Read sango Ndia ti fani use ni 29 Bible Online

Ndia ti fani use ni 29 - sango bible

Ndia ti fani use ni 29

¹Moïse abongbi azo ti Israel kue si lo tene na ala: Ala wani abaa na le ti ala aye so kue *KOTA GBIA asara na gbia Faraon, na azo ti gbe ti lo nga na kodro ti lo kue.

²Ala baa akota pasi so lo tokua na ndö ti ala, aye ti kpene na akota ye ti dongo be so lo sara.

³Me ngbene ye ngbii asi laso, KOTA GBIA ade ti mu na ala hingango ndo pepe ti ma ya ti aye so asi. Lo de ti mu na ala le pepe ti baa na ndo; lo de nga ti mu na ala mê pepe ti ma na ndo.

⁴Na ya ti ngu baleosio, KOTA GBIA atambula na ala na ya ti benyama. Bongo ti ala na poro ti ala aga gbagba ni pepe.

⁵Kobe ti ala ti tengo ni ayeke lani mapa pepe, ngu ti ala ti nyongo ni ayeke vin wala angangu samba pepe. Aye so kue asi titene ala hinga atene, lo yeke KOTA GBIA Nzapa ti ala.

⁶Na pekoni, e si na ndo so. Sihon, gbia ti Heshebon, na Og, gbia ti Bashan aga ti tiri bira na e; me e kinda ala na ya ti bira ni.

⁷E mu sese ti ala na maboko ti ala, e mu ni na azo ti mara ti Ruben, ti Gad nga na ndambo ti mara ti Manase titene aga ti ala.

⁸Ndani laa, alingbi ala bata atënë ti *mbuki so Nzapa asara ni na ala. Tongaso si aye so kue ala yeke sara, ayeke ga nzoni.

⁹Moïse atene: Ala, azo ti Israel, ala laa aluti laso na le ti *KOTA GBIA Nzapa ti ala so. Azo kue ayeke na ndo so: azo so ayeke na li ti amara ti ala na amakonzi ti ala, *akangba ti ala na azo so ayeke baa ndo na ndö ti akua ti ala,

¹⁰awali ti ala na amolenge ti ala, ataa awande so aduti na popo ti ala na ya ti bâbâ si kua ti ala ayeke ti de keke wala ti to ngu na ala, azo ti Israel.

¹¹Fadeso KOTA GBIA Nzapa ti ala asara *mbuki na ala; alingbi ala yeda biani na tënë ti mbuki so lo deba yanga ti lo daa so.

¹²Tongaso si ala ga azo ti lo laso si lo ga Nzapa ti ala alingbi na zendo so lo mu na ala nga na dengo ba ti yanga ti lo so lo de na akotara ti ala Abraham, Isaac na Jacob.

¹³Mbuki so mbi hunda na ala ti yeda na ni na lege ti dengo ba ti yanga ti ala so ayeke gi ndali ti ala oko pepe;

¹⁴ayeke nga ndali ti azo so kue ayeke luti laso na ndo so na le ti KOTA GBIA Nzapa ti e; ayeke nga ndali ti azo so ayeke na popo ti e laso pepe.

¹⁵Ala, azo ti Israel, ala hinga lege so e duti na ni na sese ti Ezipte; nga na lege so e hon na popo ti amara nde so e fâ ya ti sese ti ala ti hon.

¹⁶Ala baa afungo nzapa so azo ni ayeke voro ni: ayanda so a sara na keke, na têne, na wen ti nginza nga na lôro!

¹⁷Ayeke nzoni mbeni zo oko na popo ti ala, ataa koli, ataa wali, ataa mbeni kete mara wala mbeni mara azia peko ti KOTA GBIA Nzapa ti e pepe ti voro anzapa ti amara ni so. Alingbi mbeni zo oko na popo ti ala aga tongana pere so ayeke du mbeni sioni yoro ti fango zo pepe.

¹⁸Tongana mbeni zo ama atënë ti dengo ba so si lo wara nzerengo tere na be ti lo kâ, lo tene: “Fade aye ti mbi kue ayeke ga nzoni, ataa so mbi ngba ti sara ngangu li si mbi yeke sara aye so be ti mbi aye.” Biani, sese so anyon ngu alingbi na lo ayeke kiri ti hunda ngu pepe.

¹⁹Fade KOTA GBIA ayeke zi tënë ni na li ti lo pepe. Ngonzo na mbanda ti KOTA GBIA ayeke londo tongana menga ti wâ na tere ti zo ni. Adengo ba so kue a su tënë ni na ya ti mbeti so, lo yeke sara titene ati na ndö ti zo ni; lo yeke zi iri ti zo ni na ndö ti sese.

²⁰KOTA GBIA ayeke zia lo yamba na popo ti amara ti Israel kue titene a buba lo biani biani, alingbi na adengo ba ti mbuki so a su tënë ni na ya ti mbeti ti *Ndia so.

²¹Moïse atene: Azo so a du ala na peko ti ala, so ti tene amolenge ti ala nga na awande so alondo na mbeni kodro yongoro si aga, tongana ala baa aka nde nde nga na akobela nde nde so *KOTA GBIA ayeke tokua ni na tere ti ala, azo ti Israel, fade azo ni ayeke tene:

²²“*Sufre, wâ na ingo agbi kodro so kue awe! Zo alingbi ti fâ yaka daa pepe, kobe alingbi ti ko daa pepe. Pere oko ayeke mai daa pepe. Ye ni ayeke tongana ti Sodome na Gomore, ti Adma na Seboim, agbata so KOTA GBIA abuba ni lani na lege ti ngonzo ti lo nga na ngonzo ti lo ti wâ.”

²³Fade amara kue ayeke hunda ndo, atene: “Ngbanga ti nyen si KOTA GBIA asara ye na kodro so tongaso? Ngbanga ti nyen si kota ngonzo ti lo alondo tongaso?”

²⁴Fade a yeke kiri tënë: “Ye ni asi, ngbanga ti so azo ni abuba lege ti *mbuki so KOTA GBIA, Nzapa ti akotara ti ala asara na ala na ndembe so KOTA GBIA asara si ala sigigi na sese ti Ezipte.

²⁵Ala gue ti voro ambeni nzapa nde, ala kuku na gbe ti ala. Andaa ala hinga anzapa ni so kozoni pepe; KOTA GBIA amu yanga na ala pepe ti voro anzapa ni so.

²⁶Ndani laa ngonzo ti KOTA GBIA alondo na tere ti kodro ni tongana wâ si lo sara titene adeba so kue a su tënë ni na ya ti mbeti so aga na ndö ti kodro ni.

²⁷Na ya ti ngonzo ti lo, sioni ngonzo ti lo, sioni ngonzo ti lo ti wâ, KOTA GBIA agboto azo ti lo na sese ti ala si lo tumba ala na ya ti mbeni kodro nde, ndo so ala ngba daa ngbii asi laso.”

²⁸Aye so angba na hondengo ni ayeke ti KOTA GBIA Nzapa ti e. Me aye so a sigigi na nda ni ayeke ti e na *ahale ti e kpu na kpu. Tongaso, alingbi e sara ye alingbi na atënë ti ndia so kue.