Read sango Awatokua 9 Bible Online

Awatokua 9 - sango bible

Awatokua 9

¹Nzara ti sarango sioni na adisiple ti *Kota Gbia angba lakue na be ti Saul si lo yeke gi lege ti fâ ala. Tongaso, lo gue, lo baa kota wayango-sandaga,

²lo hunda na lo titene lo mu na lo ambeti so amu na lo lege ti gue na Damas ti li na ya ti ada ti sambelango Nzapa. Tongana lo wara ambeni koli na wali so amu lege ti Jésus, lo gbu ala si lo ga na ala na Jérusalem.

³Saul amu lege ti gue na Damas. So lo ga nduru na gbata ni, mo ye ti baa, mbeni lumiere alondo na nduzu si aza na tere ti lo kue.

⁴Lo ti na sese si lo ma mbeni go so atene na lo: “Saul, Saul, mo yeke sara ngangu na mbi ngbanga ti nyen?”

⁵Saul ahunda ndo, atene: “Mo yeke zo wa, Kota Gbia?” Go ni atene: “Mbi Jésus laa mo yeke sara ngangu na mbi so.

⁶Me mo londo, mo li na ya ti gbata ni. Kâ, fade a yeke fa na mo ye so mo lingbi ti sara.”

⁷Azo so ala na Paul ayeke tambula, aluti kpoo, li ti ala kue akpe; ala ma go ni, me ala baa zo oko pepe.

⁸Saul alondo na sese, lo zi le ti lo, me lo baa ndo pepe. Azo ni agbu maboko ti lo si ala gue na lo na Damas.

⁹Na ya ti lango ota, lo baa ndo pepe, lo te kobe pepe si lo nyon nga ngu pepe.

¹⁰Mbeni disiple ayeke na Damas, iri ti lo Ananias. Kota Gbia asi na lo na ya ti mbeni ye tongana bango-li si airi lo, atene: “Ananias!” Ananias ayeda, atene: “Mbi laa, Kota Gbia!”

¹¹Kota Gbia atene na lo: “Mo londo, mo gue na lege so iri ni Mbirimbiri-Lege, mo li na da ti Judas, mo hunda mbeni koli ti kodro ti Tarse so iri ti lo Saul. Na ndembe so, lo ngba ti sambela

¹²si lo baa mbeni koli so iri ti lo Ananias asi na lo na ya ti mbeni ye tongana bango-li. Koli ni ali si azia maboko na ndö ti Saul titene lo kiri lo baa ndo.”

¹³Ananias akiri tënë, atene: “Kota Gbia, azo mingi atene tënë ti koli so na mbi. Ala tene na mbi tënë ti aye ti sioni so kue lo sara na azo ti mo na Jérusalem.

¹⁴Lo ga ge na Damas na ngangu so akota wayango-sandaga amu na lo ti gbu azo so kue ayeke di iri ti mo ti kanga ala.”

¹⁵Me Kota Gbia atene na lo: “Gue, ngbanga ti so mbi soro koli so ti sara kua ti mbi, ti sara si amara nde, na agbia na azo ti Israel ahinga iri ti mbi.

¹⁶Mbi wani laa mbi yeke fa na lo pasi so lo yeke baa ande ndali ti iri ti mbi.”

¹⁷Tongaso Ananias ague, lo li na ya ti da so Saul ayeke daa; lo zia maboko na ndö ti Saul, lo tene: “Ita ti mbi Saul, Kota Gbia laa atokua mbi. Jésus so asi na mo na lege na gango ti mo, lo tokua mbi titene mo kiri mo baa ndo si mo si singo na Yingo-Vuru.”

¹⁸Gi hio tongaso, mbeni ye tongana *hali ti susu alondo na le ti Saul ati si lo kiri lo baa ndo. Lo londo si lo wara bateme.

¹⁹Na peko ti so lo te kobe awe, lo kiri lo wara ngangu. Saul na adisiple so ayeke na Damas aduti kete.

²⁰Gi hio na pekoni, lo gue na ya ti ada ti sambelango Nzapa si lo to nda ti fa tënë atene, Jésus ayeke Molenge ti Nzapa.

²¹Azo so kue ama lo, li ti ala akpe si ala hunda ndo, atene: “Koli so laa, na Jérusalem, ayeke sara lani ngangu na azo so ayeke di iri ti Jésus so pepe? Lo ga ge gi ti gbu ala, ti kanga ala, ti kiri na ala na akota wayango-sandaga pepe?”

²²Me Saul ayeke kpengba lakue na lege ti fango tënë; lo yeke fa biani so Jésus ayeke *Mesii. Nilaa azuife ti Damas ahinga tënë so ala lingbi ti kiri ni na lo pepe.

²³Lango mingi na pekoni, azuife ama tere ti fâ lo.

²⁴Me Saul ama tënë ni. Bi na lâ, azo ni ayeke bata ayanga ti gbagba ti gbata ni ti ku lo titene ala fâ lo.

²⁵Me na mbeni bi, adisiple ti lo amu lo, azia lo na ya ti sakpa, ala yoro lo na ya ti mbeni du ti tere ti gbagba so angoro gbata ni si ala zu lo na sese.

²⁶So Saul asi na Jérusalem, lo gi lege ti bongbi na adisiple; me mbeto ti lo asara ala kue. Biani, ala baa ti ala atene, lo yeke taa disiple pepe.

²⁷Na pekoni, Barnabas amu Saul na tere ti lo si lo gue na lo na popo ti *awatokua. Barnabas afa na ala lege so Saul abaa *Kota Gbia na lege ti Damas nga na lege so Kota Gbia atene tënë na Saul. Lo fa nga na ala lege so Saul afa tënë na iri ti Jésus na Damas na mbeto pepe.

²⁸Ti londo na ndembe ni so, Saul angba na tere ti ala si lo na ala ayeke tambula na ya ti Jérusalem kue. Lo fa tënë na iri ti Kota Gbia na mbeto pepe.

²⁹Lo tene tënë na azuife so ayeke tene yanga ti greke si lo na ala ayeke *bingbi tënë; me ala gi lege ti fâ lo.

³⁰So a-ita ama tënë ni, ala mu Saul ague na lo na Sezare si ala tokua lo na Tarse.

³¹Tongaso *Eglize ti sese ti Judée kue, ti Galile na ti Samarii ayeke lani na siriri. Na lege ti ngangu ti Yingo-Vuru, Eglize ni ayeke kpengba, ayeke kpe mbeto ti Kota Gbia si ayeke mai.

³²Pierre ayeke tambula na ya ti sese ni kue. Mbeni lâ, lo gue ti baa azo ti Nzapa so ayeke na gbata ti Lida.

³³Kâ, lo wara mbeni koli so iri ti lo Ene; mbage ti tere ti lo abuba si lo ngba na gbogbo na ya ti ngu miombe.

³⁴Pierre atene na lo: “Ene, Jésus Christ akai kobela ti mo awe! Londo, mo leke gbogbo ti mo!” Gi hio tongaso, Ene alondo.

³⁵Azo ti Lida kue nga na azo ti lando ti Saron abaa lo si ala kiri na mbage ti *Kota Gbia.

³⁶Na gbata ti Zope, mbeni wali ayeke daa so ayeke disiple ti Jésus, iri ti lo ayeke Tabita. Iri ti lo na yanga ti greke ayeke Dorkas, nda ni atene “Dengbe”. Lo mu ngoi ti lo kue ti sara anzoni ye na azo, ti mu maboko na azo ti mawa.

³⁷Mbeni lâ, lo ti na kobela si lo kui. A sukula kuâ ti lo si a zia na ya ti mbeni kubu ti da-nduzu ni.

³⁸Gbata ti Zope ayo na gbata ti Lida pepe. So adisiple ti Zope ama a tene, Pierre ayeke na Lida, ala tokua azo use na lo, atene: “Mo ga hio na e ge si!”

³⁹Tongaso Pierre alondo hio si lo na ala ague. So lo si kâ, ala gue na lo na ya ti kubu ti nduzu. Awali-mua abongbi na tere ti Pierre si ala yeke toto; ala yeke fa na lo anduzu-bongo na ayongoro bongo so Dorkas afu ni na ngoi so lo ngba na fini.

⁴⁰Pierre ahunda na azo ni kue ti sigigi; lo kuku na sese, lo sambela. Na pekoni, lo baa ndo na mbage ti kuâ ni si lo tene: “Tabita, londo!” Wali ni azi le ti lo si na bango Pierre, lo londo, lo duti na nduzu.

⁴¹Pierre ayoro maboko, agbu lo si ayo lo na nduzu. Na pekoni, lo iri azo ti Nzapa na awali-mua si lo fa na ala Tabita so ayeke na fini.

⁴²Tënë ni amu ya ti Zope kue si azo mingi ama na be na Kota Gbia.

⁴³Pierre angba na Zope aninga, na da ti mbeni zo so a iri lo Simon; lo yeke zo ti sarango kua ti poro ti nyama.