Read sango Ndia ti fani use ni 24 Bible Online

Ndia ti fani use ni 24 - sango bible

Ndia ti fani use ni 24

¹Moïse atene: Mbeni ye tongaso alingbi ti si: mbeni koli amu mbeni wali, me na pekoni wali ni akiri anzere na le ti lo pepe, ngbanga ti so lo baa na wali ni mbeni ye so lo ke tënë ni. Tongaso, koli ni ayeke su mbeti ti kangbingo tere, lo mu na wali ni; na pekoni, lo tumba wali ni na da ti lo.

²Na peko ti so wali ni alondo, lo gue, lo mu mbeni koli nde.

³Tongana use koli ni akiri aye wali ni pepe, lo su mbeti ti kangbingo tere, lo mu na wali ni si lo tumba lo na da ti lo; wala koli ni akui.

⁴Tongana ye tongaso asi, kozo koli so atumba lani wali ni so, lo lingbi ti kiri ti mu wali ni pepe, ngbanga ti so lo ga *sioni awe. Mara ti sarango ye tongaso ayeke sioni mingi na le ti *KOTA GBIA. Alingbi ala sara si siokpari aga pepe na ndö ti kodro so KOTA GBIA Nzapa ti ala amu na ala titene aga ti ala.

⁵Moïse atene: Tongana koli amu wali fini ni, lo lingbi ti gue na bira pepe; a yeke zia mbeni kungba na ndö ti go ti lo nga pepe. Lo yeke duti senge na da ti lo na ya ti ngu oko titene lo mu ngia na wali so lo mu.

⁶Moïse atene: Tongana mba ti mo amu yongo ti mo, mo lingbi ti mu mbeni ye ti lo ti bata ti ku titene lo futa yongo ti mo ni si; me mo lingbi ti mu atêne ti nikango na ale ti kobe ti lo pepe, ataa kota têne ni wala kete ni. Tongana mo sara tongaso, andaa fini ti mba ti mo ni laa mo mu so.

⁷Moïse atene: Tongana mbeni zo na popo ti ala anzi ita ti lo, zo ti Israel, lo sara zo ni na ngbaa, wala lo ka ita ti lo ni, zo ti nzi ni alingbi na kuâ. Lege so fade ala yeke zi sioni ye na popo ti ala laa.

⁸Moïse atene: Ala sara hange na akobela ti poro ti tere: alingbi ala sara kue ti bata aye so kue awayango-sandaga ti mara ti Lévi ayeke fa na ala. Ala sara ye alingbi na yanga so mbi mu na awayango-sandaga ni.

⁹Ala, azo ti Israel, ala dabe ti ala na ye so *KOTA GBIA Nzapa ti ala asara na Miriam na lege, na ndembe so ala sigigi lani na Ezipte.

¹⁰Moïse atene: Tongana mo mu mbeni ye ti mo na yongo na mba ti mo, alingbi mo li na da ti lo pepe ti mu mbeni ye ti lo ti bata ndali ti yongo ti mo ni.

¹¹Mo ngba na gigi; zo so yongo ti mo ayeke na li ti lo so, lo wani, lo yeke mu ye ni na mo na gigi titene mo gue, mo bata ni ndali ti yongo ti mo.

¹²Tongana zo ni ayeke wayere, mo gbanzi ye ti lo so lo mu na mo so ngbii asi na bi pepe.

¹³Na lakui, mo kiri ni na lo; tongaso, fade lo yeke yu kota bongo ti lo ti de ti lango na ni na bi si lo yeke sara tufa na ndö ti mo. Fade *KOTA GBIA Nzapa ti mo ayeke baa ye so mo sara so tongana ye ti mbirimbiri.

¹⁴Moïse atene: Alingbi ala sara ngangu pepe na wayere so ayeke sara kua ti nginza na ala si lo yeke zo ti mawa; ataa lo yeke ita ti ala, zo ti Israel, wala lo yeke wande so aduti na ya ti agbata ti ala, na sese ti ala.

¹⁵Gi na lango so lo sara kua na mo, mo futa lo; mo futa lo kozoni si ndo avuko, ngbanga ti so lo yeke wayere, be ti lo ayeke gi na ndö ti futa ni so. Tongana mo futa lo pepe si lo toto na iri ti mo na *KOTA GBIA, andaa siokpari ati na li ti mo awe.

¹⁶Moïse atene: Alingbi ti fâ ababâ na amama pepe ndali ti siokpari ti amolenge ti ala; alingbi nga ti fâ amolenge pepe ndali ti siokpari ti ababâ na amama ti ala; a yeke fâ zo oko oko ndali ti siokpari ti lo wani.

¹⁷Moïse atene: Ala buba ya ti ngbanga ti wande wala ti nyindu pepe. Ala gbu bongo ti wali-mua ti bata ni ndali ti yongo ti ala pepe.

¹⁸Ayeke nzoni ala dabe ti ala so ala yeke ando angbaa na sese ti Ezipte si *KOTA GBIA Nzapa ti ala azi ala na gbe ti ngbaa ni. Ndani laa, mbi mu yanga na ala ti sara ye alingbi na andia so.

¹⁹Tongana ala yeke fâ ale ti kobe si be ti ala agirisa na mbeni gba ni na le ti yaka, fade ala yeke kiri ti gue ti mu ni pepe. Ala yeke zia ni ndali ti awande, anyindu na awali-mua. Tongaso si fade KOTA GBIA Nzapa ti ala ayeke sara tufa na ndö ti ala na ya ti akua so kue ala yeke sara.

²⁰Legeoko nga, tongana ala yeke yingi akeke ti olive ti ala ti ko ale ni si be ti ala agirisa na ambeni le ni, fade ala kiri ti gue ti ko ni pepe. Ala yeke zia ni ndali ti awande, anyindu na awali-mua.

²¹Tongana ala yeke fâ ale ti *vinye ti ala, fade ala yeke kiri ti gue ti zi ambeni le ni so angba so pepe. Ala yeke zia ni ndali ti awande, anyindu na awali-mua.

²²Ayeke nzoni ala dabe ti ala so ala yeke ando angbaa na sese ti Ezipte. Ndani laa mbi mu yanga na ala ti sara ye alingbi na andia so.