Read sango Ndia ti fani use ni 5 Bible Online

Ndia ti fani use ni 5 - sango bible

Ndia ti fani use ni 5

¹Moïse airi azo ti Israel kue si lo tene na ala: “Ala azo ti Israel, ala ma aye so ndia afa nga na atënë ti ndia so mbi yeke tene na ala laso. Ala manda ni si ala sara kue ti sara ye alingbi na ni.

²*KOTA GBIA Nzapa ti e asara *mbuki na e na hoto ti Horeb.

³Lo na akotara ti e laa, ala sara mbuki ni pepe; me lo sara ni na e so kue e ngba na fini laso.

⁴Na li ti hoto, KOTA GBIA atene tënë na ala le na le, na ya ti wâ.

⁵Na ngoi ni so, mbi luti na popo ti ala na KOTA GBIA ti tene na ala peko ti atënë ti KOTA GBIA. Biani, ala sara mbeto ti wâ ni si ala ma na li ti hoto ni pepe. KOTA GBIA atene:

⁶“Mbi yeke KOTA GBIA Nzapa ti mo; mbi laa mbi sara si mo sigigi na sese ti Ezipte, ndo so mo yeke lani ngbaa daa.

⁷“Alingbi mo voro ambeni nzapa nde pepe, gi mbi oko.

⁸“Alingbi mo sara mbeni yanda ndali ti mo pepe, wala mbeni ye so akpa ye so ayeke na le ti nduzu, wala ye so ayeke na ndö ti sese wala ye so ayeke na ya ti ngu na gbe ti sese.

⁹Alingbi mo kuku na gbe ti ayanda so pepe, mo voro ala pepe, ngbanga ti so mbi KOTA GBIA Nzapa ti mo, mbi yeke Nzapa so ayeke sara mbanda ti azo ti lo. Azo so asara sioni ti ke mbi, mbi yeke kiri na sioni ti azo ni na ndö ti *ahale ti ala, ngbii asi na molongo ota ni wala molongo osio ni.

¹⁰Me azo so aye mbi si ala yeke sara ye alingbi na atënë ti yanga ti mbi, mbi yeke sara nzoni be na ahale ti ala ngbii asi na molongo saki oko.

¹¹“Alingbi mo di iri ti mbi KOTA GBIA Nzapa ti mo senge senge pepe. Biani, zo so adi iri ti mbi senge senge, mbi yeke zia lo senge pepe.

¹²“Alingbi mo bata *lango ti wungo tere nde ndali ti mbi, alingbi na yanga so KOTA GBIA Nzapa ti mo amu na mo.

¹³Mo sara akua ti mo kue na ya ti lango omene.

¹⁴Me lango mbarambara ni ayeke lango ti wungo tere so a zia nde ndali ti KOTA GBIA Nzapa ti mo. Na lango ni so, alingbi mo sara kua oko pepe, ataa mo, ataa molenge ti mo ti koli, ataa molenge ti mo ti wali, ataa zo ti kua ti mo ti koli, ataa zo ti kua ti mo ti wali, ataa bagara ti mo, ataa lele ti mo, ataa mbeni nyama ti mo oko, ataa wande so ayeke lango na kodro ti mo. Alingbi zo ti kua ti mo ti koli na ti wali awu tere ti ala tongana mo.

¹⁵Mo dabe ti mo so, ando mo yeke ngbaa na Ezipte si KOTA GBIA Nzapa ti mo asara si mo sigigi na lege ti ngangu ti maboko ti lo nga na lege ti maboko ti lo so lo yoro. Ndani laa, KOTA GBIA Nzapa ti mo amu yanga na mo titene mo bata lango ti wungo tere.

¹⁶“Alingbi mo ne babâ na mama ti mo, tongana ti so mbi KOTA GBIA, mbi mu yanga na mo. Tongaso si gigi ti mo ague, ayo si mo yeke duti nzoni na sese so mbi KOTA GBIA Nzapa ti mo, mbi mu na mo.

¹⁷“Alingbi mo fâ zo pepe.

¹⁸“Alingbi mo gi wali wala koli ti zo pepe.

¹⁹“Alingbi mo nzi pepe.

²⁰“Alingbi mo tene mvene na li ti mba ti mo pepe na le ti ngbanga.

²¹“Alingbi mo sara nzara ti wali ti mba ti mo pepe; mo sara nzara ti ye so mba ti mo ayeke na ni pepe, ataa yaka ti lo, ataa zo ti kua ti lo ti koli, ataa zo ti kua ti lo ti wali, ataa bagara ti lo, ataa lele ti lo.”

²²So ayeke atënë so KOTA GBIA atene na ala na kota go, na ya ti wâ, na ya ti guru ti wâ nga na ya ti ngbongboro mbinda. Lo tene atënë ni na ala so kue abongbi na gbe ti hoto; lo zia mbeni tënë nde na ndö ni pepe. Na pekoni, lo su atënë ni na le ti akpangbara têne use si lo mu ni na mbi.

²³Moïse akiri atene: Na peko ti so ala ma go so alondo na ya ti vukongo ndo, na ndembe so ndö ti hoto ni kue ayeke gi wâ, amakonzi so ayeke na li ti amara ti ala na *akangba ti ala aga nduru na mbi;

²⁴ala tene: “*KOTA GBIA Nzapa ti e afa na e gonda ti lo, lo fa nga na e so lo yeke kota. E ma go ti lo so alondo na ya ti wâ. Laso, e baa so Nzapa alingbi ti tene tënë na zo si zo ni angba na fini senge.

²⁵Me ngbanga ti nyen si e yeke gi titene kota wâ so agbi e kue ti hunzi e? Tongana e kiri e ma go ti KOTA GBIA Nzapa ti e, gbaa e yeke kui!

²⁶Zo wa laa ama laoko go ti Nzapa so ayeke na fini, lo tene tënë na zo ni na ya ti wâ tongana ti e so si lo ngba na fini?

²⁷Ti mo, Moïse, mo laa mo yeke gue nduru na KOTA GBIA Nzapa ti e ti ma atënë so kue lo yeke tene. Fade mo yeke kiri ti tene peko ni na e si e yeke sara ye alingbi na ni.”

²⁸KOTA GBIA ama atënë so kue ala tene na mbi, nilaa lo tene na mbi: “Mbi ma tënë so azo ni atene na mo so awe. Tënë ti ala ni kue ayeke na legeni.

²⁹Tongana ala leke fade be ti ala biani ti kpe mbeto ti mbi tongaso lakue si ala sara ye alingbi na atënë ti yanga ti mbi, ka ayeke nzoni mingi! Ka ala, na *ahale ti ala ayeke duti nzoni kpu na kpu!

³⁰Gue mo tene na ala ti kiri na da ti ala.

³¹Me ti mo, mo ngba ge na tere ti mbi. Fade mbi yeke fa na mo atënë ti yanga ti mbi kue, aye so ndia afa nga na atënë ti ndia so fade mo yeke fa ni na ala titene ala sara ye alingbi na ni na ya ti kodro so mbi yeke mu na ala titene aga ti ala.”

³²Moïse akiri atene na azo ti Israel, atene: Ala sara kue ti sara ye alingbi na ye so KOTA GBIA Nzapa ti ala amu yanga na ala ti sarango ni; ala zia ni, ahon mbage na mbage pepe.

³³Ala tambula lakue gi na lege so KOTA GBIA Nzapa ti ala afa na ala; tongaso si fade ala yeke duti na fini, gigi ti ala ayeke yo si ala yeke duti nzoni na ya ti kodro so ala yeke mu ni titene aga ti ala.