Read sango Jean 20 Bible Online

Jean 20 - sango bible

Jean 20

¹Na ndaperere ti layenga, so ndo angba ti vuko, Marie ti kodro ti Magdala ague na du ti kuâ ni. Lo baa so a zi têne ti yanga ti du ti kuâ ni awe.

²Lo kpe, lo gue, lo si na Simon nga na mbeni disiple, lo so Jésus aye lo mingi so. Lo tene na ala: “A zi *Kota Gbia na ya ti du ti kuâ ni awe, e hinga ndo so a zia lo daa pepe!”

³Tongaso Pierre na mbeni disiple ni alondo, ala gue na du ti kuâ ni.

⁴Ala use kue ayeke kpe loro, me mbeni disiple ni akpe loro ngangu ahon Pierre; lo si na du ti kuâ ni kozoni.

⁵Lo kuku si lo baa akamba ti bongo so alango na sese, me lo li na ya ti du ni pepe.

⁶Simon Pierre asi na peko ti lo si lo li na ya ti du ni. Lo baa akamba ti bongo so ayeke kâ

⁷nga na abongo so a kanga na li ti Jésus. Bongo ni na akamba ti bongo ni ayeke na ndo oko pepe, me a kanga ni si a zia ni nde.

⁸Tongaso, mbeni disiple ni, lo so asi fade na du ti kuâ kozoni so, lo li, lo baa si lo ma na be.

⁹Andaa tënë ti Mbeti ti Nzapa so atene, alingbi Jésus azingo na kuâ so, ala de ti ma ya ni pepe.

¹⁰Na pekoni, adisiple akiri na ndo ti ala.

¹¹Marie aluti na gigi, na yanga ti du ti kuâ ni si lo yeke toto. So lo ngba ti toto, lo kuku ti baa ndo na ya ti du ni

¹²si lo baa *a-ange use so ayu vuru bongo. Ala duti na ndo so a zia kuâ ti Jésus daa: oko na mbage ti li ti lo, oko na mbage ti gere ti lo.

¹³Ala hunda lo: “Wali, mo yeke toto ngbanga ti nyen?” Lo kiri tënë, lo tene: “Azo amu *Kota Gbia ti mbi ahon na lo awe; mbi hinga ndo so ala zia lo daa pepe.”

¹⁴So tënë ni angba na yanga ti lo, lo baa ndo na peko si lo baa Jésus ayeke luti; me lo hinga lo tene, so Jésus laa pepe.

¹⁵Jésus ahunda lo: “Wali, mo yeke toto ngbanga ti nyen? Zo wa laa mo yeke gi lo?” Marie abaa ti lo atene so walekengo-ndo ni so laa si lo tene: “Pakara, tongana mo laa mo mu lo, mo hon na lo, fa na mbi ndo so mo zia lo daa si mbi gue, mbi mu lo.”

¹⁶Jésus atene na lo: “Marie!” Marie abaa ndo na mbage ti lo si lo tene na yanga ti hebro, lo tene: “Rabuni!” Ndani atene: “Wafango-ye.”

¹⁷Jésus atene na lo: “Zia ti gbu mbi, ngbanga ti so mbi de ti gue na Babâ pepe. Me mo gue, mo baa a-ita ti mbi, mo tene na ala, mo tene: ‘Mbi yeke gue na Babâ ti mbi so ayeke nga Babâ ti ala; lo yeke Nzapa ti mbi na Nzapa ti ala nga.’ ”

¹⁸Tongaso Marie ti kodro ti Magdala ague si lo tene na adisiple ti Jésus atene: “Mbi baa Kota Gbia!” Lo fa na ala nga tënë so Jésus atene na lo.

¹⁹Na lakui ti layenga ni, adisiple abongbi tere ti ala na ya ti mbeni da. Ala kanga yanga ti da ni na ndö ti ala, ngbanga ti so mbeto ti amakonzi ti azuife asara ala. Jésus aga si lo luti na popo ti ala, lo tene na ala: “Siriri aduti na ala!”

²⁰Na peko ti tënë so, lo fa amaboko ti lo na kate ti lo na ala. So adisiple abaa *Kota Gbia, be ti ala asi na kota ngia.

²¹Jésus akiri tënë na ala: “Siriri aduti na ala! Tongana ti so Babâ atokua mbi, mbi nga, mbi tokua ala.”

²²Na pekoni, lo huru pupu na ndö ti ala si lo tene: “Ala wara Yingo-Vuru!

²³Tongana ala zi siokpari na li ti mbeni zo, fade siokpari ti zo ni ayeke hon. Tongana ala zi siokpari na li ti mbeni zo pepe, fade siokpari ayeke ngba na li ti lo.”

²⁴Thomas, mbeni disiple oko na popo ti adisiple baleoko na use, so a iri lo Ngbo, ayeke na popo ti amba ti lo na ndembe so Jésus asi na ni so pepe.

²⁵Ambeni disiple ni atene na Thomas: “E baa *Kota Gbia!” Thomas akiri tënë na ala, atene: “Tongana mbi baa ka ti pondi na ya ti amaboko ti lo pepe, mbi yoro li ti maboko ti mbi daa pepe si mbi yoro maboko ti mbi na ya ti ka ti kate ti lo pepe, mbi yeke ma na be oko pepe.”

²⁶Yenga oko na pekoni, adisiple akiri abongbi tere ti ala na ya ti da, Thomas ayeke na popo ti ala. Ala kanga yanga ti da ni na kerere, me Jésus aga si lo luti na popo ti ala, lo tene: “Siriri aduti na ala!”

²⁷Na pekoni, lo tene na Thomas: “Yoro li ti maboko ti mo na ndo so, mo baa maboko ti mbi. Yoro nga maboko ti mo na ndo so na ya ti kate ti mbi. Zia ti dekite, ma na be!”

²⁸Thomas akiri tënë na lo, atene: “*Kota Gbia ti mbi na Nzapa ti mbi!”

²⁹Jésus atene na lo: “Ngbanga ti so mo baa mbi laa mo ma na be? Ti ala nzoni, ala so abaa mbi pepe si ala ma na be!”

³⁰Jésus asara ambeni ye ti kpene mingi na le ti adisiple ti lo so a su tënë ni na ya ti mbeti so pepe.

³¹Me ti ambeni ye ti kpene so a su tënë ni na mbeti so, a su ni titene ala ma na be so, Jésus ayeke *Mesii, Molenge ti Nzapa. Tongana ala ma na be, fade ala yeke duti na fini na lege ti lo.