Read sango Jean 13 Bible Online

Jean 13 - sango bible

Jean 13

¹Angba lango oko titene *matanga ti Pake asi. Jésus ahinga so ngbonga ti lo ti zia dunia so ti kiri na Babâ alingbi awe. Azo ti lo so ayeke na dunia so, lo ye ala lakue, lo ye ala ngbii asi na ndani.

²So ala yeke te kobe ti lakui, Zabolo azia na be ti Judas, molenge ti Iskariote ti ka Jésus.

³Jésus ahinga so Babâ azia aye kue na maboko ti lo. Lo hinga nga so lo londo na Nzapa, lo ga si lo yeke kiri ande na Nzapa.

⁴Tongaso, lo londo na tere ti kobe ni, lo zi bongo ti lo ti ndö ni si lo mu mbeni bongo, lo kanga na ya ti lo.

⁵Na pekoni, lo tuku ngu na ya ti mbeni kota sembe, lo to nda ti sukula gere ti adisiple ti lo si lo mbo ni na bongo so lo kanga na ya ti lo so.

⁶Lo si na Simon Pierre, me Simon Pierre atene na lo: “*Kota Gbia, mo ye ti sukula gere ti mbi?”

⁷Jésus akiri tënë na lo, atene: “Mo lingbi ti hinga fadeso nda ti ye so mbi yeke sara so pepe, me mo yeke hinga nda ni na peko.”

⁸Pierre atene na lo: “Mo ye ti sukula gere ti mbi? Oko pepe!” Jésus atene na lo: “Tongana mbi sukula gere ti mo pepe, mbeni ye so mo lingbi ti ku na mbage ti mbi ayeke daa pepe.”

⁹Simon Pierre atene na lo: “Tongaso, Kota Gbia, mo sukula gi gere ti mbi pepe, me mo sukula gere ti mbi, maboko ti mbi na li ti mbi kue!”

¹⁰Jésus atene na lo: “Zo so asukula tere ti lo awe, lo lingbi ti kiri ti sukula tere ti lo pepe, me gi gere ti lo. Biani, tere ti lo avuru awe. Ti ala, tere ti ala avuru awe, me ala kue pepe.”

¹¹Jésus ahinga zo so ayeke ka ande lo, ndani laa lo tene: “Ala kue laa tere ti ala avuru pepe.”

¹²So Jésus ahunzi sukulango gere ti ala awe, lo kiri lo yu bongo ti lo; lo kiri na tere ti kobe ni. Lo hunda ala, lo tene: “Ala hinga nda ti ye so mbi sara na ala so?

¹³Ala yeke iri mbi ‘Wafango-ye’ wala ‘*Kota Gbia’, so lege ni laa, ngbanga ti so mbi yeke Wafango-ye si mbi yeke nga Kota Gbia biani.

¹⁴Mbi so mbi yeke Wafango-ye si mbi yeke nga Kota Gbia, mbi sukula gere ti ala, alingbi ala nga, ala sukula gere ti ala na popo ti ala.

¹⁵Mbi sara so ti fa na ala tapande titene ala nga, ala sara ye so mbi sara na ala.

¹⁶Biani, mbi tene na ala taa-tënë: zo ti kua ayeke kota ahon makonzi ti lo pepe; zo ti tokua ayeke kota ahon zo so atokua lo pepe.

¹⁷Fadeso ala hinga ye ni awe. Ti ala nzoni tongana ala sara ye alingbi na ni!

¹⁸Mbi yeke tene tënë so ndali ti ala kue pepe; mbi hinga azo so mbi soro ala. Mbeti ti Nzapa atene: ‘Zo so mbi na lo, e yeke te kobe, lo laa lo yo gere ti lo ti do mbi.’ Alingbi tënë so aga taa-tënë.

¹⁹Mbi tene tënë so na ala kozoni si ye ni asi. Tongana ye ni asi ande, ala yeke hinga so ‘Mbi Yeke’.

²⁰Biani, mbi tene na ala taa-tënë: zo so ayamba mbeni zo so mbi tokua lo, andaa mbi wani laa lo yamba mbi; zo so ayamba mbi, andaa lo yamba lo so atokua mbi.”

²¹Na peko ti tënë so, be ti Jésus ayeke na siriri pepe si lo tene polele, lo tene: “Biani, mbi tene na ala taa-tënë: fade mbeni zo oko na popo ti ala ayeke ka mbi.”

²²Adisiple ti lo abaa le ti tere si ala hunda tere ti hinga zo wa laa Jésus ayeke tene tënë ti lo so.

²³Mbeni disiple oko, lo so Jésus aye lo mingi, ayeke duti nduru na tere ti Jésus.

²⁴Simon Pierre asara maboko na lo si atene na lo: “Hunda lo: zo wa laa lo yeke tene tënë ti lo so?”

²⁵Disiple ni aba tere ti lo na mbage ti Jésus si lo hunda lo, lo tene: “*Kota Gbia, ayeke zo wa?”

²⁶Jésus akiri tënë na lo, atene: “Mbi yeke yoro nduru mapa na ya ti ngu ti kasa ti mu na mbeni zo: zo ni laa.” Na pekoni, lo mu mapa, lo yoro na ya ti ngu ti kasa ni si lo mu na Judas, molenge ti Iskariote.

²⁷So Judas amu mapa ni, Satan ali na ya ti lo. Jésus atene na lo: “Ye so mo ye ti sara, sara ni hio!”

²⁸Zo oko na popo ti ala so ayeke te kobe ahinga nda ti tënë so Jésus atene na lo so pepe.

²⁹Judas laa ayeke bata bozo ti nginza. Nilaa ambeni disiple atene na be ti ala, Jésus aye ti tene: “Gue mo vo kobe ti matanga ni”, wala “Gue mo mu mbeni ye na azo ti mawa.”

³⁰Gi so Judas amu mapa ni awe, lo sigigi hio. Andaa ndo avuko awe.

³¹So Judas asigigi awe, Jésus atene: “Fadeso, *Molenge ti Zo awara gonda ti lo awe; Nzapa nga awara gonda ti lo na lege ti Molenge ni awe.

³²[So Nzapa awara gonda na lege ti lo,] fade Nzapa wani laa ayeke fa na le ti azo gonda ti Molenge ti lo; lo ga nduru ti sara ni awe.

³³Amolenge ti mbi, fade mbi yeke ngba na tere ti ala gi na ya ti mbeni kete ngoi. Fade ala yeke gi mbi, me tënë so mbi tene na amakonzi ti azuife lani so, fadeso mbi yeke tene na ala: ‘Ala lingbi ti gue pepe na ndo so mbi yeke gue daa.’

³⁴Mbi yeke mu na ala fini ndia: ala ye tere na popo ti ala! Alingbi ala ye tere na popo ti ala tongana ti so mbi ye ala.

³⁵Tongana ala ye tere na popo ti ala, tongaso fade azo kue ahinga atene, ala yeke adisiple ti mbi.”

³⁶Simon Pierre ahunda lo, atene: “*Kota Gbia, mo yeke gue na ndo wa?” Jésus akiri tënë na lo: “Mo lingbi ti mu peko ti mbi na ndo so mbi yeke gue daa fadeso pepe, me mbeni lâ, fade mo yeke mu peko ti mbi.”

³⁷Pierre atene na lo: “Kota Gbia, ngbanga ti nyen si mbi lingbi ti mu peko ti mo fadeso pepe? Mbi yeke nduru ti ka fini ti mbi ndali ti mo!”

³⁸Jésus akiri tënë, atene: “Mo yeke nduru biani ti ka fini ti mo ndali ti mbi? Biani, mbi tene na mo taa-tënë: kozo titene koli-kondo atoto, mo yeke bere tënë ti mbi fani ota.”