Read sango Ndia ti fani use ni 6 Bible Online

Ndia ti fani use ni 6 - sango bible

Ndia ti fani use ni 6

¹Moïse atene: So ayeke atënë ti yanga, aye so ndia afa nga na atënë ti ndia so *KOTA GBIA Nzapa ti ala amu yanga na mbi ti fa ni na ala, tongaso si ala lingbi ti sara ye alingbi na ni na ya ti kodro so ala yeke gue ti mu ni titene aga ti ala.

²Tongaso, fade ala yeke kpe mbeto ti KOTA GBIA Nzapa ti ala na lango ti fini ti ala kue, ala yeke sara ye alingbi na aye so kue ndia ti lo afa nga na atënë ti ndia ti lo so kue mbi fa na ala, na *ahale ti ala, tongaso si gigi ti ala ague, ayo.

³Ala azo ti Israel, ala ma atënë ti ndia ni, ala sara kue ti sara ye alingbi na ni. Tongaso, fade ala yeke duti nzoni, ala yeke ga azo ti mara so awu mingi na *sese so ngu ti me ti bagara na mafuta ti wotoro asi singo daa, tongana ti so KOTA GBIA, Nzapa ti akotara ti ala amu zendo ni na ala.

⁴“Ala azo ti Israel, ala ma! KOTA GBIA Nzapa ti e ayeke oko KOTA GBIA.

⁵Alingbi mo ye KOTA GBIA Nzapa ti mo na be ti mo kue, na yingo ti mo kue, na ngangu ti mo kue.

⁶Atënë ti ndia so mbi yeke fa ni na mo laso, fade ayeke ngba na be ti mo.

⁷Mo yeke fa ni na amolenge ti mo; mo yeke tene tënë ni na ndembe so mo duti na da ti mo nga na ndembe so mo yeke tambula na lege, na ndembe so mo gue ti lango nga na ndembe so mo zingo na lango.

⁸Titene be ti mo agirisa na ni pepe, fade mo yeke kanga ni na maboko ti mo nga na ndö ti le ti mo.

⁹Mo yeke su ni na tere ti akadere ti yanga ti da ti mo nga na tere ti yanga ti agbagba ti gbata ti mo.”

¹⁰Moïse atene: Na ndembe so *KOTA GBIA Nzapa ti ala ayeke sara titene ala li na sese so lo mu na ala alingbi na zendo so lo mu na akotara ti ala Abraham, Isaac na Jacob, kâ, fade ala yeke wara apendere kota gbata so ala wani aleke ni pepe,

¹¹ada so asi singo na mara ti amosoro nde nde so ala wani abongbi ni pepe. Ala yeke wara adu ti ngu so ala wani azi ni pepe, akeke ti *vinye na akeke ti olive so ala wani alu ni pepe. Ala yeke te kobe, ya ti ala si.

¹²Tongaso, ala sara hange titene be ti ala agirisa na KOTA GBIA pepe, lo so lo sara si ala sigigi na sese ti Ezipte, ndo so ala yeke lani angbaa daa so.

¹³Fade ala yeke kpe mbeto ti KOTA GBIA Nzapa ti ala, ala yeke voro gi lo oko si ala yeke deba yanga ti ala gi na iri ti lo.

¹⁴Ala yeke mu peko ti anzapa nde pepe, anzapa ti amara so angoro ala,

¹⁵ngbanga ti so KOTA GBIA Nzapa ti ala so ayeke na popo ti ala ayeke Nzapa so ayeke sara mbanda ti azo ti lo. Ala sara hange si ala zia ngonzo na be ti lo pepe; tongaso pepe, fade lo yeke fâ ala kue ti hunzi ala na ndö ti sese so.

¹⁶Ala tara be ti KOTA GBIA Nzapa ti ala pepe, tongana ti so ala sara lani na Masa so.

¹⁷Ala sara ye taa na legeni alingbi na atënë ti yanga ti KOTA GBIA Nzapa ti ala, akpengba ndia ti lo nga na aye so ndia ti lo afa si lo mu na ala.

¹⁸Ala sara ye so ayeke mbirimbiri, ye so ayeke nzoni na le ti KOTA GBIA; tongaso si fade ala yeke baa nzoni si ala lingbi ti gue ti mu nzoni sese so KOTA GBIA adeba yanga ti lo lani ti mu na akotara ti ala.

¹⁹Tongana ti so KOTA GBIA atene, fade ala yeke tumba awato ti ala yongoro na dawa ti ala.

²⁰Gbanda, amolenge ti ala ayeke hunda ala, atene: “Ndali ti nyen si KOTA GBIA Nzapa ti e amu yanga so na ala, andia so nga na atënë ti ndia so?”

²¹Fade ala yeke kiri tënë na ala, atene: “Ando, e yeke angbaa ti gbia Faraon na sese ti Ezipte; me KOTA GBIA asara si e sigigi na ya ti kodro ni na lege ti kota ngangu ti lo.

²²KOTA GBIA asara akota ye ti kpene na aye ti dongo be si e baa ni na le ti e: lo bi kota mawa na tere ti azo ti Ezipte, gbia Faraon nga na azo ti da ti lo kue.

²³Ti e, KOTA GBIA asara si e sigigi na sese ti Ezipte, lo gue na e na ya ti kodro so lo ye titene e mu ni, alingbi na zendo so lo mu lani na akotara ti e.

²⁴KOTA GBIA amu yanga na e ti sara ye alingbi na aye so kue ndia afa. Tongana e kpe mbeto ti lo, fade e yeke duti nzoni lakue si lo yeke bata e na fini, tongana ti laso so.

²⁵Tongana e sara kue ti sara ye alingbi na atënë ti ndia so kue na dawa ti KOTA GBIA Nzapa ti e, fade lege ti dutingo ti e ayeke lingbi na ti so anzere na lo.”