Read sango Jean 1 Bible Online

Jean 1 - sango bible

Jean 1

¹Na tongo nda ni, Tënë ayeke daa; Tënë ni ayeke na tere ti Nzapa si Tënë ni ayeke Nzapa.

²Na tongo nda ni, Tënë ayeke na tere ti Nzapa.

³Na lege ti lo laa aye kue abaa gigi, mbeni ye so abaa gigi na mbeni lege nde ayeke daa pepe.

⁴Fini ayeke na ya ti lo si fini ni ayeke lumiere ndali ti azo.

⁵Lumiere aza na ya ti vukongo ndo si vukongo ndo ahon ndö ti lo pepe.

⁶Nzapa atokua mbeni zo, iri ti lo Jean.

⁷Lo ga ti fa peko ti ye so lo hinga na ndö ti lumiere, tongaso si azo kue ama na be na lege ti lo.

⁸Jean laa ayeke lumiere ni pepe, me lo ga ti fa peko ti ye so lo hinga na ndö ti lumiere.

⁹Tënë ni ayeke taa lumiere so aga na ndö ti dunia so; lo za si zo oko oko abaa ndo polele.

¹⁰Tënë ni ayeke na dunia so. Na lege ti lo laa dunia abaa gigi, me azo ti dunia ahinga lo pepe.

¹¹Lo ga na taa kodro ti lo, me azo ti kodro ti lo ayamba lo pepe.

¹²Me azo so kue ayamba lo si ama na be na lo, lo mu na ala lege ti ga amolenge ti Nzapa.

¹³Ala ga amolenge ti Nzapa na lege so Nzapa laa adu ala, me na lege ti dungo so zo adu na ni pepe wala na lege so be ti zo aye pepe.

¹⁴Tënë ni aga zo si lo duti na popo ti e, nzoni be na taa-tënë ti lo ahon ndoni. E baa gonda ti lo, gonda so Babâ amu na oko Molenge ti lo.

¹⁵Jean afa peko ti ye so lo hinga na ndö ti lo; lo dekongo, lo tene: “Lo laa mbi tene tënë ti lo ando, mbi tene: ‘Mbeni zo ayeke ga na peko ti mbi, lo yeke kota ahon mbi, ngbanga ti so lo yeke daa kozo ti mbi.’ ”

¹⁶Biani, anzoni ye asi singo na lo, e kue, e wara ni na lege ti nzoni be ti lo na peko ti tere, na peko ti tere.

¹⁷Nzapa amu ando *Ndia na e na lege ti Moïse, me nzoni be na taa-tënë aga na lege ti Jésus Christ.

¹⁸Zo ade ti baa Nzapa laoko pepe; me gi oko Molenge ni so ayeke Nzapa si lo yeke nduru na tere ti Nzapa Babâ, lo laa lo fa Nzapa na azo titene ala hinga lo.

¹⁹Amakonzi ti azuife ti Jérusalem airi awayango-sandaga na azo ti mara ti Lévi si atokua ala na Jean, ti hunda lo, atene: “Mo yeke zo wa?”

²⁰Jean atene tënë na ala polele, lo bere pepe, lo tene: “Mbi yeke ti mbi *Mesii pepe.”

²¹Ala kiri ahunda lo, atene: “Mo yeke ti mo zo wa? Mo yeke Élie?” Jean akiri tënë na ala: “Mbi yeke Élie pepe.” Ala hunda lo, atene: “Mo yeke Wayanga-Nzapa ni?” Jean akiri tënë: “Mbi yeke lo pepe!”

²²Tongaso ala hunda lo, atene: “Mo yeke ti mo zo wa? E hunda tënë so titene e kiri na peko ni na azo so atokua e. Ti be ti mo wani, mo yeke zo wa?”

²³Jean akiri tënë na ala: “Mbi yeke zo so ayeke dekongo na benyama, atene: ‘Ala sara si lege ti *Kota Gbia aluti mbirimbiri!’ ” — Tënë so wayanga-Nzapa Ésaïe atene ando laa.

²⁴*Afarizien ayeke nga na popo ti azo so a tokua ala na Jean so.

²⁵Ala hunda lo, atene: “So mo yeke Mesii pepe, mo yeke Élie pepe, mo yeke Wayanga-Nzapa pepe, ka mo yeke batize azo ngbanga ti nyen?”

²⁶Jean akiri tënë na ala: “Mbi yeke batize ala na ngu; me mbeni zo ayeke na popo ti ala so ala hinga lo pepe.

²⁷Lo yeke ga na peko ti mbi, mbi kpa zo ti zi akamba ti poro ti gere ti lo pepe.”

²⁸Aye so kue asi na kete kodro ti Betanii, na mbage ti ngu ti Jourdain, na ndo so Jean ayeke batize azo daa.

²⁹Lango oko na pekoni, Jean abaa Jésus so ayeke ga na mbage ti lo si lo tene: “Baa, Kete Taba ti Nzapa so ayeke zi siokpari na li ti azo ti dunia laa!

³⁰Lo laa mbi tene tënë ti lo lani, mbi tene: ‘Mbeni zo ayeke ga na peko ti mbi, lo yeke kota ahon mbi, ngbanga ti so lo yeke daa kozo ti mbi.’

³¹Mbi hinga ti mbi lo kozoni pepe, me mbi ga ti batize azo na ngu ti sara si azo ti Israel ahinga lo.”

³²Jean afa na azo peko ti ye so lo baa si lo tene: “Mbi baa Yingo alondo na yayu tongana *mbipa azu si aduti na ndö ti lo.

³³Mbi hinga ti mbi lo kozoni pepe, me lo so atokua mbi ti batize azo na ngu, lo tene: ‘Zo so mo yeke baa ande Yingo azu si aduti na ndö ti lo, lo laa lo yeke batize azo na Yingo-Vuru.’

³⁴Mbi Jean, mbi baa ye so, nilaa mbi tene na azo kue, mbi tene: koli so ayeke Molenge ti Nzapa.”

³⁵Lango oko na pekoni, Jean angba gi na oko ndo ni so, lo na adisiple ti lo use.

³⁶Lo baa Jésus na hongo ni si lo tene: “Baa, Kete Taba ti Nzapa laa!”

³⁷Adisiple ti Jean use ama tënë so si ala mu peko ti Jésus.

³⁸Jésus abaa ndo na peko; lo baa so ala yeke mu peko ti lo, lo hunda ala, lo tene: “Ala yeke gi nyen?” Ala kiri tënë na lo, atene: “Rabi, mo yeke lango na ndo wa?” — Nda ti Rabi ni atene “Wafango-ye”. —

³⁹Jésus akiri tënë na ala, atene: “Ala ga abaa!” Tongaso ala gue si ala baa ndo so Jésus ayeke lango daa. Ala ngba na tere ti lo na lango ni so. Andaa ngbonga aga nduru na ngbonga osio ti peko ti bekombite.

⁴⁰Mbeni oko ti azo use so ama tënë ti Jean si amu peko ti Jésus, ayeke André, ita ti Simon Pierre.

⁴¹Kozo zo so André awara lo ayeke ita ti lo Simon; André atene na lo: “E wara *Mesii awe.” — Nda ti Mesii atene “Christ”. —

⁴²Na pekoni, lo mu Simon, lo gue na lo na Jésus. Jésus abaa Simon si lo tene na lo: “Mo yeke Simon, molenge ti Jean; fade azo ayeke iri mo Sefas.” — Nda ti iri so atene “Pierre”. —

⁴³Lango oko na pekoni, Jésus aleke na be ti lo ti gue na sese ti Galile. Lo tengbi na Philippe si lo tene na lo: “Mu peko ti mbi!”

⁴⁴Philippe ayeke zo ti Betsaida, kete kodro ti André na ti Pierre.

⁴⁵Na pekoni, Philippe awara Natanael si lo tene na lo: “Zo so ando Moïse atene tënë ti lo na ya ti mbeti ti *Ndia so, lo so nga awayanga-Nzapa atene tënë ti lo so, e wara lo awe. Zo ni ayeke Jésus, molenge ti Joseph, zo ti Nazaret.”

⁴⁶Natanael ahunda lo, atene: “Mbeni ye ti nzoni alingbi ti londo na Nazaret ti ga?” Philippe atene na lo: “Ga mo baa.”

⁴⁷Jésus abaa Natanael so ayeke ga na mbage ti lo si lo tene: “Baa, so mbirimbiri zo ti Israel laa. Lo hinga ti tene mvene pepe.”

⁴⁸Natanael ahunda Jésus, atene: “Mo hinga mbi na ndo wa?” Jésus akiri tënë na lo, atene: “Na ndembe so mo yeke fade na gbe ti keke ti fige, kozo titene Philippe airi mo, mbi baa mo.”

⁴⁹Natanael atene na lo: “Wafango-ye, mo yeke Molenge ti Nzapa! Mo yeke gbia ti Israel!”

⁵⁰Jésus akiri tënë na lo, atene: “Mo ma na be, ngbanga ti so mbi tene: ‘Mbi baa mo na gbe ti keke ti fige so’? Fade mo yeke baa ambeni kota ye so ahon ti so!”

⁵¹Jésus akiri atene: “Biani, mbi tene na ala taa-tënë: fade ala yeke baa yanga ti yayu azi si *a-ange ti Nzapa ayeke ma na nduzu si ala yeke zu na ndö ti *Molenge ti Zo.”