Read sango Ndia ti fani use ni 31 Bible Online

Ndia ti fani use ni 31 - sango bible

Ndia ti fani use ni 31

¹Moïse akiri atene na azo ti Israel kue, atene:

²“Fadeso mbi yeke na ngu ngbangbo oko na baleuse; mbi yeke na ngangu mbeni pepe ti fa lege na ala. *KOTA GBIA atene na mbi: ‘Mo yeke fâ ngu ti Jourdain so pepe.’

³KOTA GBIA Nzapa ti ala wani laa ayeke mu li ti tambula ni na ala. Lo yeke fâ amara so alango na mbage ti ngu ni kâ ti hunzi ala, tongaso si ala, azo ti Israel, ala yeke wara lege ti mu sese ti amara ni so. Josué nga ayeke mu li ti tambula ni na ala tongana ti so KOTA GBIA atene.

⁴KOTA GBIA ayeke fâ amara ni so kue tongana ti so lo fâ ando Sihon na Og, agbia ti azo ti mara ti Amori, nga na kodro ti ala.

⁵KOTA GBIA ayeke zia amara ni na maboko ti ala, azo ti Israel si ala yeke sara ye na ala alingbi gi na yanga so mbi mu na ala.

⁶Ala gbu ngangu, ala sara ye ti koli, ala sara mbeto pepe, ala do na mbeto na dawa ti amara ni so pepe, ngbanga ti so KOTA GBIA Nzapa ti ala laa ayeke tambula na ala. Fade lo yeke do ala ti zia ala pepe, lo yeke zia ala oko pepe.”

⁷Na pekoni, Moïse airi Josué si atene na lo na le ti azo ti Israel kue, atene: “Mo gbu ngangu, mo sara ye ti koli, ngbanga ti so mo laa mo yeke mu azo so ti li na ala na sese so KOTA GBIA adeba yanga ti lo ando ti mu na akotara ti ala titene aga ti ala.

⁸KOTA GBIA wani laa ayeke mu li ti tambula ni na mo, lo wani lo yeke na mo. Lo yeke do mo ti zia mo pepe, lo yeke zia mo oko pepe. Tongaso, alingbi mo sara mbeto pepe, mo sara si be ti mo awoko pepe.”

⁹Moïse asu *Ndia ti Nzapa so na mbeti si lo mu ni na awayango-sandaga, *ahale ti Lévi so kua ti ala ayeke ti yo sanduku ti *mbuki ti *KOTA GBIA; lo mu ni nga na *akangba kue ti Israel.

¹⁰Moïse amu yanga so na ala, atene: “Lakue na peko ti ngu mbarambara, na ngu so azo ayeke zi yongo na li ti amba ti ala, na lango ti matanga ti Akpangba,

¹¹fade ala yeke diko Ndia so na azo ti Israel kue titene ala ma ni. Ala yeke diko ni na azo ti Israel so kue ayeke ga ti luti na dawa ti KOTA GBIA Nzapa ti ala, na ndo so lo yeke soro.

¹²Fade azo kue ayeke bongbi tere ti ala, akoli, awali, amolenge na awande so asara kodro na ndo ti ala, azo ti Israel, titene ala ma atënë ti Ndia so a yeke diko ni so. Tongaso si ala yeke manda ti kpe mbeto ti KOTA GBIA Nzapa ti ala si ala sara ye alingbi na atënë kue ti Ndia so.

¹³Amolenge ti ala so ade ti hinga Ndia ni pepe, fade ala nga ayeke ma ni si ala yeke manda ti kpe mbeto ti KOTA GBIA Nzapa ti ala na ngoi so kue ala yeke ngba na fini na ya ti kodro so ala yeke fâ ngu ti Jourdain ti gue ti mu ni titene aga ti ala.”

¹⁴*KOTA GBIA atene na Moïse: “Lango ti kuâ ti mo aga nduru awe. Mo iri Josué; mo na lo ague na ya ti da ti bongo so mbi na azo ti mbi, e yeke wara tere daa. Kâ, fade mbi yeke mu yanga na lo.” Tongaso, Moïse na Josué ague na ya ti da ti bongo so KOTA GBIA na azo ti lo ayeke wara tere daa.

¹⁵KOTA GBIA asi na ala na ya ti ngbongboro mbinda so aga aluti na yanga ti da ti bongo ni.

¹⁶KOTA GBIA atene na Moïse: “Mo ga nduru ti gue na peko ti ababâ ti mo so akui so awe. Na peko ti mo, fade azo so ayeke to nda ti kpe na peko ti anzapa ti awande ti voro ala, anzapa ti kodro so ala, azo ti Israel, ala yeke li daa. Fade azo so ayeke ke mbi si ala yeke buba ya ti *mbuki so mbi na ala e sara ni.

¹⁷Ndani laa, fade ngonzo ti mbi ayeke londo na tere ti ala tongana wâ na lango ni so. Mbi yeke zia ala, mbi yeke honde le ti mbi na ala. Tongaso, fade amara nde ayeke te ala kue, akpale mingi na aye ti ngangu mingi ayeke si na ala, azo ti Israel si ala yeke tene: ‘Akpale so kue asi na e, ngbanga ti so Nzapa ti e ayeke na popo ti e mbeni pepe!’

¹⁸Me ti mbi, na lango ni so, mbi yeke ngba ti honde le ti mbi na ala ndali ti asioni ye so kue ala yeke sara ande na mungo peko ti anzapa nde.

¹⁹Fadeso, Moïse mo na Josué, ala su bia so na mbeti. Ti mo Moïse, mo fa bia ni na azo ti Israel; mo sara kue titene ala manda ni, bia ni angba na yanga ti ala si aga bia so ayeke fa asioni ti ala na le ti ala.

²⁰Biani, mbi yeke sara titene azo so ali na *sese so ngu ti me ti bagara na mafuta ti wotoro asi singo daa; sese so mbi deba yanga ti mbi ando ti mu na akotara ti ala. Fade ala yeke te kobe alingbi na ala si ala yeke kono mingi; na pekoni, ala yeke kiri na mbage ti anzapa nde, ala yeke voro ala. Ala yeke baa mbi tongana senge ye na le ti ala, ala yeke buba ya ti mbuki ti mbi na ala.

²¹Tongana akpale na aye ti ngangu asi ande na ala, fade bia so ayeke ga mbeni ye ti bi tënë na li ti ala. Ataa *ahale ti ala ayeke girisa bia so pepe. Biani, gi laso laso, mbi hinga ye so ala leke na be ti ala ti sarango ni kozo si mbi sara titene ala li na ya ti kodro so mbi deba yanga ti mbi ti mu na ala.”

²²Na lango ni so, Moïse asu bia ni so na mbeti si lo fa ni na azo ti Israel.

²³Na pekoni KOTA GBIA amu tënë ti yanga ti lo na Josué, molenge ti Nune, atene: “Gbu ngangu, mo sara ye ti koli, ngbanga ti so mo laa mo yeke sara ande si azo ti Israel ali na kodro so mbi deba yanga ti mbi ti mu na ala; fade mbi yeke na mo.”

²⁴Moïse asu na ya ti buku atënë kue ti Ndia ti Nzapa, ti londo na li ni ngbii ti si na ndani.

²⁵Na pekoni, lo mu yanga na azo ti mara ti Lévi so kua ti ala ayeke ti yo sanduku ti mbuki ti KOTA GBIA, lo tene:

²⁶“Ala mu buku ti Ndia so, ala zia ni na tere ti sanduku ti mbuki ti KOTA GBIA Nzapa ti ala. Buku ni ayeke ngba na ndo so tongana mbeni ye so ayeke fa asioni ti azo ti Israel na le ti ala.

²⁷Biani, mbi hinga azo ti Israel kue: be ti ala akpengba mingi, ala yeke azo ti ngangu li. Laso, mbi de na fini na popo ti ala. Me ataa so kue, ala yeke tomboka na tere ti KOTA GBIA! Na peko ti kuâ ti mbi, fade ye ni ayeke ga ande tongana nyen?

²⁸Fadeso ala bongbi na tere ti mbi *akangba kue nga na amakonzi ti amara ti ala. Fade mbi yeke bi tënë so na mê ti ala, yayu na sese ayeke ma tënë so mbi tene.

²⁹Biani, mbi hinga, mbi tene, na peko ti kuâ ti mbi, fade azo ti Israel ayeke ti na ya ti siokpari, ala yeke zia lege so mbi fa na ala. Gbanda, fade ye ti vundu ayeke si na ala ndali ti asioni ye so kue ala yeke sara ti so be ti KOTA GBIA nga na aye so be ti lo ake ni.”

³⁰Na pekoni, Moïse adiko na azo ti Israel so kue abongbi, atënë kue ti ya ti bia so, ti londo na li ni asi na ndani; atënë ni ayeke tongaso: