Read sango Ndia ti fani use ni 34 Bible Online

Ndia ti fani use ni 34 - sango bible

Ndia ti fani use ni 34

¹Moïse alondo na lando ti Moab, lo gue na hoto ti Nebo, na li ti hoto ti Pisga so abaa le na gbata ti Jéricho. *KOTA GBIA afa na lo sese ni kue: sese ti Galaad ngbii asi na sese ti Dan,

²sese ti Neftali, ti Efraim na ti Manase, sese ti Juda ague ngbii asi na kota ngu-ingo ti Mediterane.

³KOTA GBIA afa nga na lo sese ti Negev, lando ti Jourdain, na popo-hoto ti Jéricho — so ti tene gbata ti Amburu — ngbii asi na Soar.

⁴Tongaso KOTA GBIA atene na lo: “So ayeke sese so mbi deba yanga ti mbi ando ti mu na Abraham, Isaac na Jacob si mbi tene: ‘Fade mbi yeke mu sese ni na *ahale ti ala.’ Mbi fa ni na mo titene mo baa ni na le ti mo, me mo yeke si daa pepe.”

⁵Moïse, zo ti kua ti KOTA GBIA akui kâ, na sese ti Moab alingbi na tënë so KOTA GBIA atene.

⁶KOTA GBIA wani alu lo na popo-hoto ti sese ti Moab, na ndo so abaa le na Bet-Peor. Ti londo na ngoi ni so ngbii asi laso, zo oko ade ti baa ndo so du ti kuâ ti lo ayeke da pepe.

⁷Moïse ayeke na ngu ngbangbo oko na baleuse si lo kui. Me lo de ngangu, le ti lo angba ti baa ndo nzoni mingi.

⁸Azo ti Israel atoto kuâ ti Moïse kâ na lando ti Moab na ya ti nze oko; na pekoni, lango ti sarango mua ti lo ahunzi.

⁹Josué, molenge ti Nune asi na yingo ti ndara, ngbanga ti so Moïse azia maboko lani na li ti lo. Azo ti Israel ama yanga ti Josué, ala sara ye alingbi na yanga so KOTA GBIA amu lani na Moïse.

¹⁰Na sese ti Israel, mbeni wayanga-Nzapa so akiri aduti tongana Moïse ayeke daa pepe: lo na KOTA GBIA ayeke tene tënë lani le na le.

¹¹KOTA GBIA atokua lo na Ezipte ti sara aye ti kpene na aye ti dongo be na le ti gbia Faraon, na le ti azo ti gbe ti lo nga na le ti azo ti kodro ni kue.

¹²Na le ti azo ti Israel kue, Moïse asara akota ye na lege ti ngangu so ayeke zia mbeto na be ti zo.