Read sango Ndia ti fani use ni 23 Bible Online

Ndia ti fani use ni 23 - sango bible

Ndia ti fani use ni 23

¹Alingbi zo alango na wali ti babâ ti lo pepe; so bingo buba na tere ti babâ ti lo laa.

²Moïse atene: Koli so azi ale ti korobo ti lo wala so a fâ tere ti lo ti koli, a zi ni, alingbi lo li na ya ti bongbi ti azo ti *KOTA GBIA pepe.

³Zo so babâ ti lo adu lo na mbeni wali nde, alingbi lo li na ya ti bongbi ti azo ti KOTA GBIA pepe. Ti londo na lo ngbii asi na molongo ti *ahale ti lo baleoko, alingbi zo oko ali na ya ti bongbi ti azo ti KOTA GBIA pepe.

⁴Fade azo ti mara ti Amon na ti Moab ayeke li laoko pepe na ya ti bongbi ti azo ti KOTA GBIA. Ti londo na ala ngbii asi na molongo ti ahale ti ala baleoko, fade zo oko ayeke li na ya ti bongbi ti azo ti KOTA GBIA pepe.

⁵Biani, na ndembe so ala, azo ti Israel, ala sigigi na sese ti Ezipte, azo ni so amu kobe na ngu ti ga ti yamba na ala na lege pepe; me ala mu nginza na Balaam, molenge ti Beor si lo londo na Petor, na sese ti Mezopotamii ti nduzu, lo ga ti deba ala.

⁶Me KOTA GBIA Nzapa ti ala ake ti ma Balaam. KOTA GBIA Nzapa ti ala asara si tënë ti dengo ba ni akiri aga tënë ti tufa na ndö ti ala, azo ti Israel, ngbanga ti so KOTA GBIA aye ala.

⁷Na ngoi so kue ala yeke ngba na fini, fade ala yeke gi maingo ti azo ti mara ni so oko pepe, ala yeke gi nzoni dutingo ti ala oko pepe.

⁸Fade ala, azo ti Israel, ala yeke baa azo ti mara ti Edom tongana asioni zo pepe, ngbanga ti so ala yeke a-ita ti ala. Ala yeke baa nga azo ti Ezipte tongana asioni zo pepe, ngbanga ti so ala yeke ando awande na kodro ti ala.

⁹Ahale ti amara use so a yeke du ala na ya ti kodro ni, fade ala lingbi ti li na ya ti bongbi ti azo ti KOTA GBIA senge, ti to ndani na molongo ota ti dungo ala.

¹⁰Moïse atene: Tongana ala gue ande ti tiri bira na awato ti ala, tongana ala sara bâbâ ti ala, fade ala yeke kpe ye so kue ayeke sara titene ala ga *sioni.

¹¹Na bi, tongana mbeni turugu oko aga *sioni ndali ti ngu ti tere ti lo ti koli so atuku, fade lo yeke sigigi na ya ti bâbâ ni; lo yeke kiri ti li na ya ni hio pepe.

¹²Na peko ti bekombite, lo yeke sukula ngu si na lakui, lo kiri ti li na ya ti bâbâ ni.

¹³Ala yeke leke mbeni ndo na peko ti bâbâ so fade ala yeke gue ti sara sarate daa.

¹⁴Fade turugu oko oko ayeke na mbeni kpoka na ya ti kungba ti lo. Tongana lo gue na ngonda, fade lo yeke zi du na kpoka ni. Na pekoni, lo yeke tuku sese na ni na ndö ti sarate so lo sara.

¹⁵Alingbi ya ti bâbâ ti ala aduti nde si aduti nzoni kue, ngbanga ti so *KOTA GBIA Nzapa ti ala ayeke fono na ya ni ti bata ala, ti sara si ala hon ndö ti awato ti ala na bira. Tongana KOTA GBIA abaa mbeni ye ti kamene, fade lo yeke ngba na tere ti ala pepe.

¹⁶Moïse atene: Tongana mbeni ngbaa akpe na ndo ti wa ti lo ti gue ti bata tere ti lo na ndo ti ala, azo ti Israel, alingbi ala kiri na lo na wa ti lo pepe.

¹⁷Fade lo yeke duti na popo ti ala, na ndo so be ti lo aye, na ya ti gbata so lo yeke soro ti duti daa. Fade ala yeke sara ngangu na lo pepe.

¹⁸Moïse atene: Alingbi mbeni wali wala mbeni koli ti Israel asara ye ti ndumba ndali ti anzapa nde pepe.

¹⁹Koli wala wali so ayeke sara ye ti ndumba, KOTA GBIA Nzapa ti ala, abaa lo tongana zo ti sioni mingi. Nilaa nginza so zo ni awara na lege ti sarango ye ti ndumba, ataa lo mu zendo na KOTA GBIA, alingbi ala yeda oko pepe titene zo tongaso aga na nginza ni na ya ti kota da ti KOTA GBIA Nzapa ti ala.

²⁰Moïse atene: Tongana ala sara boon na ita ti ala, zo ti Israel, ataa nginza, ataa kobe wala mbeni ye nde, alingbi ala hunda na lo ti zia mbeni ye na ndö ni si lo kiri na ni pepe.

²¹Ala lingbi ti hunda na wande ti zia mbeni ye na ndö ti ye so lo sara boon ni na maboko ti ala; me ala lingbi ti sara tongaso na ita ti ala, zo ti Israel pepe. Tongaso, na sese so ala yeke gue ti mu ni titene aga ti ala, fade *KOTA GBIA Nzapa ti ala ayeke sara tufa na ndö ti ala na ya ti akua ti ala kue.

²²Moïse atene: Tongana ala mu zendo ti sara mbeni ye na *KOTA GBIA Nzapa ti ala, alingbi ala ku pepe ti sara ni. Tongaso pepe, fade KOTA GBIA ayeke hunda tënë ni na ala; andaa ala sara siokpari awe laa.

²³Tongana ala mu zendo pepe, so siokpari laa pepe.

²⁴Me tongana mbeni tënë ti zendo asigigi na yanga ti ala, alingbi ala sara ye ti peko ni. Tënë so ala wani na be ti ala atene na KOTA GBIA Nzapa ti ala, alingbi ala sara kue ti sara ye alingbi na ni.

²⁵Moïse atene: Tongana ala hon na ya ti yaka ti *vinye ti mba ti ala, ala lingbi ti te ale ti vinye ni tongana ti so be ti ala aye, ngbii ya ti ala asi; me alingbi ala zia mbeni na ya ti sakpa ti gue na ni pepe.

²⁶Tongana ala hon na ya ti yaka ti *ble ti mba ti ala, ala lingbi ti fâ ambeni le ni na maboko ti ala; me ala lingbi ti mu nzenze ti fâ na ni pepe.