Read sango Ndia ti fani use ni 4 Bible Online

Ndia ti fani use ni 4 - sango bible

Ndia ti fani use ni 4

¹Moïse atene: Ala azo ti Israel, fadeso ala ma aye so ndia afa nga na atënë ti ndia so mbi yeke fa na ala titene ala sara ye alingbi na ni. Tongaso, fade ala yeke duti na fini si ala yeke gue ti mu sese so *KOTA GBIA, Nzapa ti akotara ti ala amu na ala.

²Tënë so mbi yeke fa na ala, alingbi ala zia mbeni tënë na ndö ni pepe, ala zi nga mbeni tënë na ya ni pepe; me alingbi ala sara ye alingbi na atënë kue ti yanga ti KOTA GBIA Nzapa ti ala.

³Ala wani abaa na le ti ala ye so KOTA GBIA asara ndali ti vorongo *Baal ti Peor: azo so kue na popo ti ala amu peko ti nzapa nde so, KOTA GBIA afâ ala kue.

⁴Me ala, azo so abata be ti ala na KOTA GBIA Nzapa ti ala, ala kue, ala ngba na fini laso.

⁵Ala baa, mbi fa na ala aye so ndia afa nga na atënë ti ndia alingbi na yanga so KOTA GBIA Nzapa ti mbi amu na mbi. Na ndembe so ala yeke si ande na ya ti kodro so ala yeke mu ni titene aga ti ala, fade ala yeke sara ye alingbi na ni.

⁶Tongana ala bata andia ni si ala sara ye alingbi na ni, amara nde so ayeke ma tënë ni, fade ala yeke baa ala, azo ti Israel, tongana azo ti ndara na azo ti hingango ndo; azo ni ayeke tene: “So ndara na hingango ndo na kota mara so!”

⁷KOTA GBIA Nzapa ti e ayeke lakue nduru na e tongana e iri lo ti mu maboko na e. Mbeni kota mara nde ayeke daa so anzapa ti lo ayeke nduru na lo tongana ti e so?

⁸Aye so ndia afa nga na atënë ti ndia so mbi zia na gbe ti ala laso ayeke mbirimbiri. Mbeni kota mara nde ayeke daa so aye so ndia ti lo afa nga na atënë ti ndia ti lo ayeke mbirimbiri tongana ti e so?

⁹Moïse atene: Ye oko, alingbi ala azo ti Israel, ala sara hange, le ti ala akpengba! Ye so ala wani abaa na le ti ala, alingbi be ti ala agirisa na ni pepe. Ala bata ni na be ti ala na lango ti fini ti ala kue; ala fa tënë ni na amolenge ti ala nga na amolenge ti amolenge ti ala.

¹⁰Ala dabe ti ala na lango so ala luti lani na dawa ti *KOTA GBIA Nzapa ti ala, na hoto ti Horeb! KOTA GBIA atene lani na mbi, atene: “Mo bongbi azo ni kue na tere ti mbi; mbi ye ti fa na ala atënë ti mbi. Tongaso, fade ala yeke manda ti kpe mbi na lango so kue ala yeke duti na fini na ndö ti sese so. Fade ala yeke fa nga ni na amolenge ti ala.”

¹¹Na lango ni so, ala ga nduru, ala luti na gbe ti hoto ni; hoto ni kue ayeke gi wâ: menga ti wâ ni alondo ngbii asi na le ti nduzu, taa na ya ti guru so avuko pitipiti nga na ngbongboro mbinda.

¹²KOTA GBIA atene tënë na ala na ya ti wâ ni. Ala ma atënë ti lo, me ala baa lo pepe; ala ma gi go ti lo.

¹³Lo sara si ala hinga tënë ti *mbuki ti lo. Lo mu yanga na ala titene ala bata mbuki ni na sarango ye alingbi na Andia baleoko so lo su na ndö ti akpangbara têne use.

¹⁴Na ngoi ni so, KOTA GBIA amu na mbi yanga ti fa na ala andia na atënë ti ndia titene ala sara ye alingbi na ni na ya ti kodro so ala yeke gue ti mu ni titene aga ti ala.

¹⁵Moïse atene: Na lango so *KOTA GBIA atene tënë na ala na hoto ti Horeb, na ya ti wâ, ala baa lo pepe; nilaa, alingbi ala sara hange!

¹⁶Ala sara siokpari pepe na lege ti sarango mbeni yanda, limo ti mbeni ye so a leke na kode si akpa koli wala wali,

¹⁷limo ti mbeni ye so akpa nyama so ayeke na ndö ti sese wala ndeke so ayeke huru na le ti nduzu,

¹⁸limo ti mbeni ye so akpa nyama so ayeke hara na sese wala susu so ayeke na ya ti angu ti gbe ti sese.

¹⁹Tongana ala yo le ti ala na nduzu ti baa lâ, nze, atongoro, na aye so kue ayeke mingi mingi na le ti nduzu, mbeni ye ahanda ala pepe ti kuku na gbe ti aye ni, ala voro ala nga pepe. KOTA GBIA Nzapa ti ala azia aye ni so na tanga ti amara ti ndö ti sese so.

²⁰Me ti ala, azo ti Israel, KOTA GBIA amu ala, lo sara si ala sigigi na sese ti Ezipte, ndo so ala baa pasi daa tongana ti zo so ayeke na ya ti kota fur. Lo sara si ala ga azo ti lo wani, tongana ti so ala yeke laso.

²¹Andaa ndali ti ala, KOTA GBIA Nzapa ti ala asara ngonzo na tere ti mbi; lo deba yanga ti lo, lo tene, fade mbi yeke fâ ngu ti Jourdain pepe, mbi yeke si pepe na ya ti nzoni kodro so lo yeke mu na ala titene aga ti ala.

²²Biani, mbi yeke kui ge, na ya ti kodro so; mbi yeke fâ ngu ti Jourdain pepe. Me ti ala, ala yeke fâ ngu ti Jourdain ti gue ti mu nzoni sese so ayeke na mbage ni kâ.

²³Ala sara hange! *Mbuki so KOTA GBIA Nzapa ti ala asara ni na ala, be ti ala agirisa na ni pepe. Ala sara yanda ndali ti ala wani pepe, wala mbeni ye so akpa limo ti zo na ti nyama. KOTA GBIA Nzapa ti ala ake na ala ti sara mara ti ye tongaso.

²⁴Biani, KOTA GBIA Nzapa ti ala ayeke tongana wâ so ayeke gbi ye kue; lo yeke Nzapa so ayeke sara mbanda ti azo ti lo.

²⁵Tongana ala duti ande na sese ni aninga si ala du amolenge, amolenge ti ala adu amolenge, alingbi ala sara siokpari pepe na lege ti sarango mbeni yanda, limo ti mbeni ye so a leke na kode si akpa limo ti aye nde nde. Ala sara pepe ye so ayeke sioni ti so be ti KOTA GBIA Nzapa ti ala.

²⁶Tongana ala sara mara ti asiokpari tongaso, mbi tene na ala laso biani, yayu na sese ayeke ma mbi, sese so ala yeke gue ti mu na mbage ti ngu ti Jourdain kâ titene aga ti ala so, ala yeke ngba na ya ni aninga pepe, a yeke fâ ala kue ti hunzi ala.

²⁷Fade KOTA GBIA ayeke kangbi ala kirikiri na popo ti amara nde; wungo ti ala ayeke ngba gi kete na ya ti akodro so KOTA GBIA ayeke tumba ala daa.

²⁸Kâ, ala yeke voro anzapa nde so maboko ti zo laa asara; a sara anzapa ni na keke nga na têne. Anzapa ni alingbi ti baa ndo pepe, ti ma ndo pepe, ti te ye pepe, wala ti ma fion ti ye pepe.

²⁹Tongaso, na kodro ni kâ, ala yeke gi KOTA GBIA Nzapa ti ala. Tongana ala gi lo na be ti ala kue, na yingo ti ala kue, fade ala yeke wara lo.

³⁰Gbanda, tongana ye so kue mbi tene tënë ni na ala so asi na ala si ye ti vundu asi na ala, ala yeke kiri na mbage ti KOTA GBIA Nzapa ti ala si ala yeke ma yanga ti lo.

³¹Biani, KOTA GBIA Nzapa ti ala ayeke Nzapa so ayeke baa mawa ti zo. Fade lo yeke zia ala pepe, lo yeke hunzi ala pepe; mbuki so lo deba yanga ti lo ti sara na akotara ti ala, be ti lo ayeke girisa na ni pepe.

³²Moïse akiri atene: Ala azo ti Israel, ala gbu li ti ala na ndö ti aye so asi giriri kozoni, ye so asi kozoni na ala, ngbene ye so Nzapa asara zo na ndö ti sese. Ala gbu li ti ala na ndö ti ye so asi, ti londo na mbeni mbage ti yayu asi na mbeni mbage ni. Mbeni kota ye tongaso asi laoko awe? Zo ama mbeni tënë tongaso laoko awe?

³³Mbeni mara ama go ti mbeni nzapa so atene tënë na ya ti wâ si mara ni angba na fini, tongana ti so asi na ala so?

³⁴Mbeni nzapa nde atara laoko ti gue ti zi azo ti lo na gbe ti mbeni mara nde awe? Oko pepe, me KOTA GBIA Nzapa ti ala, azo ti Israel, ague, azi ala na sese ti Ezipte; ala wani abaa na le ti ala. Lo zi ala na lege ti ngangu ti maboko ti lo nga na lege ti maboko ti lo so lo yoro; na lege ti akota pasi, aye ti kpene na aye ti dongo be, akota ye ti ngangu nga na aye so ayeke zia mbeto na be ti zo.

³⁵Ala wara lege ti baa aye so kue titene ala hinga atene, KOTA GBIA laa ayeke Nzapa; mbeni nzapa nde ayeke daa pepe, gi lo oko.

³⁶Ala ma go ti lo so alondo kâ na yayu ti fa na ala lege ti mango yanga. Na ndö ti sese, lo sara si ala baa kota wâ ti lo; lo tene tënë na ala na ya ti wâ ni.

³⁷Ndali ti so lo ye akotara ti ala, nilaa lo soro ala, *ahale ti ala; lo wani, lo sara si ala sigigi na sese ti Ezipte na lege ti kota ngangu ti lo.

³⁸Fadeso, lo yeke tumba amara nde na dawa ti ala, azo ti Israel; amara ni ayeke akota mara, amara so ayeke ngangu ahon ala. Lo yeke gue na ala titene ala li na sese ti amara ni si lo yeke mu sese ni na ala titene aga ti ala, azo ti Israel; ye ni laa asi laso so.

³⁹Alingbi ala hinga tënë so laso, ala gbu li ti ala na ndö ni nzoni: KOTA GBIA laa ayeke Nzapa na yayu, yongoro na nduzu kâ; lo yeke nga Nzapa na ndö ti sese; mbeni Nzapa nde ayeke daa pepe.

⁴⁰Alingbi ala sara ye alingbi na aye so ndia ti lo afa nga na atënë ti yanga ti lo so mbi yeke fa na ala laso. Tongana ala sara ye alingbi na ni, fade ala na ahale ti ala ayeke baa nzoni; gigi ti ala ayeke yo na ya ti kodro so KOTA GBIA Nzapa ti ala amu na ala kpu na kpu.

⁴¹Na pekoni, Moïse asoro ambeni gbata ota so ayeke na To ti mbage ti ngu ti Jourdain

⁴²ti ga agbata so zo ayeke kpe daa ti bata tere ti lo. Tongana mbeni zo afâ mba ti lo, me lo sara ni na mbana pepe, lo ke nga mba ti lo ni na be ti lo kozoni pepe, fade zo ni ayeke kpe na ya ti mbeni gbata ni oko, tongaso si lo lingbi ti soo fini ti lo.

⁴³Agbata ni ayeke Beser, na kpangbara sese so ayeke na benyama, ndali ti azo ti mara ti Ruben; Ramot na sese ti Galaad, ndali ti azo ti mara ti Gad; Golan na sese ti Bashan, ndali ti azo ti mara ti Manase.

⁴⁴So ayeke *Ndia ti Nzapa so Moïse afa na azo ti Israel.

⁴⁵Na peko ti so ala sigigi na sese ti Ezipte, Moïse afa na ala akpengba ndia, andia nga na atënë ti ndia.

⁴⁶Na ngoi ni so, ala yeke na To ti ngu ti Jourdain, na popo-hoto so abaa le na kodro ti Bet-Peor, na sese ti Sihon, gbia ti azo ti mara ti Amori. Sihon alango lani na gbata ti Heshebon, me Moïse na azo ti Israel akinda lo na ndembe so ala sigigi na Ezipte.

⁴⁷Ala mu sese ti lo si aga ti ala; ala mu nga sese ti Og, gbia ti Bashan. — Agbia use ti azo ti mara ti Amori so ayeke le-gbia lani na To ti ngu ti Jourdain. —

⁴⁸Tongaso, azo ti Israel amu sese so alondo na Aroer so ayeke na tere ti ngu ti Arnon, ague ngbii asi na hoto ti Siyon, so mbeni iri ni ayeke Hermon;

⁴⁹so ti tene sese so kue ayeke na mbage ti To ti ngu ti Jourdain, ague ngbii asi na kota ngu ti Gba-ti-ingo, na gbe ti hoto ti Pisga.