Read sango Rome 12 Bible Online

Rome 12 - sango bible

Rome 12

¹A-ita, so Nzapa abaa mawa ti e ahon ndoni awe so, mbi hunda na ala mingi titene ala mu tere ti ala kue na Nzapa tongana *sandaga so ayeke na fini, sandaga so ayeke nde, ayeke nzoni kue si anzere na lo. So mbirimbiri lege ti vorongo Nzapa laa.

²Ala mu lege ti dutingo ti azo ti dunia so pepe, me ala zia Nzapa asanze fini ti ala, lo mu na ala fini gbungo-li. Tongaso, fade ala lingbi ti hinga ye so Nzapa aye: ye so ayeke nzoni, ye so anzere na be ti lo, ye so ayeke nzoni kue.

³Nzapa asara nzoni be na mbi. Ndani laa mbi tene na ala oko oko kue, mbi tene: ala baa tere ti ala wani tongana akota zo pepe; me ala baa tere ti ala tongana asenge zo, alingbi na mabe so Nzapa amu na zo oko oko.

⁴Biani, tere ti zo ayeke gi oko, me ambage ti tere ni ayeke mingi, kua ti ambage ti tere ti zo ayeke nde nde.

⁵E nga, ataa so e yeke mingi, e ga tere oko awe na lege ti gango so e ga oko na Christ; e kue, e yeke bongbi na amba ti e na ya ti tere oko so, zo oko oko na ndo ti lo na ya ti tere ni.

⁶Nzapa amu na e amatabisi nde nde na lege ti nzoni be ti lo. Zo so ayeke na matabisi ti tenengo peko ti tënë ti yanga ti Nzapa, alingbi lo sara kua ni alingbi na mabe so lo yeke na ni.

⁷Zo so ayeke na matabisi ti sarango kua na amba ti lo, alingbi lo sara kua ni. Zo so ayeke na matabisi ti fango ye, alingbi lo fa ye.

⁸Zo so ayeke na matabisi ti mungo wango, alingbi lo mu wango. Zo so ayeke mu ye na azo, alingbi lo mu ni na vurungo be. Zo so ayeke na li ti bongbi, alingbi lo mu be ti lo kue na kua ni. Zo so ayeke mu maboko na azo ti mawa, alingbi lo sara ni na nzerengo be.

⁹Ala ye azo na be use pepe. Ala ke ye ti sioni na be ti ala oko, me ala mu tere ti ala kue na ye so ayeke nzoni.

¹⁰Ala ye tere na popo ti ala tongana ti so a-ita ayeke ye tere; zo oko oko agi lege ti ne mba ti lo kozoni.

¹¹Ala sara sopo pepe, me ala mu ngangu ti ala kue ti sara na kua ti *Kota Gbia; ala sara kua ni na be ti ala kue.

¹²Ala duti na ngia ngbanga ti ye so ala zia be ti ala ti ku; ala kanga be ti ala na ya ti aye ti pasi; ala zia lege ti sambela pepe.

¹³Ala mu maboko na azo ti Nzapa so ye atia ala, ala yamba agene nzoni.

¹⁴Ala sara tufa na ndö ti azo so ayeke sara ngangu na ala; ala sara tufa na ndö ti azo, me ala deba ala pepe.

¹⁵Ala sara ngia na azo so ayeke na ngia, ala toto na azo so ayeke toto.

¹⁶Ala ma tere na popo ti ala. Ala gi kota ndo pepe, me ala yeda ti sara asenge kua. Ala baa tere ti ala tongana azo ti ndara pepe.

¹⁷Tongana mbeni zo asara sioni na ala, ala kiri peko ni na lo pepe. Ala gi lege ti sara ye so ayeke nzoni na le ti azo kue.

¹⁸Tongana lege ayeke daa, tongana ala lingbi ti sara mbeni ye, ala duti na siriri na azo kue.

¹⁹A-ita ti mbi so mbi ye ala mingi, tongana zo asara sioni na ala, ala wani akiri peko ti sioni ni na zo ni pepe; me ala zia lege na ngonzo ti Nzapa ti sara ye na zo ni, ndali ti so na ya ti Mbeti ti Nzapa, Kota Gbia atene: “Mbi laa mbi yeke kiri peko ti sioni na zo so asara sioni, mbi laa mbi yeke kiri peko ti ye alingbi na sarango ye ti zo.”

²⁰Mbeti ni akiri atene: “Tongana nzara asara wato ti mo, mu na lo kobe lo te; tongana nzara ti ngu asara lo, mu na lo ngu, lo nyon. Tongana mo sara tongaso, ye ni ayeke tongana le ti wâ laa mo yeke zia na li ti lo.”

²¹Mo zia sioni ye ahon ndö ti mo pepe; me mo hon ndö ti sioni ye na lege ti sarango nzoni ye.