Read sango Ndia ti fani use ni 8 Bible Online

Ndia ti fani use ni 8 - sango bible

Ndia ti fani use ni 8

¹Moïse atene: Alingbi ala sara kue ti sara ye alingbi na atënë ti ndia so mbi fa na ala laso. Tongana ala sara ye alingbi na ni, fade ala yeke duti na fini si ala yeke wu mingi. Ala yeke wara lege ti mu sese so *KOTA GBIA adeba yanga ti lo ti mu na akotara ti ala.

²Ayeke nzoni ala dabe ti ala na yongoro lege so KOTA GBIA Nzapa ti ala asara si ala tambula daa na ya ti ngu baleosio na ya ti benyama so. Lo sara tongaso titene aye ti ngangu asi na ala, tongaso si lo lingbi ti tara be ti ala ti hinga ye so ayeke na ya ti be ti ala; lo lingbi ti baa, wala ala ye ti sara ye alingbi na atënë ti ndia ti lo, wala ala ye pepe.

³Na peko ti aye ti ngangu so KOTA GBIA asara si asi na ala, na peko ti so lo sara si ala baa pasi na nzara, lo mu na ala *mane, kobe so ala hinga kozoni pepe. Ataa ala wani, ataa akotara ti ala ahinga kobe ni so pepe. Lo sara tongaso ti fa na ala so zo ayeke ngba na fini gi na lege ti kobe pepe, me na lege ti tënë so kue ayeke sigigi na yanga ti KOTA GBIA.

⁴Na ya ti ngu baleosio so kue, bongo ti ala aga gbagba ni pepe, gere ti ala asuku pepe.

⁵Alingbi ala hinga so nzoni: KOTA GBIA aye ti fa lege ti hingango ndo na ala tongana ti so babâ ayeke fa lege ti hingango ndo na molenge ti lo.

⁶Alingbi ala bata atënë ti ndia ti KOTA GBIA Nzapa ti ala, ala tambula na lege so lo ye, ala kpe mbeto ti lo.

⁷Moïse atene: *KOTA GBIA Nzapa ti ala ayeke sara titene ala li na mbeni nzoni sese, sese so ngu so ayeke sua nga na ali ti ngu ayeke daa mingi. Ngu so ayeke sigigi na gbe ti sese ayeke sua na popo-hoto nga na ya ti ahoto.

⁸Sese ni ayeke sese so zo alingbi ti fâ yaka ti *ble, ti *orze, ti *vinye, ti keke ti fige na ti keke ti grenade daa; ayeke sese so keke ti olive na mafuta ti wotoro asi singo daa.

⁹Kâ, ala yeke te kobe gbaa, akara ala; ye oko ayeke tia ala pepe. Na sese ni, wen ayeke sigigi na ya ti têne; a yeke gboto kuivre na ya ti ahoto.

¹⁰Ala yeke te kobe alingbi na nzara ti ala si ala yeke mu singila na KOTA GBIA Nzapa ti ala ndali ti nzoni sese so lo mu na ala.

¹¹Ala sara hange si be ti ala agirisa pepe na KOTA GBIA Nzapa ti ala na sarango ye pepe alingbi na atënë ti yanga ti lo, na aye so ndia ti lo afa nga na atënë ti ndia ti lo so kue mbi fa na ala laso.

¹²Fade ala yeke te kobe alingbi na nzara ti ala, ala yeke sara apendere da si ala yeke lango na ya ni.

¹³Abagara ti ala, ataba na angasa ti ala ayeke wu mingi; ala yeke wara wen ti nginza na lôro mingi nga na amosoro nde nde.

¹⁴Tongana ala wara aye tongaso, ala sara hange si ala ga azo ti baba pepe; be ti ala agirisa na KOTA GBIA Nzapa ti ala pepe, lo so lo sara si ala sigigi na Ezipte, ndo so lani ala yeke angbaa daa.

¹⁵Lo laa lo sara si ala tambula na ya ti kota benyama so ayeke mu mbeto na zo, so asioni ngbo na akparakongo asi singo na ya ni. Na benyama so ahole kasakasa, so ngu ti nyongo ni ayeke daa pepe, KOTA GBIA asara si ngu asigigi ndali ti ala na ya ti kota têne so akpengba ahon ndoni.

¹⁶Gi na ya ti oko benyama ni, KOTA GBIA amu na ala *mane, kobe so akotara ti ala ahinga ni pepe. Lo sara tongaso titene aye ti ngangu asi na ala si lo tara be ti ala; na ndani, lo sara nzoni na ala.

¹⁷Ala tene na be ti ala pepe, atene: “Mbi wara amosoro so kue na lege ti akua ti mbi nga na lege ti ngangu ti mbi wani.”

¹⁸Alingbi ala dabe ti ala so KOTA GBIA Nzapa ti ala laa amu na ala ngangu ti wara amosoro so. Nilaa laso, lo fa lo tene, lo ngba ti bata tënë ti *mbuki so lo na akotara ti ala asara ni ando.

¹⁹Tongana be ti ala agirisa na KOTA GBIA Nzapa ti ala, tongana ala mu peko ti ambeni nzapa nde, tongana ala voro anzapa ni so, tongana ala kuku na gbe ti ala, mbi tene na ala laso biani: fade ala yeke kui kue.

²⁰Biani, tongana ala ma yanga ti KOTA GBIA Nzapa ti ala pepe, fade ala yeke kui kue tongana amara nde so KOTA GBIA ayeke fâ ala kue na dawa ti ala so.