Read sango Ndia ti fani use ni 27 Bible Online

Ndia ti fani use ni 27 - sango bible

Ndia ti fani use ni 27

¹Moïse na *akangba ti Israel amu yanga na azo ni, atene: “Fade ala yeke bata andia so kue mbi fa na ala laso.

²Na lango so ala yeke fâ ngu ti Jourdain ti li na sese so *KOTA GBIA Nzapa ti ala amu na ala, fade ala yeke mu angbongboro têne, ala zia ni aluti na nduzu si ala yeke zia mbamba na tere ni kue.

³Fade ala yeke su atënë ti ndia so kue na ndö ti atêne so. Tongaso si ala yeke hon ti li na *sese so ngu ti me ti bagara na mafuta ti wotoro asi singo daa; sese so KOTA GBIA, Nzapa ti akotara ti ala amu na ala alingbi na zendo so lo mu na ala.

⁴Tongana ala fâ ngu ti Jourdain awe, ala yeke leke atêne ni so aluti na nduzu na ndö ti hoto ti Ebal, alingbi na yanga so mbi mu na ala laso. Na pekoni, ala yeke zia mbamba na tere ni kue.

⁵Kâ, fade ala yeke sara gbalaka ndali ti KOTA GBIA Nzapa ti ala; ala yeke sara gbalaka ni na atêne so zo a de tere ni na wen laoko pepe.

⁶Ala yeke mu gi atêne so a de tere ni pepe ti sara na gbalaka ni ndali ti KOTA GBIA Nzapa ti ala. Na ndö ti gbalaka so, ala yeke ya *asandaga so a yeke gbi ni kue na wâ na KOTA GBIA Nzapa ti ala.

⁷Ala yeke ya nga asandaga ti beoko; ala yeke te kobe ni gi na ndo ni so si ala yeke sara ngia na le ti KOTA GBIA Nzapa ti ala.

⁸Ala yeke su atënë ti ndia so kue na ndö ti atêne ni; ala yeke de ni pendere titene gere ti ambeti ni asigigi polele.”

⁹Na pekoni, Moïse na awayango-sandaga so ayeke azo ti mara ti Lévi atene na azo ni, atene: “Ala, azo ti Israel, ala kai kpoo, ala ma tënë! Laso, *KOTA GBIA Nzapa ti ala asara si ala ga azo ti lo wani.

¹⁰Fade ala yeke ma yanga ti lo, ala yeke sara ye alingbi na atënë ti ndia ti lo nga na andia ti lo so mbi yeke fa na ala laso.”

¹¹Na oko lango ni so, Moïse amu yanga na azo ni, lo tene:

¹²“Tongana ala fâ ngu ti Jourdain awe, fade azo ti mara ti Siméon, ti Lévi, ti Juda, ti Isakar, ti Joseph na ti Benjamin ayeke luti na ndö ti hoto ti Garizim ti sara tufa na ndö ti azo ni.

¹³Me azo ti mara ti Ruben, ti Gad, ti Aser, ti Zabulon, ti Dan na ti Neftali ayeke luti na ndö ti hoto ti Ebal ti tene atënë ti dengo ba.

¹⁴“Fade azo ti mara ti Lévi ayeke tene tënë na kota go na azo ti Israel kue, atene:

¹⁵‘Deba aga na ndö ti zo so amu wen akporo ni si asara na mbeni nzapa nde wala na mbeni yanda si lo honde ni na mbeni ndo ti voro ni!. So ayeke ye so maboko ti zo asara. Tongaso, ayeke ye so ayeke sioni mingi na le ti *KOTA GBIA.’ Fade azo kue ayeke kiri tënë: ‘Amen!’

¹⁶‘Deba aga na ndö ti zo so abaa babâ na mama ti lo tongana ambumbuse zo!’ Fade azo kue ayeke kiri tënë, atene: ‘Amen!’

¹⁷‘Deba aga na ndö ti zo so apusu na dawa maka ti sese ti zo so ayeke nduru na lo!’ Fade azo kue ayeke kiri tënë, atene: ‘Amen!’

¹⁸‘Deba aga na ndö ti zo so afa lege nzoni pepe na waziba!’ Fade azo kue ayeke kiri tënë, atene: ‘Amen!’

¹⁹‘Deba aga na ndö ti zo so afâ ngbanga ti wande, ti nyindu na ti wali-mua na legeni pepe!’ Fade azo kue ayeke kiri tënë, atene: ‘Amen!’

²⁰‘Deba aga na ndö ti zo so alango na wali ti babâ ti lo; so bingo buba na tere ti babâ ti lo laa.’ Fade azo kue ayeke kiri tënë, atene: ‘Amen!’

²¹‘Deba aga na ndö ti zo so alango na mbeni nyama!’ Fade azo kue ayeke kiri tënë, atene: ‘Amen!’

²²‘Deba aga na ndö ti zo so alango na ita ti lo ti wali, ataa lo na ita ti lo ni ayeke babâ oko, wala ala yeke mama oko!’ Fade azo kue ayeke kiri tënë, atene: ‘Amen!’

²³‘Deba aga na ndö ti zo so alango na mama ti wali ti lo!’ Fade azo kue ayeke kiri tënë: ‘Amen!’

²⁴‘Deba aga na ndö ti zo so afâ mba ti lo na hondengo ni!’ Fade azo kue ayeke kiri tënë, atene: ‘Amen!’

²⁵‘Deba aga na ndö ti zo so a pete goro na lo titene lo fâ mbeni zo so asara sioni oko pepe!’ Fade azo kue ayeke kiri tënë, atene: ‘Amen!’

²⁶‘Deba aga na ndö ti zo so ayeke baa atënë ti ndia ti Nzapa tongana senge ye si lo yeke sara ye alingbi na ni pepe!’ Fade azo kue ayeke kiri tënë, atene: ‘Amen!’ ”