Read sango Ndia ti fani use ni 32 Bible Online

Ndia ti fani use ni 32 - sango bible

Ndia ti fani use ni 32

¹“Yayu, mo dingi mê ti mo, fade mbi yeke tene tënë! Sese, mo ma atënë so mbi yeke tene!

²Ayeke nzoni atënë so mbi yeke fa asua tongana ngu-Nzapa, ayeke nzoni atënë ti mbi ni atuku tongana ngu ti pere na ndö ti pere.

³Biani, fade mbi yeke to mbela na iri ti *KOTA GBIA. Ala, azo ti Israel, ala sepela kota ti Nzapa ti e!

⁴Nzapa ayeke Kota Têne ti batango e. Aye so kue lo sara ayeke nzoni kue, lege ti sarango aye ti lo kue ayeke mbirimbiri. Lo yeke Nzapa so ayeke sara ye alingbi na tënë ti yanga ti lo, lo yeke sara ye ti kirikiri pepe, lo yeke lakue mbirimbiri, lo yeke fâ ngbanga na legeni.

⁵Me ala, ala yeke azo ti sioni mingi, ala sara sioni ti ke KOTA GBIA. Ndali ti sioni ti ala, ala kpa ti duti amolenge ti lo pepe, ala yeke azo ti ngoi ti fadeso so ayeke azo ti kirikiri, azo ti handango amba ti ala!

⁶Ala azo so li ti ala ayeke daa pepe so, ala azo so ndara atia ala so, so lege ti sarango ye na KOTA GBIA laa? Lo laa lo yeke babâ ti ala pepe? Ndali ti lo laa ala baa gigi pepe? Lo laa lo sara ala pepe? Ndali ti lo laa ala kpengba so pepe?

⁷Ala dabe ti ala na ngoi ti giriri, ala gbu li ti ala na ndö ti angu so ahon awe so, ngu na ngu. Ala hunda tënë na ababâ ti ala nga na ambakoro, fade azo ni ayeke tene na ala peko ti aye so asi ando so.

⁸Na ngoi so Nzapa so ayeke na yayu kâ na ndö ti aye kue amu sese na amara titene aga ti ala, na ngoi so lo kangbi popo ti azo ti ndö ti sese, lo fa katikati ti sese ti amara na lege ti wungo ti azo ti Israel.

⁹Me azo ti Israel ayeke azo so aga ti KOTA GBIA, *ahale ti Jacob aga ye ti lo.

¹⁰KOTA GBIA awara azo ti Israel na benyama, na ndo so zo ayeke daa pepe, na ndo so a yeke ma gi toto ti *anzagua daa. Lo gbu ala na kate ti lo, lo bata ala nzoni, lo bata ala tongana mboma ti le ti lo.

¹¹KOTA GBIA ayeke tongana *ngoalo so ayeke huru na ndö ti da ti lo, lo yeke iri akete molenge ti lo ti huru nga. Lo yeke zi ya ti *akpangi ti lo, lo yo ala na ndö ti kpangi ti lo.

¹²Biani, Nzapa oko laa afa lege na azo ti lo, mbeni nzapa nde ayeke na tere ti lo pepe.

¹³Lo zia ala ti duti na sese ti ahoto, lo bata ala na akobe ti yaka. Lo sara si ala nyon mafuta ti wotoro so asigigi na ya ti du ti têne, lo sara si akeke ti olive asigigi na ya ti sese so atêne ayeke daa mingi.

¹⁴Lo sara si ala nyon ngu ti me ti abagara na ti ataba; ala te kasa ti mafuta ti akete taba, ti akoli-taba ti sese ti Bashan na ti akoli-ngasa, ala te pendere *ble, ala nyon vin so abe tongana mene si aso mingi.

¹⁵Tongaso Yeshurun ate kobe ti mafuta mingi, lo te kobe, ya ti lo asi, lo te kobe ti mafuta mingi, lo kono pendere, lo yeke na mafuta mingi. Na pekoni, lo zia Nzapa so asara lo, lo baa Kota Têne ti songo lo na kuâ tongana buba ye.

¹⁶Azo ti Israel azia ngonzo na be ti KOTA GBIA na lege ti sarango aye so ayeke sioni mingi, ala sara si mbanda ti lo alondo na lege ti vorongo anzapa nde.

¹⁷Ala yeke ya *asandaga na asioni yingo so ayeke nga Nzapa pepe, ala hinga anzapa ni so pepe. Ala yeke afini nzapa so akotara ti ala ahinga ala laoko pepe.

¹⁸Azo ti Israel, Kota Têne ti batango ala, lo so lo du ala, ala baa lo tongana senge ye; Nzapa so asara si ala baa gigi, be ti ala agirisa na lo awe!

¹⁹So KOTA GBIA abaa lege so amolenge ti lo ti koli na ti wali ayeke he lo, be ti lo aso.

²⁰Tongaso lo tene: ‘Zo alingbi ti zia be ti lo na ndö ti ala pepe! Ala yeke azo ti sioni mingi. Mbi yeke honde le ti mbi na ala, mbi yeke ku ti baa ye so ayeke si na ala gbanda.

²¹Ala sara si mbanda ti mbi alondo na lege ti vorongo anzapa so ayeke taa Nzapa pepe; ala zia ngonzo na be ti mbi na lege ti ayanda ti ala. Mbi nga, mbi yeke sara si mbanda ti ala alondo na lege ti ye so ayeke taa mara pepe, mbi yeke zia ngonzo na be ti ala na lege ti mbeni mara so ahinga ndo pepe.

²²Biani, ngonzo ti mbi alondo tongana wâ, agbi ndo ngbii asi na ndo ti akuâ. Ngonzo ni abuba sese na aye so sese adu, agbi gere ti ahoto.

²³Fade mbi yeke zia akpale na ndö ti ala, na ndö ti tere, na ndö ti tere; mbi yeke tokua ale ti kokora ti mbi kue na tere ti ala.

²⁴Tongana ala woko kue na nzara awe, tongana kobela ti wâ ahon ndö ti ala si akobela ti bubango kodro ahon ndö ti ala awe, mbi yeke tokua asioni nyama nga na asioni ngbo na tere ti ala.

²⁵Na ndö ti alege, amolenge ti ala ayeke kui kuâ ti yongoro zeme, na ya ti da, azo ayeke kui na mbeto. Azo kue ayeke kui, ataa amaseka-koli na amaseka-wali, ataa amolenge so angba ti nyon me na ambakoro.’

²⁶Mbi tene: ‘Mbi leke na be ti mbi ti fâ ala kue ti hunzi ala, mbi ye titene zo akiri adabe ti lo na mara ti ala pepe na ndö ti sese so.

²⁷Me mbi sara mbeto titene awato ti ala ahe ala; mbi sara mbeto titene azo ti kengo ala ahanda tere ti ala pepe, atene: ngangu ti maboko ti e laa asara ye so, KOTA GBIA laa asara ni pepe!

²⁸Biani, ala yeke mara so apialo ti ala ayeke li ngu; ala hinga ndo oko pepe.

²⁹Tongana ala yeke fade azo ti ndara, ka ala hinga nda ti ye so, ka ala ku ti baa ye so ayeke si na ala gbanda.

³⁰Wato oko senge alingbi ti tumba peko ti aturugu ti Israel saki oko? Awato use senge alingbi ti sara si azo ti Israel saki baleoko akpe? Biani, mbi KOTA GBIA so mbi yeke Kota Têne ti batango ala, mbi zia ala na maboko ti awato ti ala ni awe.

³¹Me awato ti ala wani ahinga atene, nzapa ti batango ala alingbi na Nzapa ti e pepe.

³²Ti awato ni, ala yeke nzoni ala hon azo ti Gomore na ti Sodome pepe, ala kpa keke ti *vinye so ayeke le ale ti vinye so asee sengo si sioni yoro ti fango zo ayeke daa.

³³Vin ti ala ayeke tongana ngu ti yanga ti ngbo, ayeke sioni mingi tongana ngu ti yanga ti asioni ngbo.

³⁴Baa, ye so mbi KOTA GBIA, mbi leke na hondengo ni, ye so mbi bata ndali ti ala na ya ti kubu ti batango mosoro ti mbi laa:

³⁵mbi yeke kiri peko ti sioni na ala, mbi yeke kiri peko ti ye na ala alingbi na sarango ye ti ala na ndembe so gere ti ala ayeke *zene si ala ye ti ti. Biani, lango ti ye ti ngangu ni aga nduru awe, lango ti kuâ ti ala angba yongoro pepe.’

³⁶Biani, fade KOTA GBIA ayeke fâ ngbanga ti azo ti lo, lo yeke baa mawa ti azo ti kua ti lo na ndembe so lo yeke baa so ngangu ti ala ahunzi awe, mbeni zo ti mu maboko na ala ayeke daa pepe, ngbaa, wala zo so asigigi na gbe ti ngbaa ayeke daa mbeni pepe.

³⁷Fade lo yeke hunda ala, atene: ‘Anzapa ti ala ni ayeke na ndo wa? Anzapa so ala yeke kpe na mbage ti ala ti bata tere ti ala lani so!

³⁸Anzapa ti ala so ayeke te lani akasa ti mafuta ti asandaga ti ala, azo ti Israel so ayeke na ndo wa? Anzapa ti ala so ayeke nyon lani asamba so ala tuku ni ti ya na sandaga so. Ala londo fadeso amu maboko na ala ma! Ala ga fadeso ti bata ala ma!

³⁹Fadeso, ayeke nzoni ala hinga ye so: mbi, mbi yeke gi mbi oko, na tere ti mbi, mbeni nzapa nde ayeke daa pepe. Mbi laa mbi yeke sara si zo akui, mbi laa mbi yeke sara si zo aduti na fini; mbi laa mbi yeke zia ka na tere ti zo, mbi laa mbi yeke sara si ka ni amu. Zo wa laa alingbi ti gboto zo na maboko ti mbi, zo wa?

⁴⁰Biani, mbi yoro maboko ti mbi na nduzu, mbi deba, mbi tene: Fini ti mbi kpu na kpu!

⁴¹Mbi leke yanga ti yongoro zeme ti mbi awe, yanga ni ayeke za zango. Mbi ga nduru ti fâ ngbanga ti awato ti mbi awe, mbi ga nduru ti kiri na peko ti sioni ti ala na ala; mbi yeke kiri ti futa azo so ake mbi.

⁴²Fade ale ti kokora ti mbi ayeke nyon mene ngbii ahon ndö ti ala, yongoro zeme ti mbi ayeke te kasa. Turugu oko ti awato ti mbi ayeke kpe pepe; ataa zo ni awara ka, ataa a gbu zo ni ti ga zo ti kanga, ala kue ye ni ayeke wara ala.’ ”

⁴³Moïse atene: “Ala amara, ala dekongo na ngia na li ti azo ti KOTA GBIA! Biani, lo ga nduru ti kiri na peko ti mene ti azo ti kua ti lo awe; sioni so awato ti lo asara na azo ti lo, lo yeke kiri peko ti sioni ni na ala; me lo yeke *sukula sese ti azo ti lo.”

⁴⁴Moïse na Josué, molenge ti Nune aga si ala diko atënë kue ti ya ti bia so na mê ti azo ti Israel.

⁴⁵So Moïse ahunzi ti fa atënë kue ti KOTA GBIA so na azo ti Israel awe,

⁴⁶lo tene na ala: “Atënë so kue mbi fa na ala laso, ala mu yanga na amolenge ti ala ti zia be ti ala daa, ti sara ye alingbi na atënë kue ti *Ndia so.

⁴⁷Biani, so ayeke gi asenge tënë pepe. Atënë ni ayeke ndali ti fini ti ala; na lege ti atënë so laa fade gigi ti ala ayeke gue, ayo na sese so ala yeke fâ ngu ti Jourdain ti mu ni titene aga ti ala.”

⁴⁸Gi na lango ni so, *KOTA GBIA atene na Moïse:

⁴⁹“Mo gue na li ti ahoto ti Abarim, na sese ti Moab so abaa le na gbata ti Jéricho. Kâ, mo gue, mo luti na ndö ti hoto ti Nebo, mo baa sese ti Kanaan so fade mbi yeke mu na azo ti Israel titene aga ti ala.

⁵⁰Na pekoni, tongana mo gue na li ti hoto ni so awe, fade mo yeke kui kâ si mo yeke hon na peko ti ababâ ti mo, legeoko tongana ti so ita ti mo Aaron akui lani na ndö ti hoto ti Hor si lo gue na peko ti ababâ ti lo.

⁵¹Mo na Aaron, ala sara ye so ayeke sioni mingi ti ke mbi na dawa ti azo ti Israel kue. Ala sara ye ni na ngu ti Meriba, na Kades, na ya ti benyama ti Zin. Na lango ni, ala fa na le ti azo ti Israel pepe atene, mbi laa mbi yeke taa Nzapa.

⁵²Ndani laa, fade mo, Moïse, mo yeke ngba gi yongoro si mo baa kodro ni bango na le; me kodro so mbi mu na azo ti Israel so, mo yeke li na ya ni pepe.”