Read sango Jean 12 Bible Online

Jean 12 - sango bible

Jean 12

¹So angba lango omene titene *matanga ti Pake asi, Jésus ague na Betanii, kodro ti Lazare, koli so lo zingo lo na kuâ so.

²A leke kobe ndali ti Jésus kâ; Marthe laa asara kua ti kobe ni. Lazare ayeke na popo ti azo so aduti ti te kobe na Jésus.

³Na pekoni, Marie amu ngbenda ti yombo so a sara ni na ngu ti mbeni kete keke so iri ni nare ti nzoni ni, so ngere ni ayeke ngangu mingi. Lo tuku yombo ni na ndö ti gere ti Jésus si lo mbo ni na kua ti li ti lo. Fion ti yombo ni amu ya ti da ni kue.

⁴Judas Iskariote, mbeni disiple oko ti Jésus so ayeke ka ande lo, atene:

⁵“Ngbanga ti nyen si a ka yombo so na ale ti nginza ngbangbo ota si amu nginza ni na azo ti mawa pepe?”

⁶Lo tene tënë so, ngbanga ti so tënë ti azo ti mawa agbu be ti lo pepe, me ngbanga ti so lo yeke zo ti nzi: lo yeke bata bozo ti nginza si lo yeke nzi nginza so azo ayeke bi na ya ni.

⁷Me Jésus atene: “Zia wali so kpoo! Lo sara ye so ti ku na lango so a yeke lu ande kuâ ti mbi.

⁸Azo ti mawa ayeke duti lakue na popo ti ala; me mbi, mbi yeke duti lakue na popo ti ala pepe.”

⁹Gba ti azuife ama a tene, Jésus ayeke na Betanii. Tongaso ala gue kâ, gi ndali ti Jésus pepe, me ti baa nga Lazare, lo so Jésus azingo lo na kuâ so.

¹⁰Akota wayango-sandaga aleke tënë na popo ti ala ti fâ nga Lazare,

¹¹ngbanga ti so ndali ti lo, azuife mingi azia akota wayango-sandaga si ala ma na be na Jésus.

¹²Lango oko na pekoni, gba ti azo so aga na *matanga ti Pake ama a tene, Jésus ayeke ga na Jérusalem.

¹³Tongaso ala mu amaboko ti akeke ti mburu si ala gue ti wara lo na lege. Ala dekongo, atene: “E gonda Nzapa! Ayeke nzoni Nzapa asara tufa na ndö ti lo so aga na iri ti *Kota Gbia; lo yeke gbia ti Israel!”

¹⁴Jésus awara mbeni kete lele si lo ko na ndö ni, tongana ti so Mbeti ti Nzapa atene:

¹⁵“Mbeto asara mo pepe, gbata ti *Sion! Baa, gbia ti mo ayeke ga, lo duti na ndö ti mbeni molenge ti lele.”

¹⁶Adisiple ti lo ama ya ti tënë so hio pepe. Me na ndembe so Jésus ali na ya ti gonda ti lo awe, ala dabe ti ala na tënë so Mbeti ti Nzapa atene na ndö ti lo: ye ni kue laa azo asara na lo so.

¹⁷Gba ti azo so ayeke lani na tere ti Jésus na ndembe so lo iri Lazare ti sigigi na du ti kuâ si lo zingo lo na kuâ so, ala fa tënë ti ye so ala baa.

¹⁸Azo ama tënë ti ye ti kpene so Jésus asara, ndani laa gba ti azo aga ti wara lo na lege.

¹⁹Tongaso *afarizien atene na popo ti ala: “Ala baa awe? Ye ni akara ala awe: azo ti dunia kue ague gi na peko ti lo!”

²⁰Ambeni greke ayeke na popo ti azo so ague ti voro Nzapa na matanga so ayeke na Jérusalem.

²¹Ala ga nduru na Philippe, zo ti Betsaida, na sese ti Galile; ala tene na lo: “Kota zo, e ye ti baa Jésus.”

²²Philippe ague, atene tënë ni na André; ala na lo ague si ala tene tënë ni na Jésus.

²³Jésus akiri tënë na ala, atene: “Ngbonga titene a gonda *Molenge ti Zo alingbi awe.

²⁴Biani, mbi tene na ala taa-tënë: tongana le ti *ble ati na sese si akui pepe, lo yeke ngba gi lo oko. Me tongana akui, fade ayeke du ambeni le ni mingi.

²⁵Zo so aye ti bata fini ti lo ndali ti lo wani, fade lo yeke girisa ni; me zo so ake fini ti lo na ndö ti dunia so, fade lo yeke bata ni ndali ti fini so angba lakue lakue.

²⁶Zo so aye ti sara kua na mbi, alingbi lo mu peko ti mbi si ndo so mbi yeke daa, lo nga lo yeke daa. Fade Babâ ti mbi ayeke ne zo so ayeke sara kua na mbi.”

²⁷“Fadeso be ti mbi ayeke na siriri pepe. Fade mbi yeke tene nyen? Wala mbi tene: ‘Babâ, zi mbi na ya ti ngoi ti pasi so ayeke ga!’ Me ayeke ngbanga ti ngoi ti pasi so laa mbi ga.

²⁸Babâ, gonda iri ti mo!” Mbeni go alondo na yayu, atene: “Mbi gonda ni awe si mbi yeke kiri ti gonda ni.”

²⁹Gba ti azo so ayeke kâ ama go ni si ambeni atene ti ala atene, so bekpa laa asungba so! Ambeni atene ti ala: “Mbeni *ange laa atene tënë na lo!”

³⁰Jésus atene na ala: “Go so atoto ndali ti mbi pepe, me ndali ti ala.

³¹Fadeso, ngbonga ti fango ngbanga na li ti azo ti dunia so alingbi awe; fade a yeke bi gbia ti dunia so na gigi.

³²Ti mbi, tongana a mu mbi na sese, a kanga mbi na nduzu, fade mbi yeke sara si azo kue aga na tere ti mbi.”

³³Jésus atene tënë so ti fa mara ti kuâ so lo yeke kui ande na ni.

³⁴Gba ti azo ni akiri tënë na lo, atene: “Na ya ti mbeti ti *Ndia ti e, e ma a tene, fade *Mesii ayeke ngba kpu na kpu. Tongana nyen laa mo tene, a yeke mu *Molenge ti Zo ti kanga lo na nduzu so? Molenge ti Zo ni ayeke zo wa?”

³⁵Jésus atene na ala: “Lumiere ade na popo ti ala ndali ti kete ngoi. Ayeke nzoni ala tambula na ndembe so lumiere ni ayeke na tere ti ala, tongaso si vukongo ndo awara ala pepe, ngbanga ti so zo so atambula na ya ti vukongo ndo ahinga ndo so lo yeke gue daa pepe.

³⁶Na ngoi so lo so lo yeke lumiere ayeke na tere ti ala, ayeke nzoni ala ma na be na lo si ala ga azo so ayeke duti na ya ti lumiere.” Na peko ti tënë so Jésus ahon, lo honde tere ti lo si ala baa lo pepe.

³⁷Ataa aye ti kpene so kue Jésus asara na le ti azo ni, ala ma na be na lo pepe.

³⁸Tongaso, tënë so Ésaïe, wayanga-Nzapa atene aga taa-tënë, lo tene: “*Kota Gbia, zo wa laa ayeda na tënë so e tene? Kota Gbia afa ngangu ti lo na zo wa?”

³⁹Azo ni alingbi ti ma na be na lo pepe. Andaa Ésaïe afa nda ni, atene:

⁴⁰“Nzapa asara si le ti ala akanga, lo sara si ala hinga ndo pepe. Tongaso si ala baa ndo pepe, ala hinga ndo pepe si ala zia ngbene lege ti sarango ye ti ala pepe. Tongaso si mbi kai kobela ti ala pepe.”

⁴¹Ésaïe atene ando tënë so, ngbanga ti so lo baa gonda ti Jésus si lo tene tënë ti lo.

⁴²Andaa na popo ti amakonzi ti azuife, ambeni mingi ama na be na Jésus, me ala lingbi ti fa ni na le ti azo pepe, ngbanga ti *afarizien. Ala sara mbeto titene a tumba ala na ya ti ada ti sambelango Nzapa.

⁴³Biani, ala ye titene azo agonda ala ahon titene Nzapa laa agonda ala.

⁴⁴Jésus atene na kota go, atene: “Zo so ama na be na mbi, lo ma na be gi na mbi pepe, me lo ma na be nga na lo so atokua mbi.

⁴⁵Zo so abaa mbi, lo baa nga lo so atokua mbi.

⁴⁶Mbi so mbi yeke lumiere, mbi ga na ndö ti dunia so. Tongaso, zo so ama na be na mbi, lo yeke ngba na ya ti vukongo ndo pepe.

⁴⁷Tongana mbeni zo ama atënë ti mbi si lo sara ye alingbi na ni pepe, mbi laa mbi yeke fâ ngbanga na li ti lo pepe. Biani, mbi ga ti fâ ngbanga na li ti azo ti dunia so pepe, me mbi ga ti soo azo ti dunia so na kuâ.

⁴⁸Zo so ake mbi si lo ke nga atënë ti mbi, mbeni ye ti fango ngbanga na li ti lo ayeke daa: atënë so mbi tene laa ayeke fâ ngbanga na li ti lo na lango ti ndani.

⁴⁹Mbi tene tënë so alondo na mbi wani pepe, me Babâ so atokua mbi laa amu yanga na mbi na ndö ti tënë so alingbi mbi tene nga na ye so alingbi mbi fa.

⁵⁰Mbi hinga so, tënë ti yanga ti lo ayeke mu na zo fini so angba lakue lakue. Tënë so mbi yeke tene, mbi tene tongana ti so Babâ atene na mbi.”