Read sango Awatokua 15 Bible Online

Awatokua 15 - sango bible

Awatokua 15

¹Ambeni zo alondo na Judée, ala ga na Antioshe ti sese ti Sirii si ala yeke fa ye na a-ita, atene: “Tongana ala fâ *ganza alingbi na *Ndia ti Moïse pepe, ala lingbi ti soo kuâ pepe.”

²Paul na Barnabas ake tënë ti azo ni si papa alondo na popo ti ala ngangu mingi. Tongaso azo ti *Eglize ni abaa so, ayeke nzoni titene Paul na Barnabas na ambeni zo ague na Jérusalem ti baa *awatokua na *akangba ndali ti tënë ni.

³Azo ti Eglize ni amu aye na ala ndali ti lege. So ala yeke hon na ya ti sese ti Fenisii na ti Samarii, ala yeke fa na azo lege so azo ti amara nde akiri na mbage ti Nzapa. Tënë ni amu ngia na be ti a-ita, azo ti Christ kue.

⁴So ala si na Jérusalem, azo ti Eglize, awatokua na akangba ayamba ala. Paul na Barnabas afa na ala peko ti aye so kue Nzapa asara na lege ti ala.

⁵Me ambeni *farizien so ama na be alondo, ala mu tënë si ala tene: “Alingbi azo ti amara nde afâ ganza, a mu nga yanga na ala ti bata *Ndia ti Moïse.”

⁶Awatokua na akangba abongbi ti gbu li ti ala na ndö ti tënë so.

⁷So tënë ni aga ngangu na popo ti ala, Pierre alondo si lo tene: “A-ita ti mbi, ala hinga so, ngbene ye na ya ti akozo lango, Nzapa asoro mbi na popo ti ala ti fa Nzoni Tënë na azo ti amara nde titene ala ma ni si ala ma na be.

⁸Nzapa so ahinga be ti zo afa atene, lo ye azo ti amara nde; lo fa ni na lege so lo mu Yingo-Vuru na ala gi tongana ti so lo mu ni na e.

⁹Na le ti lo, e na ala kue, e yeke gi oko. Lo sukula be ti ala, ngbanga ti so ala ma na be.

¹⁰Fadeso, ngbanga ti nyen laa ala ye ti gi yanga ti Nzapa na ziango mbeni kungba na li ti adisiple, kungba so akotara ti e na e wani, e yo ni gbaa so?

¹¹E ma na be so e soo kuâ na lege ti nzoni be ti *Kota Gbia Jésus legeoko tongana ala.”

¹²Azo ti ya ti bongbi ni kue aduti kpoo. Na pekoni, ala ma Barnabas na Paul so ayeke fa peko ti aye ti dongo be na aye ti kpene so Nzapa asara na azo ti amara nde na lege ti ala.

¹³So ala hunzi tënë ti ala awe, Jacques amu tënë si lo tene: “A-ita, ala ma mbi si!

¹⁴Simon afa na e fafadeso lege so Nzapa aleke na be ti lo kozoni ti soro ambeni zo na popo ti amara nde ti ga azo ti lo.

¹⁵Ye ni alingbi na atënë so awayanga-Nzapa atene ando. Biani, Mbeti ti Nzapa atene:

¹⁶‘Na pekoni, fade mbi yeke kiri ti leke da ti David so ati. Aye ti da so atuku, fade mbi yeke leke ni, mbi yeke kiri ti mu da ni na nduzu.

¹⁷Tongaso, fade tanga ti azo kue ayeke gi *Kota Gbia, ala na amara so kue mbi iri ala ti ga azo ti mbi. Baa, tënë so Kota Gbia atene laa. Aye so lo sara,

¹⁸lo fa tënë ni ando na azo kozoni awe.’

¹⁹“Ndani laa, ti be ti mbi, azo ti amara nde so amu peko ti Nzapa, ayeke nzoni e kanga lege na ala pepe.

²⁰Ayeke nzoni e su mbeti, e tokua na ala titene kobe so aga *sioni na lege so a ya ni na *sandaga na anzapa nde, ala te ni pepe, ala gi wali wala koli kirikiri pepe; nyama so azo apete go ti lo petengo si lo kui so, ala te ni pepe, ala te nga mene pepe.

²¹Biani, ngbene ye giriri, azo ayeke fa *Ndia ti Moïse na ya ti agbata oko oko kue; na *lango ti wungo tere oko oko kue, ala yeke diko Ndia ni na ya ti ada ti sambelango Nzapa.”

²²Tongaso *awatokua na *akangba, ala na azo ti *Eglize ni kue ama tere ti soro ambeni zo na popo ti ala ti tokua ala na Antioshe, ala na Paul na Barnabas. Ala soro Judas so mbeni iri ti lo Barsabas, lo na Silas. A-ita, azo ti Christ, ane azo use so mingi.

²³Ala mu na ala mbeti so na ya ni ala tene: “E, awatokua na akangba so e yeke a-ita ti ala, e bara ala a-ita ti e, azo ti Christ, so ayeke azo ti amara nde si ala yeke na Antioshe, na sese ti Sirii na ti Silisii.

²⁴E ma a tene, ambeni zo alondo na popo ti e, ague, abuba be ti ala si be ti ala angba na nduzu na lege ti tënë so ala tene. E laa e mu yanga na azo ni ti sara ye so pepe.

²⁵Ndani laa e kue, e ma tere ti soro ambeni zo ti tokua ala na Antioshe. Azo ni ayeke gue legeoko na Barnabas na Paul, a-ita ti e so e ye ala mingi.

²⁶Ala yeda ti ka fini ti ala ndali ti iri ti *Kota Gbia ti e Jésus Christ.

²⁷Tongaso e tokua Judas na Silas na ala titene ala gue, atene na ala na yanga atënë so e su na mbeti.

²⁸Biani, Yingo-Vuru nga na e wani, e ye ti zia mbeni nengo kungba na ndö ti ala pepe, gi kota ye oko:

²⁹nyama so azo aya na *sandaga na anzapa nde, ala te ni pepe; ala te mene pepe, anyama so azo apete go ti ala petengo si ala kui so, ala te nga ni pepe; ala gi wali wala koli kirikiri pepe. Tongana ala zia lege ti sarango aye so kue, so ayeke nzoni! E bara ala.”

³⁰Azo ti tokua ni azia azo ni si ala gue na Antioshe. Kâ, ala bongbi azo ti Christ kue si amu mbeti ni na ala.

³¹So a diko mbeti ni na ala awe, be ti ala kue asi na ngia, ngbanga ti so tënë ti ya ti mbeti so amu ngangu na be ti ala.

³²Judas na Silas, so ala yeke nga awayanga-Nzapa, atene tënë mingi na azo ni ti mu ngangu na be ti ala si ala kpengba.

³³Na peko ti so ala lango kete na ndo so awe, a-ita ni azia ala titene ala kiri na siriri na mbage ti azo so atokua ala. [

³⁴Me Silas aye ti lo ti ngba kâ.]

³⁵Paul na Barnabas angba na Antioshe. Ala na ambeni zo mingi ayeke fa ye na azo, ala fa nga Nzoni Tënë ti Kota Gbia na azo.

³⁶Aninga kete na pekoni, Paul atene na Barnabas: “E kiri, e baa a-ita so ayeke na ya ti agbata so kue e fa tënë ti *Kota Gbia daa kozoni so; e baa dutingo ti ala kâ ayeke tongana nyen.”

³⁷Barnabas aye titene ala mu Jean, so mbeni iri ti lo ayeke Marc na tere ti ala,

³⁸me ti be ti Paul, alingbi ala mu Jean Marc na tere ti ala pepe, ngbanga ti so lo do ala, lo zia ala na Panfilii, lo mu peko ti ala pepe na ya ti kua ti ala.

³⁹Tënë ni aga ngangu na popo ti ala, asara si ala kangbi. Barnabas amu Marc na tere ti lo si lo mu mangboko ti gue na Shipre.

⁴⁰Paul asoro ti lo Silas. Na peko ti so a-ita, azo ti Christ, asambela Kota Gbia ti sara nzoni be na lo, ala hon.

⁴¹Paul ahon na ya ti asese ti Sirii na ti Silisii si lo yeke mu wango na azo ti *Eglize titene ala kpengba.