Read sango Awatokua 26 Bible Online

Awatokua 26 - sango bible

Awatokua 26

¹Agripa atene na Paul: “Mbi mu na mo lege titene mo fa nda ti tënë ti mo.” Tongaso Paul asara maboko ti lo si lo to nda ti fa nda ti tënë ti lo, lo tene:

²“Gbia Agripa, be ti mbi anzere mingi laso ti fa na le ti mo nda ti atënë so kue azuife ayeke bi na li ti mbi.

³Biani, mo hinga lege ti sarango aye ti azuife na atënë so alondo na popo ti ala kue. Tongaso mbi hunda na mo ti kanga be ti mo ti ma mbi.

⁴“Azuife kue ahinga tënë ti dutingo ti mbi na molenge ngbii asi laso; ala hinga nga lege ti dutingo ti mbi na popo ti azo ti mara ti mbi nga na Jérusalem.

⁵Azuife ahinga mbi aninga awe. Tongana ala ye, ala lingbi ti tene na mo so mbi yeke ando mbeni zo ti bongbi ti *afarizien, bongbi ti azo ti vorongo Nzapa ti e so ayeke bata ndia ahon tanga ti azo kue.

⁶Fadeso, mbi yeke na gbe ti azo ti fango ngbanga ndali ti so mbi zia be ti mbi ti ku ye so Nzapa amu zendo ni na akotara ti e.

⁷Amara baleoko na use ti e azia be ti ala ti ku ti baa ye so Nzapa amu zendo ni, nilaa ala yeke sara kua ti Nzapa bi na lâ, ala woko na kua ni pepe. Mbi nga, gbia, mbi yeke ku ti baa ye ni so. Ye so azuife aga na mbi na gbe ti azo ti fango ngbanga ndali ni laa!

⁸Ngbanga ti nyen si ala, azuife, ala baa ti ala atene, Nzapa alingbi ti zingo azo na kuâ pepe so?

⁹Ti mbi, mbi baa lani mbi tene, alingbi mbi sara kue ti mingo iri ti Jésus, zo ti Nazaret.

¹⁰Ye so mbi sara na Jérusalem laa. Akota wayango-sandaga amu na mbi lege si na iri ti ala, mbi bi azo ti Christ mingi na da ti kanga. Na ndembe so azo ayeke fâ ngbanga ti kuâ na li ti ala, mbi nga, mbi yeda na tënë ni.

¹¹Lege mingi, mbi gue na ya ti ada ti sambelango Nzapa si mbi yeke sara pasi na ala, mbi yeke gbu ala na ngangu titene ala zonga Jésus. Ngonzo agbu mbi na tere ti ala ahon ndoni si mbi tumba peko ti ala ngbii mbi si na ya ti agbata ti awande ti sara ngangu na ala.”

¹²“Mbeni lâ, akota wayango-sandaga amu na mbi lege, ala mu na mbi yanga ti gue na Damas na iri ti ala.

¹³Gbia, nduru na bekombite so mbi yeke na lege ti gue, mbeni lumiere alondo na nduzu si aza na tere ti mbi na amba ti mbi so e na ala e yeke tambula so. Lumiere ni aza ahon sungo ti lâ.

¹⁴E kue, e ti na sese si mbi ma mbeni go so ayeke tene tënë na yanga ti *arameen, atene: ‘Saul, Saul, ngbanga ti nyen laa mo yeke sara ngangu na mbi? Mo yeke sara sioni na tere ti mo tongana nyama so akpo tere ti lo na yanga ti keke ti wa ti lo!’

¹⁵Mbi hunda ndo, mbi tene: ‘Mo yeke zo wa, *Kota Gbia?’ Kota Gbia akiri tënë, atene: ‘Mbi Jésus laa mo yeke sara ngangu na mbi so.

¹⁶Me londo, mo luti na nduzu. Ndani so mbi si na mo ayeke so: mbi soro mo titene mo ga zo ti kua ti mbi. Fade mo yeke ga zo ti tenengo peko ti ye so mo hinga na ndö ti mbi, ti fa lege so mo baa mbi laso. Mo yeke fa nga ye so mbi yeke kiri ande ti fa ni na mo.

¹⁷Mbi yeke zi mo na maboko ti azuife na azo ti amara nde so mbi yeke tokua mo na mbage ti ala.

¹⁸Mbi tokua mo ti zi le ti ala, ti mu ala na ya ti vukongo ndo ti sigigi na ala na ya ti lumiere; mo yeke zi ala na gbe ti ngangu ti Satan ti gue na ala na Nzapa. Tongana ala ma na be na mbi, fade a yeke zi siokpari na li ti ala si ala yeke wara ndo na popo ti azo ti Nzapa.’ ”

¹⁹“Ndani laa, gbia Agripa, ye so alondo na yayu si asi na mbi na ya ti mbeni ye tongana bango-li so, mbi ke ti sara ye ti peko ni pepe.

²⁰Me mbi to nda ti fa tënë ti Nzapa kozoni na azo ti Damas nga na azo ti Jérusalem. Na pekoni, mbi fa tënë ni na azo ti sese ti Judée kue nga na azo ti amara nde; mbi hunda na ala titene ala zia ngbene lege ti sarango ye ti ala ti kiri na mbage ti Nzapa, ala sara ye so afa atene, ala zia ngbene lege ti sarango ye ti ala awe.

²¹Ndani laa azuife agbu mbi lani na ya ti kota da ti Nzapa si ala gi lege ti fâ mbi.

²²Me Nzapa abata mbi ngbii asi laso si mbi ngba ti fa peko ti ye so asi mbi na azo kue: akete zo na akota zo. Mbi yeke tene gi tënë ti ye so Moïse na awayanga-Nzapa atene tënë ni ando si ye ni asi so.

²³Ala tene: fade *Mesii ayeke baa pasi si lo yeke duti kozo zo so ayeke zingo na popo ti akuâ, lo yeke fa lumiere na azo ti mara ti e nga na azo ti amara nde.”

²⁴So Paul afa nda ti tënë ti lo ngbii asi na ndo so, Festus adekongo na lo, atene: “Gbogbolinda asara mo, Paul! Mo manda mbeti mingi asara si mo ga zo ti gbogbolinda awe!”

²⁵Paul akiri tënë na lo: “Gbia Festus! Mbi yeke zo ti gbogbolinda pepe. Atënë so mbi yeke tene so ayeke taa-tënë si ayeke tënë ti zo so li ti lo ayeke daa.

²⁶Gbia Agripa ahinga tënë na ndö ti aye so kue. Ndani laa mbi lingbi ti tene tënë ni na lo na mbeto pepe, ngbanga ti so ye ni asi lani na hondengo ni pepe.

²⁷Gbia Agripa, mo ma na be na atënë so awayanga-Nzapa atene so? Mbi hinga so mo ma na be na ni!”

²⁸Agripa atene na lo: “Mo baa ti mo, mo tene, mbi yeke ga zo ti Christ gi hio tongaso?”

²⁹Paul akiri tënë, atene: “Ataa hio wala mbeni lâ, mbi yeke sambela Nzapa titene mo na ala so kue ayeke ma mbi laso, ala ga tongana mbi; me mbi ye titene a kanga ala na zingiri tongana mbi pepe!”

³⁰Tongaso gbia, na govoronere, na Berenise nga na azo so kue ayeke na tere ti ala alondo.

³¹So ala sigigi awe, ala yeke tene na popo ti ala, atene: “Koli so asara mbeni ye so alingbi na kuâ wala na kanga pepe.”

³²Agripa atene na Festus: “Tongana koli so ahunda fade ti gue na gbe ti kota gbia ti Rome pepe, ka a lingbi ti zi lo senge.”