Read sango Ndia ti fani use ni 7 Bible Online

Ndia ti fani use ni 7 - sango bible

Ndia ti fani use ni 7

¹Moïse atene: Fade *KOTA GBIA Nzapa ti ala ayeke gue na ala titene ala li na ya ti kodro so ala yeke mu ni titene aga ti ala. Lo yeke tumba gba ti amara nde na dawa ti ala, amara mbarambara so awu mingi si ala yeke ngangu mingi ahon ala: azo ti mara ti Het, ti Girgashi, ti Amori, ti Kanaan, ti Perizi, ti Hivi na ti Yebus.

²KOTA GBIA ayeke zia amara ni na gbe ti komandema ti ala, azo ti Israel, ala yeke hon ndö ti azo ni na bira si ala yeke fâ ala kue ti hunzi ala. Alingbi ala sara *mbuki na azo ti amara ni pepe, ala baa mawa ti ala pepe;

³ala sara kogara na azo ti amara ni pepe, ala mu amolenge ti ala ti wali pepe ti ga awali ti amolenge ti ala ti koli; ala soro na popo ti amara ni pepe awali ti mu na amolenge ti ala ti koli.

⁴Tongaso pepe, fade azo ti amara nde ni ayeke handa amolenge ti ala ti zia KOTA GBIA, ti mu peko ti anzapa nde. Fade ngonzo ti KOTA GBIA ayeke londo na tere ti ala, azo ti Israel si gi hio tongaso, lo yeke fâ ala kue ti hunzi ala.

⁵Baa ye so ala, azo ti Israel, alingbi ala sara na azo ti amara ni so laa: ala kungbi agbalaka ti ala na sese, ala fâ ya ti angbongboro têne ti ala so ala leke aluti na nduzu so, ala de na sese akeke ti ala so ala leke aluti na nduzu ndali ti nzapa-wali Ashera so, ala gbi ayanda ti ala.

⁶Biani, ala azo ti Israel, ala yeke azo so a zia ala nde ndali ti KOTA GBIA Nzapa ti ala. Ala yeke azo so lo soro ala na popo ti amara kue ti sese ti ga azo ti lo wani.

⁷Moïse atene: Ndali ti so ala wu ahon amara kue laa *KOTA GBIA aye ala si lo soro ala so pepe; me lo ye ala si lo soro ala, ngbanga ti so ala yeke kete mara mingi na popo ti amara kue.

⁸Me KOTA GBIA aye ala, lo ye ti sara ye so lo deba yanga ti lo lani daa na akotara ti ala. Nilaa, na lege ti ngangu ti maboko ti lo, lo sara si ala sigigi na sese ti Ezipte, ndo so lani ala yeke angbaa daa. Lo zi nga ala na gbe ti komandema ti Faraon, gbia ti Ezipte.

⁹Alingbi ala hinga atene, KOTA GBIA Nzapa ti ala laa ayeke Nzapa, taa Nzapa biani. Lo yeke bata tënë ti *mbuki ti lo si lo yeke sara nzoni be na azo so aye lo si ala yeke sara ye alingbi na atënë ti yanga ti lo, ngbii asi na molongo saki oko ti *ahale ti ala.

¹⁰Me ti azo so ake lo, gi hio tongaso, lo yeke futa ala alingbi na ye so ala sara; lo yeke sara si ala kui. Zo so ake lo, lo yeke ku kungo pepe ti sara ye na lo; lo yeke futa zo ni gi hio tongaso.

¹¹Nilaa, alingbi ala bata atënë ti yanga ti mbi, na aye so ndia afa nga na atënë ti ndia so mbi yeke fa na ala laso; ala sara ye alingbi na ni.

¹²Tongana ala dingi mê ti ala ti ma atënë ti ndia ni, tongana ala bata ni si ala sara ye alingbi na ni, fade KOTA GBIA ayeke bata ndali ti ala tënë ti mbuki so lo na akotara ti ala asara ni; lo yeke ngba ti sara nzoni be na ala.

¹³Lo yeke ye ala, lo yeke sara tufa na ndö ti ala, lo yeke sara si ala du amolenge mingi. Lo yeke sara tufa na ndö ti akobe ti yaka ti ala, ble ti ala, fini vin ti ala na mafuta ti ala. Lo yeke sara si abagara ti ala, ataba ti ala na angasa ti ala adu mingi na ya ti kodro so lo yeke mu na ala, alingbi na zendo so lo mu na akotara ti ala.

¹⁴Lo yeke sara tufa na ndö ti ala ahon ambeni mara kue. Na popo ti ala, fade koli ti dungo ni pepe wala wali ti dungo ni pepe, wala nyama ti dungo ni pepe ayeke duti daa pepe.

¹⁵Fade KOTA GBIA ayeke kanga lege na akobela kue ti sara ala; lo yeke kanga lege si asioni kobela ti bubango kodro so asara azo ti Ezipte agbu ala pepe, asioni kobela so ala hinga tënë ni kue so. Lo yeke tokua kobela ni na ndö ti ala, azo ti Israel pepe, me lo yeke bata ni ndali ti azo so ake ala.

¹⁶Amara so kue KOTA GBIA ayeke zia ala na maboko ti ala, azo ti Israel, alingbi ala baa mawa ti ala pepe, ala fâ ala kue ahunzi ala. Ala voro anzapa ti amara ni so pepe. Tongaso pepe, fade anzapa ni ayeke ga kuku ti gbungo ala.

¹⁷Moïse atene: Ala azo ti Israel, fade ala yeke tene na be ti ala, atene: “Azo ti amara so ayeke ngangu ahon e. Fade e yeke sara tongana nyen ti tumba ala?”

¹⁸Ala sara mbeto ti amara ni so pepe! Ala dabe ti ala na ye so *KOTA GBIA Nzapa ti ala asara na gbia Faraon nga na kodro ti lo kue:

¹⁹ala wani abaa na le ti ala akota pasi, aye ti kpene na aye ti dongo be so KOTA GBIA asara lani. Ala dabe ti ala nga na ngangu ti maboko ti lo nga na maboko ti lo so lo yoro ti sara si ala sigigi na ya ti kodro ni. Fade KOTA GBIA Nzapa ti ala ayeke sara legeoko tongaso na amara nde so kue ala, azo ti Israel, ala ngba ti sara mbeto ti ala so.

²⁰Fade KOTA GBIA ayeke tokua akota didiri ti kpo amara ni so; ataa azo so angba na fini si ala honde tere ti ala, adidiri ni ayeke kpo ala ngbii ala hunzi kue.

²¹Tongaso, alingbi ala do na mbeto na le ti azo ti amara ni so pepe, ngbanga ti so KOTA GBIA Nzapa ti ala ayeke na ala, lo yeke kota si lo yeke sara ye ti ziango mbeto na be ti zo.

²²Fade KOTA GBIA ayeke tumba kete na kete amara ni so na dawa ti ala. Ala azo ti Israel, fade ala lingbi pepe ti fâ azo so kue ti hunzi ala gi hio tongaso, tongaso pepe, anyama ti ngonda ayeke wu mingi ti sara sioni na ala.

²³Ti azo ti mara ni so, fade KOTA GBIA Nzapa ti ala, azo ti Israel, ayeke zia ala na maboko ti ala. Lo yeke bi tomboka na li ti ala ngbii ala hunzi kue.

²⁴Lo yeke zia agbia ti amara ni so na maboko ti ala; ala yeke sara titene a zi iri ti ala biani biani na ndö ti sese so. Mbeni zo oko na popo ti ala ayeke gbu le ni na ala pepe; ala yeke fâ agbia ni kue ti hunzi ala.

²⁵Fade ala, azo ti Israel, ala yeke gbi na wâ ayanda ti azo ti amara ni. Alingbi nzara ti wen ti nginza na lôro so azo ni azia na tere ti ayanda ni asara ala pepe; ala mu aye ni so pepe ti ga ti ala, ngbanga ti so aye ni ayeke sioni mingi na le ti KOTA GBIA Nzapa ti ala. Tongana ala mu ni, fade ayeke ga kuku ti gbungo ala.

²⁶Alingbi mara ti ayanda tongaso ali na ya ti da ti ala pepe. Tongaso pepe, fade a yeke buba ala kue legeoko na ayanda ni. Biani, alingbi ala buba ayanda ni so kue, ala baa ala tongana ye so ayeke sioni mingi nga na ye so zo alingbi ti baa na le ti lo fani use pepe.