Read sango Awatokua 25 Bible Online

Awatokua 25 - sango bible

Awatokua 25

¹Lango ota na peko ti so Festus asi na sese so lo yeke govoronere daa, lo londo na Sezare si lo gue na Jérusalem.

²Kâ, akota wayango-sandaga na amakonzi ti azuife aga ti baa lo ti zia tënë ti Paul na gbe ti lo. Ala voro Festus mingi

³titene lo sara nzoni be na ala: lo mu Paul lo kiri na lo na Jérusalem. Andaa ala ye titene ambeni zo ahonde tere ti ala ti ku Paul ti fâ lo na lege.

⁴Festus akiri tënë na ala, atene: “Paul ayeke na da ti kanga na Sezare, mbi wani, mbi yeke kiri kâ fafadeso.

⁵Ayeke nzoni akota zo ti ala aga, e na ala e gue na Sezare si ala bi tënë na li ti koli so tongana lo sara mbeni ye ti sioni!”

⁶Festus asara gi lango miombe wala baleoko na ndo ti ala. Na pekoni, lo kiri na Sezare. Lango oko na pekoni, lo duti na ya ti da ti fango ngbanga si lo mu yanga titene a ga na Paul.

⁷So Paul asi awe, azuife so alondo na Jérusalem aga, ala luti angoro lo si ala to nda ti bi akota tënë mingi na li ti lo, me ala lingbi ti fa pepe ye so afa atene, tënë so ala yeke bi na li ti lo so ayeke taa-tënë.

⁸Paul ake atënë ni si lo tene: “Mbi sara sioni ye so ake ndia ti azuife, wala kota da ti Nzapa wala kota gbia ti Rome oko pepe.”

⁹Festus aye ti zia ngia na be ti azuife, tongaso lo hunda Paul: “Mo ye ti gue na Jérusalem titene a fâ ngbanga ti mo na le ti mbi kâ?”

¹⁰Paul atene: “Mbi luti na gbe ti azo ti fango ngbanga ti kota gbia ti Rome titene ala fâ ngbanga na li ti mbi gi na ndo so. Mo wani, mo hinga nzoni so, mbi sara sioni ye na azuife oko pepe.

¹¹Tongana mbi sara mbeni ye so ake ndia si mbi sara mbeni ye so alingbi titene a fâ mbi ndali ni, mbi yeke kpe kuâ ni pepe. Me tongana taa-tënë oko ayeke na ya ti atënë so ala bi na li ti mbi so pepe, zo oko alingbi ti zia mbi na maboko ti ala pepe. Mbi ye ti gue na ngbanga ni na gbe ti kota gbia ti Rome!”

¹²Na peko ti so Festus ahunda awamungo-wango ti lo na tënë ti be ti ala awe, lo kiri tënë, lo tene: “So mo ye ti gue na ngbanga ni na gbe ti kota gbia ti Rome, fade mo yeke gue na gbe ti kota gbia ti Rome.”

¹³Ambeni lango na pekoni, gbia Agripa na Berenise, ita ti lo ti wali asi na Sezare ti bara Festus.

¹⁴So ala ngba ti sara lango mingi na ndo so, Festus afa tënë ti Paul na gbia Agripa, lo tene: “Mbeni koli ayeke ge so Félix azia lo na da ti kanga.

¹⁵So mbi gue na Jérusalem, akota wayango-sandaga ti azuife na *akangba ti ala aga na tënë ti lo na gbe ti mbi si ala hunda na mbi ti fâ ngbanga na li ti lo.

¹⁶Me mbi tene na ala, mbi tene, kozo titene e kanga mbeni zo, na lege ti ndia ti e, azo ti Rome, e yeke mu lege na lo ti fa nda ti tënë ti lo na le ti azo so abi tënë na li ti lo.

¹⁷So mbi na ala e si ge na Sezare, mbi ku pepe. Lango oko na pekoni, mbi gue, mbi duti na da ti fango ngbanga si mbi mu yanga titene a ga na koli so.

¹⁸Azo so abi tënë na li ti lo asi na mbi. Mbi baa ti mbi, mbi tene, fade ala yeke bi kota tënë na li ti lo, me ye oko ayeke daa pepe.

¹⁹Ala yeke papa na popo ti ala gi na ndö ti tënë ti lege ti vorongo Nzapa ti ala wani nga na ndö ti mbeni koli so iri ti lo Jésus. Lo kui awe, me Paul atene lo yeke na fini.

²⁰Mbi hinga li ti mbi na lege so mbi lingbi ti baa ya ti tënë so pepe. Ndani laa mbi hunda na Paul titene tongana lo yeda, lo gue na Jérusalem si a fâ ngbanga ti tënë so kâ.

²¹Me Paul ahunda titene a gue na lo na gbe ti kota gbia ti Rome si kota gbia ti Rome wani afâ ngbanga ti lo. Tongaso mbi mu yanga titene a bata lo na da ti kanga ti ku na lango so mbi yeke tokua lo na kota gbia ni.”

²²Agripa atene na Festus: “Mbi nga, mbi ye ti ma koli so.” Festus akiri tënë, atene: “Mo yeke ma lo kekereke.”

²³Na ndade ni, Agripa na Berenise aga; azo ayamba ala ngangu mingi, ala na aturugu ti kota kamba na akota zo ti gbata ni ali na ya ti da ti fango ngbanga. Festus amu yanga si ala mu Paul aga na lo.

²⁴Festus atene: “Gbia Agripa, na ala so kue ayeke na tere ti e ge so, ala baa koli so: azuife kue ti ndo so aga abaa mbi na tënë ti lo; ataa na Jérusalem wala ge, ala dekongo, atene: ‘Lo lingbi ti ngba na fini pepe!’

²⁵Ti mbi, mbi baa mbeni ye so lo sara titene a fâ lo ndali ni pepe. Me so lo wani, lo ye titene a gue na ngbanga ti lo na gbe ti kota gbia ti Rome, mbi yeda ti tokua lo na kota gbia ni.

²⁶Me mbi hinga mbirimbiri tënë so mbi lingbi ti su na mbeti ti tokua na kota gbia na ndö ti lo pepe. Ndani laa, mbi ga na lo na gbe ti ala, mbirimbiri na gbe ti mo, gbia Agripa si na peko ti gingo nda ti tënë ti lo, mbi hinga tënë so mbi lingbi ti su na mbeti.

²⁷Biani, na le ti mbi, ayeke buba ye titene a tokua zo ti kanga na kota gbia ti Rome kozo titene a fa nda ti tënë so a bi na li ti lo.”