Read sango Awatokua 24 Bible Online

Awatokua 24 - sango bible

Awatokua 24

¹Lango oku na pekoni, kota wayango-sandaga Ananias na ambeni *kangba, nga na mbeni wagbungo-koko so azo ahinga lo na iri ti Tertulus, asi na Sezare. Ala gue na tënë ti Paul na gbe ti govoronere Félix.

²A iri Paul si Tertulus amu tënë si lo bi tënë na li ti Paul, lo tene: “Gbia Félix, nzoni kode ti lekengo kodro ti mo asara si siriri aga na ya ti kodro so. Afini kode so mo sigigi na ni aga na nzoni duti na azo ti kodro so.

³Lakue, na ndo kue, e yeke yamba aye ni si e mu singila na mo mingi, gbia.

⁴Mbi ye ti mu ngoi ti mo mingi pepe. Ndani laa mbi hunda na mo titene mo ma na nzoni be nduru tënë so e ye ti tene.

⁵E baa so, koli so ayeke sioni mingi: lo yeke bi wusuwusu na popo ti azuife ti dunia kue, lo yeke makonzi ti sioni bongbi so iri ni bongbi ti Nazaret.

⁶Lo tara nga ti li na sioni ye na ya ti kota da ti Nzapa si e gbu lo. [E ye fade ti fâ ngbanga ti lo alingbi na tënë ti ndia ti e,

⁷me Lisias, kota komanda ti aturugu aga si lo gboto lo na maboko ti e na ngangu.

⁸Na pekoni, Lisias amu yanga na azo ti bingo tënë na li ti Paul ti ga na gbe ti mo.] Mo hunda koli so, fade mo wani, mo yeke baa so, atënë so kue e bi na li ti lo ayeke taa-tënë.”

⁹Azuife ayeda na peko ti tënë ni si ala tene, tënë ni kue ayeke taa-tënë.

¹⁰Govoronere asara maboko na Paul titene lo tene tënë; Paul atene: “Mbi hinga so mo fâ ngbanga na kodro so na ya ti angu mingi awe. Tongaso mbi zia be ti mbi na ndö ti mo so, fade mo yeke ma tënë so mbi yeke tene na ndö ti tënë so ala bi na li ti mbi.

¹¹Tongana mo ye ti gi ti hinga nda ti tënë so, mo gi ni senge. Asara gi lango baleoko na use so mbi gue na Jérusalem ti voro Nzapa.

¹²Na ya ti kota da ti Nzapa, wala na ya ti ada ti sambelango Nzapa wala na mbeni ndo na ya ti gbata ni, mbeni zo abaa mbi na *bingbingo tënë na mbeni zo pepe; mbeni zo abaa nga mbi na pusungo azo ti sara wusuwusu na ya ti gbata pepe.

¹³Azo ni alingbi ti fa na mo pepe ye so afa atene, tënë so ala yeke bi na li ti mbi fadeso ayeke taa-tënë.

¹⁴Me ye so mbi hinga na dawa ti mo ayeke so: mbi yeke voro Nzapa ti akotara ti e, mbi yeke sara ni alingbi na lege so Jésus afa na e; me azo ni atene, so ayeke sioni lege. Mbi yeda nga na atënë so kue a su na ya ti *Ndia ti Moïse na ambeti ti awayanga-Nzapa.

¹⁵Mbi zia be ti mbi ti ku mbeni ye na mbage ti Nzapa, azo so ayeke bi tënë na li ti mbi ayeke ku nga ni: fade azo ti mbirimbiri na azo ti sioni ayeke zingo na kuâ.

¹⁶Ndani laa, mbi nga, mbi yeke sara ngangu lakue titene mbeni sioni ye aduti na be ti mbi na le ti Nzapa pepe nga na le ti azo pepe.

¹⁷“Asara ngu mingi so mbi si na Jérusalem pepe, nilaa mbi ga na nginza ti mu maboko na azo ti mara ti mbi; mbi ga nga ti mu *sandaga na Nzapa.

¹⁸Na ndembe so laa, ala wara mbi na ya ti kota da ti Nzapa, na peko ti so mbi hunzi *sukulango sioni ti mbi. Andaa mbi bongbi azo na tere ti mbi pepe, azo asara wusuwusu pepe.

¹⁹Me ambeni zuife ti sese ti Azii ayeke na ya ti da ni. Ala laa alingbi fade ti ga na gbe ti mo ti bi tënë na li ti mbi, tongana ala yeke na mbeni tënë na tere ti mbi.

²⁰Wala ala so ge so, ala fa sioni so ala wara na li ti mbi na ndembe so mbi yeke na gbe ti azo ti *Kota Bongbi ti Fango Ngbanga.

²¹Na ndembe so mbi luti na gbe ti azo ti Kota Bongbi ti Fango Ngbanga, mbi dekongo, mbi tene: ‘Ala yeke fâ ngbanga na li ti mbi laso, ngbanga ti so mbi yeda na tënë ti zingongo ti akuâ!’ Ndali ti tënë oko so laa ala duti ti fâ ngbanga na li ti mbi laso?”

²²Félix so ahinga tënë nzoni na ndö ti lege so Jésus afa, apusu tënë ni na mbeni lango. Lo tene: “Fade mbi yeke fâ ya ti ngbanga ni tongana Lisias, kota komanda ti aturugu aga si.”

²³Lo mu yanga na makonzi ti aturugu so ayeke bata Paul ti bata lo na da ti kanga, me ti zia na lo lege titene lo sara ambeni ye so be ti lo aye. Tongana amba ti lo aga ti mu maboko na lo, ayeke nzoni a kanga lege na ala pepe.

²⁴Ambeni lango na pekoni, Félix na wali ti lo Drusile aga; wali ni ayeke zuife. Félix atokua ti iri Paul titene lo ma tënë so lo yeke tene na ndö ti mabe na Jésus Christ.

²⁵Me so Paul ayeke tene tënë na ndö ti lege ti sarango ye ti mbirimbiri, ti kangango nzara ti tere nga na ndö ti fango ngbanga so ayeke ga gbanda, mbeto agbu Félix si lo kai Paul, lo tene: “Ti laso alingbi awe! Tongana mbi wara ngoi, fade mbi yeke kiri ti iri mo.”

²⁶Félix abaa ti lo atene, fade Paul ayeke pete goro na lo, nilaa lo yeke iri Paul fani mingi titene ala sara lisoro.

²⁷Na peko ti ngu use, Porsius Festus amu mbata ti govoronere na peko ti Félix. So Félix aye ti ga nzoni na le ti azuife, lo zia Paul angba na da ti kanga.