Read sango Ndia ti fani use ni 33 Bible Online

Ndia ti fani use ni 33 - sango bible

Ndia ti fani use ni 33

¹So ayeke tufa so Moïse, zo ti Nzapa, asara na ndö ti azo ti Israel kozo titene lo kui laa.

²Lo tene: “*KOTA GBIA alondo na hoto ti Sinai si aga. Tongana ti so lâ ayeke sigigi, lo sigigi ndali ti azo ti lo na sese ti Seir kâ. So lo ngba kâ na hoto ti Paran, lo su na ndö ti azo ti lo. *A-ange gbani gbani amu peko ti lo si lo na ala aga; lo gbu na ya ti maboko ti lo ti koli ndia so ayeke za tongana menga ti wâ.

³KOTA GBIA aye amara kue ti Israel. Lo yeke bata azo so kue ayeke ti lo, ala so aduti na sese na gbe ti lo si ala yeke ma ye so lo yeke fa na ala.

⁴Ndia so Moïse amu na e aga ye so ayeke ti bongbi ti azo ti Jacob.

⁵Na ndembe so amakonzi ti azo ti Israel, ala na amara ti Israel abongbi tere ti ala lani, KOTA GBIA ayeke gbia ti Yeshurun.”

⁶Moïse akiri atene: “Ayeke nzoni mara ti Ruben angba na fini! Ayeke nzoni mara ni akui pepe, ataa so azo ti mara ni ayeke mingi pepe!”

⁷Ndali ti mara ti Juda, Moïse atene: “KOTA GBIA, ayeke nzoni mo ma azo ti mara ti Juda; mo kiri na ala na mbage ti a-ita ti ala. Ayeke nzoni ala wani asara ngangu ti bata tere ti ala; mo mu maboko na ala na ndembe so awato ti ala alondo ti tiri na ala.”

⁸Ndali ti mara ti Lévi, Moïse atene: “KOTA GBIA, lani Urim na Tumim ayeke ti azo ti mara ti Lévi so ayeke taa azo ti kua ti mo; azo ti mo so mo tara be ti ala lani na Masa si mo gi tënë na ala na ngu ti Meriba so.

⁹Ala baa babâ na mama ti ala tongana azo pepe, ala baa amolenge ti ala na a-ita ti ala tongana azo pepe; me ala bata tënë ti yanga ti mo, ala sara ye alingbi na *mbuki ti mo.

¹⁰Ala yeke fa atënë ti ndia ti mo na azo ti mara ti Jacob, ala yeke fa ndia ti mo na azo ti Israel. Ala yeke zö dukani si ala yeke ya *asandaga so a yeke gbi ni kue na wâ na ndö ti gbalaka ti mo.

¹¹KOTA GBIA, ayeke nzoni mo sara tufa na ndö ti ala, mo yeda na akua so kue ala yeke sara. Mo kungbi ngangu ti awato ti ala! Ayeke nzoni azo so ake ala akiri alondo na nduzu pepe!”

¹²Ndali ti mara ti Benjamin, Moïse atene: “KOTA GBIA aye mara ti Benjamin mingi. So lo yeke na tere ti KOTA GBIA, mbeni ye ti sara lo ayeke daa pepe. Nzapa ti lo ayeke bata lo lakue, lo duti na popo ti akete hoto ti lo.”

¹³Ndali ti mara ti Joseph, Moïse atene: “KOTA GBIA asara tufa na ndö ti sese ti azo ti mara ni; sese ni awara ngu ti pere so alondo na yayu, na ngu so alondo na gbe ti sese yongoro si asigigi.

¹⁴Lâ ayeke sara si akugbe ti kasa ayeke mai nzoni; afini le ti kobe ayeke be nze na nze.

¹⁵Sese ti ala so akota hoto na akete hoto amu ndö ni kue so, ngbene ye asara si akobe adu daa nzoni.

¹⁶Ayeke nzoni amosoro ti kodro so anzoni ye asi singo daa nga na nzoni be ti Nzapa so aduti na ya ti kete keke aga na ndö ti azo ti mara ti Joseph, na ndö ti lo so lo yeke lani makonzi ti a-ita ti lo.

¹⁷Ayeke nzoni azo agonda Joseph! Lo yeke tongana kozo molenge ti koli-bagara. Adidi ti lo use ayeke ngangu tongana ti ngbä; lo yeke pika amara na ni, lo pusu ala ngbii lo si na ala na nda ti sese. Didi oko ayeke gba ti azo ti mara ti Efraim; mbeni didi ni ayeke azo ti mara ti Manase so ayeke saki saki.”

¹⁸Ndali ti mara ti Zabulon, Moïse atene: “Ala, azo ti mara ti Zabulon, ala duti na ngia ndali ti so ala yeke tambula na mangboko ti dengo buze ti ala; ala, azo ti mara ti Isakar, ala duti na ngia ndali ti so ala duti kpoo na ya ti ada ti ala ti bongo!

¹⁹Fade ala yeke iri amara ti gue na li ti hoto ti Nzapa. Kâ, ala yeke ya asandaga na lege ti ndia ni, ngbanga ti so mosoro ti ala aga na le ti kota ngu-ingo si anzoni ye ti ala ahonde na ya ti mbutu.”

²⁰Ndali ti mara ti Gad, Moïse atene: “Mbi mu singila na KOTA GBIA so amu kota sese na mara ti Gad! Gad alango na sese tongana bamara. Nyama so lo gbu, lo yeke suru ya ti maboko ti lo nga na ya ti li ti lo.

²¹Gad amu nzoni sese ti kodro ni titene aga ti lo; a bata ndali ti lo ye so alingbi fade na gbia. Na pekoni, lo gue, lo wara tere na amakonzi ti azo ni; ye so KOTA GBIA aleke na be ti lo ti sara, lo sara si aga taa-tënë, lo sara ye ndali ti azo ti Israel alingbi na yanga so KOTA GBIA amu.”

²²Ndali ti mara ti Dan, Moïse atene: “Dan ayeke tongana kete bamara so asigigi na Bashan si lo huru ti gbu ye.”

²³Ndali ti mara ti Neftali, Moïse atene: “KOTA GBIA asara nzoni be mingi na Neftali, lo mu anzoni ye mingi na lo. Ayeke nzoni lo mu sese ti mbage ti Do na ti mbage ti Mbongo titene aga ti lo!”

²⁴Ndali ti mara ti Aser, Moïse atene: “Na popo ti amolenge ti Jacob kue, ayeke nzoni KOTA GBIA asara tufa na ndö ti lo! Ayeke nzoni a-ita ti lo angba ti ye lo! Mafuta ti olive ti lo ahon ndoni, lo lingbi fade ti yoro gere ti lo daa.

²⁵Ayeke nzoni a kanga yanga ti gbagba ti lo na angbongboro kerere ti wen na ti bengba wen. Ayeke nzoni ngangu ti lo angba alingbi na lango ti fini ti lo kue!”

²⁶Na pekoni, Moïse akiri atene: “Yeshurun, mbeni nzapa ti lingbi na Nzapa ti mo ayeke daa pepe! Na ya ti gonda ti lo, lo tambula na ndö ti ambinda, lo hon na le ti nduzu si lo yeke ga ti mu maboko na mo.

²⁷Nzapa so angba lakue, lo yeke ndo ti batango tere ti mo; lo ngba lakue ti fa ngangu ti lo na ndö ti sese so. Lo tumba awato na dawa ti mo si lo tene: ‘Fâ ala kue kue kue!’

²⁸Azo ti Israel aduti na siriri; *ahale ti Jacob aduti nde na ya ti mbeni kodro so ale ti kobe na fini vin ayeke daa, ngu ti pere alondo na yayu si ayeke ti na ndö ni.

²⁹Ti ala nzoni, ala azo ti Israel! Mara wa laa alingbi na ti ala? Mara ti ala oko laa KOTA GBIA asoo ni. KOTA GBIA ayeke *vala ti batango ala, lo yeke ye ti bira so asara si ala so benda. Fade awato ti ala ayeke handa ala na lege ti mayere, me ala, azo ti Israel, ala yeke do awato ni na gbe ti gere ti ala.”