Read sango Ndia ti fani use ni 21 Bible Online

Ndia ti fani use ni 21 - sango bible

Ndia ti fani use ni 21

¹Moïse atene: Tongana ala yeke na sese so *KOTA GBIA Nzapa ti ala amu na ala titene aga ti ala si mbeni lâ, a wara kuâ ti mbeni zo so alango na ya ti ngonda, me a hinga zo so afâ lo pepe,

²fade *akangba na awafango-ngbanga ti ala, azo ti Israel, ayeke gue ti haka popo ti ndo so kuâ ni ayeke daa nga na agbata so ayeke nduru, ti hinga yongo ni.

³A yeke baa gbata wa laa ayeke nduru mingi na ndo so kuâ ni ayeke daa. Akangba ti gbata ni so ayeke mu mbeni kete mama ti bagara so zo ade ti sara kua na lo laoko pepe, wala so lo de ti yo *zuge laoko pepe.

⁴Ala yeke gue na mama ti bagara ni nduru na tere ti ngu so ayeke sua lakue, na ndo so zo ade ti fâ yaka daa pepe, wala so zo ade ti lu ale ti kobe daa laoko pepe. Kâ, fade akangba ni ayeke kungbi go ti mama ti bagara ni.

⁵Fade awayango-sandaga, *ahale ti Lévi ayeke gue nduru. Biani, KOTA GBIA Nzapa ti ala asoro ala titene ala sara kua na lo, titene ala sara tufa na ndö ti azo na iri ti lo. Tongana tënë alondo na popo ti azo, wala tongana azo atiri si mbeni zo awara ka, ala laa ayeke fâ ya ti tënë ni.

⁶Fade akangba kue ti gbata ni, so ti tene ala so ayeke nduru na tere ti kuâ ni, ayeke sukula maboko ti ala na ndö ti kete mama ti bagara so a kungbi go ti lo so.

⁷Na pekoni, ala yeke tene: “E laa e fâ zo so pepe, e baa ye so asi so pepe.

⁸KOTA GBIA, mo zi tënë na li ti azo ti Israel, azo ti mo so mo zi ala na gbe ti ngba so; mo sara si ngbanga ti mene aga na li ti Israel pepe so ayeke azo ti mo, ndali ti zo so asara sioni ye pepe si a fâ lo so.” Tongaso fade KOTA GBIA ayeke zi tënë ni na li ti ala.

⁹Na lege so, fade ala yeke sara ye so ayeke mbirimbiri na le ti KOTA GBIA si ngbanga ti mene ti zo so asara sioni pepe aga na li ti ala pepe.

¹⁰Moïse atene: Mbeni ye tongaso alingbi ti si: ala azo ti Israel, ala gue ti tiri bira na awato ti ala, *KOTA GBIA azia awato ti ala ni na maboko ti ala si ala gbu azo ti ga azo ti kanga.

¹¹Mbeni zo na popo ti ala, azo ti Israel, abaa na popo ti azo ti kanga ni mbeni pendere wali, lo sara nzara ti wali ni si lo ye ti mu lo ti ga wali ti lo.

¹²Koli ni alingbi ti mu wali ni ti gue na lo na da ti lo. Fade wali ni ayeke kio kua ti li ti lo si lo yeke fâ anzënë ti maboko ti lo.

¹³Lo yeke zi bongo ti kanga ni na tere ti lo si lo yeke kiri na da ti koli ni. Lo yeke sara mua ti babâ na mama ti lo na ya ti nze oko. Na pekoni, koli ni ayeke bongbi na lo si lo yeke mu lo ti ga wali ti lo.

¹⁴Mbeni lâ, tongana wali ni akiri anzere na koli ni pepe, fade lo yeke zia lege na lo ti gue na ndo so be ti lo aye. Koli ni ayeke ka wali ni ndali ti nginza pepe, wala lo yeke kiri ti sara lo na ngbaa pepe na peko ti so lo gbu lo na ngangu si alango na lo.

¹⁵Moïse atene: Mbeni ye tongaso alingbi ti si: mbeni koli alingbi ti duti na awali use; lo ye mbeni wali ni, me lo ye mbeni pepe. Awali ni use kue adu na lo amolenge-koli, me kozo molenge ni ayeke ti wali so koli ni aye lo pepe so.

¹⁶Na lango ti kangbingo amosoro ti lo na popo ti amolenge ti lo ti koli, koli ni alingbi ti zi kozo ndo pepe na maboko ti molenge ti wali ti lo so lo ye lo pepe so ti mu na molenge ti wali ti lo so lo ye lo.

¹⁷Me alingbi koli ni ayeda, atene: kozo molenge-koli ni ayeke molenge ti wali so lo ye lo pepe so. Fade lo yeke mu aye so kue lo yeke na ni na kozo molenge ni fani use, ngbanga ti so lo yeke kozo molenge so lo ngba ngangu si lo du lo.

¹⁸Moïse atene: Mbeni ye tongaso alingbi ti si: mbeni zo alingbi ti duti na molenge-koli so ayeke zo ti ngangu li, lo yeke tomboka na tere ti babâ na mama ti lo; lo yeke ma yanga ti babâ na mama ti lo pepe. Ataa so ala pika lo, lo yeke ma ala pepe.

¹⁹Tongana ye ni ayeke tongaso, fade babâ na mama ni ayeke gbu molenge ni ti gue na lo na gbe ti ngbanga, na ndo ti *akangba ti gbata ni, na yanga ti gbagba ti gbata ti lo.

²⁰Fade ala yeke tene na akangba ni, atene: “Baa, so molenge ti e laa! Lo yeke molenge ti ngangu li, lo tomboka na tere ti e; lo yeke ma yanga ti e pepe. Lo yeke zo ti tengo ye ahon ndoni si lo yeke ngbaa ti samba.”

²¹Fade azo kue ti gbata ni ayeke bo lo na têne si lo kui. Lege so ala, azo ti Israel, ala yeke zi sioni ye na popo ti ala laa. Azo ti Israel kue ayeke ma tënë ni si mbeto agbu ala.

²²Moïse atene: Mbeni ye tongaso alingbi ti si: mbeni zo asara mbeni ye so ayeke sioni mingi so alingbi na kuâ. Tongaso a fâ lo si a kanga kuâ ti lo na ya ti keke.

²³Tongana ye ni ayeke tongaso, alingbi kuâ ti lo angba na ya ti keke ni na bi ngbii asi na ndaperere pepe. Alingbi ala lu kuâ ni gi na oko lango ni so, ngbanga ti so kuâ ti zo so a kanga ni na ya ti keke, ayeke sara si deba ti Nzapa aga na ndö ti azo. Fade ala yeke sara si kodro so KOTA GBIA Nzapa ti ala amu na ala aga *sioni pepe.