Read sango Awatokua 7 Bible Online

Awatokua 7 - sango bible

Awatokua 7

¹Kota wayango-sandaga ahunda Étienne, atene: “Tënë ni ayeke tongaso?”

²Étienne akiri tënë: “Ababâ, a-ita, ala ma mbi! Kozo titene kotara ti e Abraham ague ti duti na kodro ti Haran, Nzapa ti gonda asi na lo na Mezopotamii

³si atene na lo: ‘Zia kodro ti mo na asewa ti mo, mo gue na kodro so mbi yeke fa na mo.’

⁴Tongaso Abraham azia kodro ti Kalde si lo gue, lo duti na kodro ti Haran. Na peko ti so babâ ti lo akui awe, Nzapa azi lo kâ si aga na lo ge na sese so ala yeke daa fadeso.

⁵Nzapa amu na lo mbeni sese na kodro ni pepe titene aga ti lo wani, ataa kete kete ndo titene lo zia gere ti lo daa. Me Nzapa atene na lo: ‘Fade mbi yeke mu kodro ni na mo titene aga ti mo na *ahale ti mo.’ Andaa na ndembe ni so, Abraham ayeke na molenge pepe.

⁶Nzapa atene na lo: ‘Fade ahale ti mo ayeke duti na mbeni kodro wande. Kâ, azo ayeke sara ala na ngbaa si ayeke sara ala pasi na ya ti ngu ngbangbo osio.

⁷Me fade mbi yeke fâ ngbanga na li ti azo ti mara so asara ala na ngbaa so si na pekoni, ala yeke sigigi na kodro ti ngbaa ni ti ga ti voro mbi na ndo so.’

⁸Na pekoni, Nzapa na Abraham asara *mbuki na lege ti *ganza. Tongaso Abraham afâ Isaac na ganza lango miombe na peko ti so a du lo; Isaac nga afâ molenge ti lo Jacob na ganza; Jacob afâ amolenge ti lo baleoko na use na ganza, ala so ayeke akotara ti e.

⁹“Akotara ti e asara kota be na tere ti Joseph, ala ka lo si lo ga ngbaa na kodro ti Ezipte. Me Nzapa ayeke na lo.

¹⁰Nzapa azi lo na ya ti aye ti ngangu so kue asi na lo. So Joseph asi na gbe ti Faraon, gbia ti Ezipte, Nzapa amu na lo ndara si lo sara titene gbia ni abaa lo na nzoni le. Tongaso gbia ni azia Joseph ti sara komandema na ndö ti Ezipte nga na ndö ti aye ti da ti lo kue.

¹¹Andaa mbeni kota nzara ati na ya ti kodro ti Ezipte na ti Kanaan kue. Pasi ayeke mingi, akotara ti e awara kobe ti tengo ni pepe.

¹²So Jacob ama a tene, kobe ti tengo ni ayeke na Ezipte, lo tokua akotara ti e kâ ti kozoni.

¹³Na guengo ti ala ti fani use ni, Joseph afa tere ti lo na a-ita ti lo si Faraon ahinga asewa ti Joseph.

¹⁴Tongaso Joseph atokua titene a ga na babâ ti lo Jacob nga na azo ti sewa ti lo so wungo ti ala kue ayeke balembarambara na oku.

¹⁵Nilaa Jacob ague na Ezipte. Kâ laa lo na akotara ti e akui.

¹⁶A mu kuâ ti ala, a gue na ni na gbata ti Sishem si a lu ala na ya ti du ti kuâ so Abraham avo ando kâ na nginza na maboko ti amolenge ti Hamor.

¹⁷“So ngoi aga nduru titene tënë ti zendo so Nzapa amu ando na Abraham aga taa-tënë, azo ti mara ti e adu mingi si ala si singo na Ezipte.”

¹⁸Na pekoni, mbeni gbia so ahinga Joseph pepe, ako na ndö ti mbata ti gbia na kodro ti Ezipte.

¹⁹Lo handa azo ti mara ti e si lo sara pasi na akotara ti e; lo gbu ala na ngangu ti zia akete molenge ti ala na gigi titene amolenge ni akui.

²⁰Na ngoi so laa a du Moïse, lo yeke pendere na le ti Nzapa. A bata lo na ya ti da nze ota.

²¹Na ndembe so a zia lo na gigi, molenge ti Faraon ti wali amu lo, abata lo tongana molenge ti lo wani.

²²Moïse amanda akode kue ti azo ti Ezipte. Lege ti tenengo tënë ti lo na sarango aye ti lo ayeke fa so lo yeke kpengba zo.

²³So ngu ti Moïse alingbi baleosio awe, lo leke na be ti lo ti gue ti baa a-ita ti lo, azo ti Israel.

²⁴Lo baa mbeni ita ti lo so mbeni zo ti Ezipte ayeke sara pasi na lo. Tongaso lo gbu koko ti ita ti lo so ayeke baa pasi so, lo kiri peko ti sioni ni na zo ti Ezipte si lo fâ lo.

²⁵Lo baa ti lo, lo tene fade a-ita ti lo, azo ti Israel ayeke hinga atene, na lege ti lo laa Nzapa ayeke sara titene ala sigigi na gbe ti ngbaa; me azo ti Israel ama ya ni pepe.

²⁶Lango oko na pekoni, lo baa azo ti Israel use so ayeke tiri si lo gue ti leke songo na popo ti ala. Lo tene na ala: ‘A-ita ti mbi, ala ma mbi; ala yeke a-ita, ala yeke tiri ngbanga ti nyen?’

²⁷Me lo so ayeke sara pasi na mba ti lo so apusu Moïse si atene na lo: ‘Zo wa laa azia mo makonzi ti fâ ngbanga na popo ti e?

²⁸Mo ye ti fâ mbi tongana ti so mo fâ zo ti Ezipte biri so?’

²⁹So Moïse ama tënë so, lo kpe, lo gue, lo duti na kodro ti Madian. Kâ, lo du amolenge-koli use.

³⁰“Ngu baleosio na pekoni, na ya ti benyama, nduru na hoto ti Sinai, mbeni *ange asi na Moïse na ya ti mbeni wâ so ayeke za na ya ti kete keke ti ki.

³¹So Moïse abaa ye so, li ti lo akpe si lo gue nduru ti baa ye ni nzoni. Tongaso lo ma go ti *Kota Gbia, atene:

³²‘Mbi yeke Nzapa ti akotara ti mo, Nzapa ti Abraham, ti Isaac na ti Jacob.’ Tere ti Moïse ayeke do na mbeto si lo ye ti kiri ti baa ye ni pepe.

³³Kota Gbia atene na lo: ‘Zi poro na gere ti mo, ngbanga ti so ndo so mo yeke luti daa so ayeke nde si ayeke nzoni kue.

³⁴Mbi baa azo ti mbi ayeke baa pasi mingi na Ezipte, mbi ma toto ti ala si mbi zu ti zi ala na gbe ti ngbaa. Fadeso mo gue, mbi yeke tokua mo na Ezipte.’

³⁵“Moïse so azo ti Israel ake lo si ala hunda ando lo, atene: ‘Zo wa laa azia mo makonzi ti fâ ngbanga na popo ti e?’, lo laa Nzapa atokua lo tongana makonzi na ndö ti azo ni ti zi ala na gbe ti ngbaa, na lege ti *ange so asi na lo na ya ti wâ so ayeke za na ya ti kete keke.

³⁶Moïse laa amu azo ni na Ezipte, lo sigigi na ala. Lo sara aye ti kpene na aye ti dongo be na Ezipte, na kota Ngu-bengba nga na ya ti benyama so ala sara ngu baleosio daa.

³⁷Moïse so laa atene na azo ti Israel, atene: ‘Fade Nzapa ayeke tokua mbeni wayanga ti lo na ala tongana ti so lo tokua mbi; lo yeke duti mbeni ita ti ala.’

³⁸Na ndembe so azo ti Israel abongbi tere na benyama, Moïse laa ayeke ando zo ti tokua na popo ti ange so atene tënë na lo na ndö ti hoto ti Sinai nga na akotara ti e; lo laa lo wara atënë so ayeke mu fini na zo titene lo fa ni na e.

³⁹Me akotara ti e ake ti ma yanga ti lo, ala ke lo si ala ye ti kiri na Ezipte.

⁴⁰Tongaso ala tene na Aaron: ‘Sara na e ambeni nzapa titene ala fa lege na e. Biani, Moïse so amu e na Ezipte, asigigi na e so, e hinga ye so asi na lo pepe.’

⁴¹Na lango ni so, ala leke mbeni kete bagara, ala mu *sandaga na yanda so si ala sara matanga ndali ti ye so maboko ti ala wani asara.

⁴²Nilaa Nzapa azia ala titene ala voro atongoro ti yayu, tongana ti so a tene tënë ni na ya ti mbeti ti awayanga-Nzapa, atene: ‘Ala azo ti Israel, anyama so ala fâ nga na sandaga so ala mu na ya ti ngu baleosio so ala sara na benyama so, ala ga na ni na mbi?

⁴³Oko pepe! Ala yo da ti bongo ti Molok, nzapa ti ala, ala yo nga limo ti tongoro ti Refan, nzapa ti ala, anzapa so ala wani aleke ti voro ala. Ndani laa fade mbi yeke sara titene a gbu ala ague na ala yongoro na mbage ti kodro ti Babilone kâ.’

⁴⁴“Na benyama, akotara ti e ayeke na da so a zia atêne na ya ni, atêne so a su atënë ti *mbuki na le ni. Nzapa amu yanga na Moïse ti leke da ni alingbi na kode so Moïse abaa.

⁴⁵So akotara ti e awara da ni awe, ala mu ni, ala na Josué ague na ni na ya ti akodro so ala mu ni na maboko ti amara so Nzapa atumba ala na dawa ti akotara ni. Da so angba na ya ti akodro ni ngbii asi na ngoi ti David.

⁴⁶Nzapa asara nzoni be na David si David ahunda na lo titene lo yeda si ni sara mbeni da ndali ti Nzapa ti Jacob.

⁴⁷Me Salomon laa asara da ni ndali ti Nzapa.

⁴⁸Me Nzapa so ayeke na yayu kâ na ndö ti aye kue ayeke lango na ya ti ada so azo asara ni na maboko ti ala pepe. Tënë ni alingbi na tënë so wayanga-Nzapa atene:

⁴⁹‘Yayu ayeke mbata ti mbi ti gbia, sese ayeke mbata so mbi yeke zia gere ti mbi na ndö ni. Kota Gbia atene: Mara ti da wa laa ala lingbi ti sara na mbi? Ndo so mbi lingbi ti wu tere ti mbi daa ayeke so wa?

⁵⁰Maboko ti mbi laa asara aye so kue pepe?’

⁵¹“Ala azo ti ngangu li, ala so a fâ be ti ala na mê ti ala na ganza pepe so, lakue ala yeke ke tënë ti Yingo-Vuru! Ala yeke tongana akotara ti ala!

⁵²Wayanga-Nzapa wa laa akotara ti ala azia ti sara ngangu na lo? Akotara ti ala afâ azo so atene kozoni tënë ti gango ti Zo ti mbirimbiri. Fadeso, ala laa aka Zo ti mbirimbiri ni si ala fâ lo!

⁵³Ataa so ala wara ando *Ndia ti Nzapa na lege ti *a-ange, ala sara ye alingbi na Ndia ni pepe!”

⁵⁴So azo ti *Kota Bongbi ti Fango Ngbanga ni ama tënë so, ngonzo ti ala alondo tongana wâ si ala yeke te pembe ti ala na tere ti Étienne.

⁵⁵Me Yingo-Vuru asi Étienne; lo baa ndo na yayu si lo baa gonda ti Nzapa nga na Jésus so aluti na tere ti Nzapa na mbage ti maboko ti lo ti koli.

⁵⁶Lo tene: “Mbi baa yayu azi si mbi baa *Molenge ti Zo so ayeke luti na tere ti Nzapa na mbage ti maboko ti lo ti koli!”

⁵⁷Azo ni adekongo ngangu, ala kanga mê ti ala si ala kue atuku legeoko na ndö ti Étienne.

⁵⁸Ala gboto lo, asigigi na lo na ya ti gbata ni si ala bo lo na têne. Azo so abi tënë na li ti Étienne na le ti ngbanga so, ala zia abongo ti ala kue na tere ti mbeni maseka-koli so iri ti lo Saul.

⁵⁹So ala yeke bo Étienne na têne, lo sambela, lo tene: “*Kota Gbia Jésus, mu yingo ti mbi!”

⁶⁰Na pekoni, lo kuku na sese si lo dekongo ngangu, lo tene: “Kota Gbia, zi siokpari so na li ti ala!” Na peko ti tënë so, lo kui.