Read sango Ndia ti fani use ni 28 Bible Online

Ndia ti fani use ni 28 - sango bible

Ndia ti fani use ni 28

¹Moïse atene: Tongana ala ma yanga ti *KOTA GBIA Nzapa ti ala biani si ala sara ye alingbi na atënë ti ndia so kue mbi mu yanga na ala daa laso, fade KOTA GBIA Nzapa ti ala ayeke mu iri ti ala na nduzu ahon tanga ti amara ti sese so kue.

²Baa, tufa so ayeke ga na ndö ti ala si ayeke ga ye ti ala, ndali ti so ala ma yanga ti KOTA GBIA Nzapa ti ala laa:

³Fade lo yeke sara tufa na ndö ti azo so ayeke na ya ti agbata nga na azo so ayeke na ya ti ayaka.

⁴Fade lo yeke sara tufa si ala du amolenge mingi, akobe ti ayaka ti ala ayeke le gbani gbani; abagara, ataba na angasa ti ala ayeke du gbani gbani.

⁵Lo yeke sara tufa si asakpa ti ala asi singo na ale ti kobe, ata ti ala asi singo na kobe.

⁶Fade lo yeke sara tufa na ndö ti ala na ya ti aye so kue ala yeke sara na gigi ti ala.

⁷Tongana awato aga ti tiri bira na ala, KOTA GBIA ayeke sara si ala kinda awato ni. Tongana awato ni amu lege oko ti ga ti tiri bira na ala, fade awato ni ayeke mu alege nde nde ti kpe kirikiri na dawa ti ala, azo ti Israel.

⁸Fade KOTA GBIA ayeke bata aye so kue ala bongbi na ya ti agogoro ti ala; lo yeke sara si aye ti ala kue aga nzoni. Lo yeke sara tufa na ndö ti ala na ya ti kodro so lo yeke mu na ala.

⁹Tongana ala bata atënë ti ndia ti KOTA GBIA si ala sara ye alingbi na ni, fade lo yeke sara si ala ga azo ti lo so ayeke nde si ayeke nzoni kue, alingbi na zendo so lo mu na ala.

¹⁰Fade amara ti sese kue ayeke baa so a di iri ti KOTA GBIA na ndö ti ala, tongaso amara ni ayeke duti na mbeto ti ala, azo ti Israel.

¹¹Fade KOTA GBIA ayeke sara si ala du amolenge mingi; anyama ti ala adu gbani gbani, akobe ti ayaka ti ala ale gbani gbani.

¹²KOTA GBIA ayeke zi le ti nduzu, ndo so lo yeke bata ngu-Nzapa daa; lo yeke sara si ngu ni apika na ngoi ni na ndö ti sese ti ala, ti sara si aye so kue ala yeke sara aga nzoni. Fade ala yeke hunda yongo na maboko ti zo oko pepe; me ala laa ayeke mu yongo na gba ti azo ti amara nde.

¹³Titene KOTA GBIA asara ande si ala ga mara so ayeke na li ti amara kue si ala duti na ndangba ni pepe, titene ala duti lakue na ndö ti ambeni mara nde si ala duti laoko na gbeni pepe, ye so ala lingbi ti sara ayeke so: fade ala yeke ma atënë ti ndia ti KOTA GBIA Nzapa ti ala so mbi mu yanga daa na ala laso, ala yeke bata ni si ala yeke sara ye alingbi na ni;

¹⁴alege so mbi fa na ala, fade ala yeke zia ni ti hon mbage na mbage pepe, ala yeke mu peko ti ambeni nzapa nde pepe ti voro ala.

¹⁵Moïse atene: Me tongana ala ma yanga ti *KOTA GBIA Nzapa ti ala pepe, tongana ala sara kue ti sara ye alingbi na atënë ti ndia nga na andia ti lo so mbi yeke fa na ala laso pepe, baa asioni kpale so ayeke ga na ndö ti ala si ayeke ngba na ala ayeke so:

¹⁶Deba ayeke ga na ndö ti azo so ayeke na ya ti agbata nga na azo so ayeke na ya ti ayaka.

¹⁷Deba ayeke ga na ndö ti asakpa ti ale ti kobe ti ala nga na ndö ti ata ti kobe ti ala.

¹⁸Deba ayeke ga na ndö ti ala si ala yeke du amolenge mingi pepe, akobe ti ayaka ti ala ayeke le mingi pepe; abagara, ataba na angasa ti ala ayeke du mingi pepe.

¹⁹Deba ayeke ga na ndö ti ala na ya ti aye so kue ala yeke sara na gigi ti ala.

²⁰Ndali ti sioni so ala sara ti ke KOTA GBIA, fade lo yeke tokua na ndö ti ala dengo ba, kota mbeto nga na akpale na ya ti aye so kue ala yeke sara. Ala yeke ninga pepe ti kui si ala yeke hunzi kue.

²¹Lo yeke tokua sioni kobela ti bubango kodro na tere ti ala ngbii kobela ni afâ ala kue ahunzi ala na ndö ti sese so ala yeke gue ti mu ni titene aga ti ala.

²²Fade KOTA GBIA ayeke sara si ala nge ngengo na nduzu; lo yeke tokua kobela ti wâ, kobela ti sukungo tere; aye ayeke gbi tere ti ala. Lo yeke tokua sioni buru; akobela ayeke sara gere ti akobe ti ala na yaka si akobe ni ayeke fun si ahole. Asioni ye so ayeke si ngbii ala hunzi kue.

²³Le ti nduzu so ayeke na ndö ti li ti ala ayeke ga tongana bengba wen; sese so ayeke na gbe ti gere ti ala ayeke ga tongana wen.

²⁴KOTA GBIA ayeke tokua ngu-Nzapa pepe ti pika na ndö ti sese ti ala, me lo yeke tuku gi fuku ti sese na mbutu. Ti londo na le ti nduzu kâ, aye ni so ayeke tuku na ndö ti ala ngbii ala hunzi kue.

²⁵Fade KOTA GBIA ayeke sara si awato ti ala akinda ala na ya ti bira. Tongana ala, azo ti Israel, ala mu lege oko ti ga ti tiri bira na ala, fade ala yeke mu alege nde nde ti kpe kirikiri na dawa ti awato ni. Fade kota mbeto ayeke gbu akodro-gbia ti sese ni na bango aye so asi na ala, azo ti Israel.

²⁶Akuâ ti ala, azo ti Israel, ayeke ga kobe ti andeke ti nduzu na ti anyama ti sese; zo oko ti ga ti tumba anyama ni ayeke daa pepe.

²⁷KOTA GBIA ayeke tokua aka ti sanzo na tere ti ala, tongana ti so lo tokua ni lani na tere ti azo ti Ezipte; lo yeke tokua kobela ti sukungo tere na tere ti ala, koto-mo-lango, sarango tere nga na ambeni kobela nde nde so ayeke kai pepe.

²⁸KOTA GBIA ayeke sara si ala wara kobela ti gbogbolinda, ala ga awaziba si li ti ala atomboka.

²⁹Taa na bekombite, fade ala yeke tatara ndo tatarango tongana ti so awaziba ayeke tatara ndo. Aye so kue ala yeke sara ayeke ga nzoni oko pepe; lakue, azo ayeke sara gi ngangu na ala, azo ni ayeke nzi aye ti ala; zo oko ti ga ti soo ala ayeke daa pepe.

³⁰Zo so ahunda tënë ti mungo wali, mbeni koli nde laa ayeke lango na wali ni. Zo so asara da, lo yeke lango na ya ni pepe; zo so afâ yaka ti *vinye, ataa akozo le ti vinye ni, lo yeke ko ni pepe.

³¹A yeke fâ bagara ti ala taa na le ti ala, me ala yeke te nyama ni pepe. A yeke nzi lele ti ala taa na le ti ala, me ala yeke kiri ti wara lele ni pepe. A yeke mu ataba na angasa ti ala na awato ti ala, azo ti Israel; me zo oko ti soo ala ayeke daa pepe.

³²A yeke zia amolenge ti ala ti koli na ti wali na maboko ti amara nde. Ala, azo ti Israel, fade le ti ala ayeke ngba na lege ti ku kiringo ti amolenge ni, me ala yeke ku gbaa.

³³Mbeni mara so ala, azo ti Israel, ala hinga lo pepe, ayeke te akobe ti ayaka ti ala nga na aye so ala wara na lege ti kua ti ala. A yeke sara ngangu na ala lakue si a yeke nika ala.

³⁴Gi na bango aye so, fade ala yeke ga azo ti gbogbolinda.

³⁵Fade KOTA GBIA ayeke pika ala na asioni kobela ti ka ti sanzo so ayeke kai pepe. Aka ni ayeke gbu ala na likunu ti ala nga na ngbonda ti ala; na pekoni, ayeke mu tere ti ala kue, ti londo na gbe ti gere ti ala ngbii asi na li ti ala.

³⁶Fade KOTA GBIA ayeke sara si a gbu ala ti gue na ala na kodro wande, ala na gbia so ala yeke soro lo; a yeke gue na ala na ya ti mbeni kodro so ala wani ahinga ni pepe, ataa akotara ti ala nga ahinga ni ando pepe. Kâ, fade ala yeke voro ambeni nzapa nde so a sara ala na keke wala na têne.

³⁷Na ndo ti amara so kue KOTA GBIA ayeke gue na ala daa, fade li ti azo ni kue ayeke kpe ndali ti ye so asi na ala. Ala yeke ga mbeni ye ti *mato na ye so azo ayeke he na ngia.

³⁸Fade ala fâ yaka si ala lu ale ti kobe daa mingi, me ala yeke wara ale ti kobe ni gi kete, ngbanga ti so agbadola ate ni kue awe.

³⁹Ala yeke lu ayaka ti vinye, ala yeke leke tere ni nzoni, me ala yeke nyon vin ni pepe; ala yeke ko ale ti vinye ni nga pepe, ngbanga ti so asioni makongo ayeke te ni kue.

⁴⁰Akeke ti olive ayeke duti na ya ti sese ni kue, me ala yeke na mafuta pepe ti sara na tere ti ala, ngbanga ti so a-olive ni ayeke tuku kue kozo titene abe.

⁴¹Ala yeke du amolenge-koli na amolenge-wali, me amolenge ni ayeke ngba na tere ti ala pepe, ngbanga ti so a yeke gbu ala ti gue na ala na kodro wande.

⁴²Fade agbadola ayeke te akeke ti ala kue nga na akobe ti ayaka ti ala kue.

⁴³Awande so ayeke na popo ti ala ayeke gue guengo lakue na nduzu, me ti ala, azo ti Israel, ala yeke kiri kiringo na gbeni.

⁴⁴Awande laa ayeke mu na ala yongo, me ala, azo ti Israel, ala yeke na ye oko pepe ti mu na ala na yongo. Awande ni ayeke ga azo so ayeke na li ni si ala, azo ti Israel, ala yeke ga na ndangba ni.

⁴⁵Adengo ba so kue ayeke ga na ndö ti ala si ayeke ngba na tere ti ala ngbii ala hunzi kue, ngbanga ti so ala ke ti ma yanga ti KOTA GBIA Nzapa ti ala, ala ke ti bata atënë ti ndia ti lo nga na andia so lo mu na ala pepe.

⁴⁶Aye so ayeke ngba na ndö ti ala nga na *ahale ti ala tongana ye ti kpene na ye ti dongo be kpu na kpu.

⁴⁷Tongana ala sara ande na KOTA GBIA Nzapa ti ala na ngia nga na nzerengo be pepe na ndembe so ala yeke na ye gbani,

⁴⁸fade ala yeke ga angbaa ti awato so KOTA GBIA ayeke tokua ala na tere ti ala. Nzara ti kobe na nzara ti ngu ayeke sara ala; bongo ayeke na ala pepe, ye kue ayeke tia ala. KOTA GBIA ayeke zia na go ti ala *zuge ti wen, ngbii ala hunzi kue.

⁴⁹KOTA GBIA ayeke tokua na ndö ti ala mbeni mara so alondo na yongoro ndo, na nda ti sese; mbeni mara so ayeke huru ti ti na ndö ti ala tongana *ngoalo, mara so ala ma yanga ti kodro ti lo pepe.

⁵⁰Azo ti mara ni so, ngia ayeke na le ti ala ka pepe; ala yeke kpe ambakoro pepe, ala yeke baa mawa ti amolenge pepe.

⁵¹Azo ti mara ni so ayeke gbu anyama ti ala na akobe ti yaka ti ala. Ti ala, azo ti Israel, ala yeke kui na nzara. Azo ti mara ni ayeke zia mbeni ye oko na ala pepe, ataa *ble, ataa mafuta, ataa akete bagara ti ala, ataa akete taba ti ala, ataa akete ngasa ti ala. Azo ti mara ni ayeke sara tongaso ngbii ala hunzi kue.

⁵²Azo ni ayeke ngoro ala na bira na ya ti agbata kue ti kodro so KOTA GBIA Nzapa ti ala ayeke mu na ala. Azo ni ayeke tiri na ala ngbii ayongoro ngangu gbagba ti ala so ala zia be ti ala na ndö ni so akungbi na sese.

⁵³Na ndembe so awato ti ala ayeke ngoro ala na bira, awato ni ayeke sara ngangu na ala ahon ndoni, asara si ala yeke te amolenge ti ya ti ala wani; amolenge so KOTA GBIA Nzapa ti ala amu na ala.

⁵⁴Koli so na popo ti ala, lo woko mingi si lo yeke sara ngangu kua pepe, fade lo yeke baa ita ti lo na sioni le, legeoko na wali so ayeke lango na kate ti lo nga na tanga ti amolenge ti lo so ayeke ngba na lo.

⁵⁵Biani, fade koli ni ayeke ke ti mu na ita ti lo, wala na wali ti lo kasa ti mbeni molenge ti lo oko so fade lo yeke te, ngbanga ti so mbeni kobe nde ti tengo ni ayeke daa pepe na ndembe so awato ti ala ayeke ngoro agbata ti ala na bira si ala yeke sara ngangu na ala ahon ndoni.

⁵⁶Wali so na popo ti ala, maboko ti lo ayeke ndu ye oko pepe si lo yeke *wali-ndomo, wali so gbe ti gere ti lo alingbi ti ndu sese pepe, ngbanga ti so maboko ti lo ayeke ndu ye oko pepe si lo yeke wali-ndomo, fade lo nga, lo yeke baa koli so ayeke lango na kate ti lo na sioni le, legeoko na molenge ti lo ti koli na ti wali;

⁵⁷ataa amolenge so wali ni adu ala fini fini nga na bobo so asigigi na ya ti wali ni, lo yeke te ni. Biani, ndali ti so ye kue ayeke tia lo na ndembe so awato ti ala ayeke ngoro agbata ti ala na bira si awato ni ayeke sara ngangu na ala ahon ndoni, fade wali ni ayeke te amolenge ti lo na hondengo ni.

⁵⁸Atënë ti ndia ti Nzapa so kue a su na ya ti buku so, alingbi ala sara kue ti sara ye alingbi na ni. Alingbi ala ne iri ti lo so alingbi na gonda, iri so ayeke mu mbeto na zo: “KOTA GBIA Nzapa ti ala”.

⁵⁹Tongaso pepe, fade KOTA GBIA ayeke tokua na tere ti ala, ala na *ahale ti ala amara ti aka nde nde nga na mara ti angangu kobela nde nde so ayeke hunzi pepe.

⁶⁰Lo yeke tokua na tere ti ala asioni kobela kue ti kodro ti Ezipte so ala sara ando mbeto ni mingi so; akobela ni ayeke ngba na tere ti ala.

⁶¹Ataa akobela so kue nga na aka so kue a su tënë ni na ya ti mbeti ti *Ndia so pepe, fade KOTA GBIA ayeke tokua ni na tere ti ala ngbii ala hunzi kue.

⁶²So lani ala, azo ti Israel, ala wu tongana atongoro ti le ti nduzu so, fade wungo ti ala ayeke ngba gi kete, ngbanga ti so ala ke fade ti ma yanga ti KOTA GBIA Nzapa ti ala.

⁶³Tongana ti so be ti KOTA GBIA anzere ando ti sara nzoni na ala, ti sara si ala wu mingi, fade be ti lo ayeke nzere nga ti sara titene ala kui si ala hunzi kue. Lo yeke zi ala na sese so ala yeke gue ti mu ni titene aga ti ala.

⁶⁴Fade KOTA GBIA ayeke kangbi ala na popo ti amara kue, ti londo na mbeni nda ti sese ti si na mbeni nda ni. Kâ, ala yeke voro ambeni nzapa so ala wani ahinga ala pepe, akotara ti ala nga ahinga ala pepe; a sara anzapa ni so na keke wala na têne.

⁶⁵Na popo ti amara ni so, ala yeke duti kpoo pepe, ala yeke wara ndo oko pepe ti zia gere ti ala daa. Kâ, KOTA GBIA ayeke sara titene be ti ala angba gi na nduzu, le ti ala ayeke vuko gi vukongo, be ti ala ayeke woko kue.

⁶⁶Ala yeke baa atene, gigi ti ala ahunzi awe, mbeto ayeke sara ala bi na lâ si mbeni ye ti zia be ti ala daa ndali ti gigi ti ala ti kekereke ayeke daa pepe.

⁶⁷Tongana ala baa ande aye so ayeke si, fade be ti ala ayeke do na kota mbeto. Na ndaperere, ala yeke tene: “Ae, tongana lakui fade si!” Na lakui, ala yeke tene: “Ae, tongana ndo ahan fade, ka ayeke nzoni!”

⁶⁸KOTA GBIA ayeke kiri na ala na Ezipte na ya ti amangboko; lo yeke kiri na ala na ya ti kodro so mbi tene tënë ni lani na ala, mbi tene: “Fade ala yeke kiri ti baa kodro ni pepe.” Kâ, ala wani ayeke ka tere ti ala tongana angbaa na awato ti ala; me awato ti ala ni ayeke ke ti vo ala.

⁶⁹Lege so Moïse asara *mbuki na azo ti Israel na iri ti *KOTA GBIA, alingbi na yanga so KOTA GBIA amu ni na sese ti Moab laa. — Mbuki so aga na ndö ti mbuki so KOTA GBIA na azo ti Israel asara lani na hoto ti Horeb.