti mu ngia na anzapa ti ala. Tongaso pepe, fade ye ni ayeke sara si ala, azo ti Israel, ala sara siokpari ti ke KOTA GBIA Nzapa ti ala.

¹⁹Ala azo ti Israel, tongana ala ngoro mbeni gbata aninga titene ala tiri bira na ni, tongana ala tiri bira si ala mu gbata ni, ala yeke mu do pepe ti fâ na akeke so ayeke na tere ti gbata ni; so ti tene akeke so a yeke te ale ni tengo. Ala lingbi ti te ale ti akeke ni so, me ala yeke de ni na sese pepe, ngbanga ti so akeke ti ngonda ayeke zo pepe titene ala tiri bira na ni!

²⁰Me akeke so ala baa atene, ayeke le alengo ni so zo alingbi ti te ni pepe, ala lingbi ti fâ ni, wala ti de ni na sese senge. Ala lingbi ti mu ni ti sara na kua ti bira na ndembe so ala ngoro gbata so azo ti gbata ni ayeke sara bira na ala; ala yeke sara tongaso ngbii ala mu gbata ni.