Read sango Rome 14 Bible Online

Rome 14 - sango bible

Rome 14

¹Zo so ama na be si ade ti kpengba pepe, ala yamba lo, ala kasa atënë ti be ti lo pepe.

²Mbeni zo so ama na be abaa ti lo atene, ni lingbi ti te ye kue, me mbeni zo so ade ti kpengba pepe ayeke te ti lo gi akugbe ti kasa.

³Zo so ayeke te ye kue, alingbi lo baa tongana zo ti buba pepe zo so ayeke te gi ambeni ye; na mbage, zo so ayeke te ye kue, alingbi zo so ayeke te gi ambeni ye akasa lo pepe. Biani, Nzapa ayamba nga zo so ayeke te ye kue tongana zo ti lo.

⁴Mo yeke ti mo zo wa ti kasa zo ti kua ti mbeni zo nde? Ataa lo ngba na nduzu wala lo ti, so abaa gi wa ti lo. Fade lo yeke ngba na nduzu, ndali ti so *Kota Gbia ayeke na ngangu ti sara si lo ngba na nduzu.

⁵Mbeni zo abaa mbeni lango tongana kota lango ahon atanga ni; mbeni zo abaa ti lo alango ni kue gi legeoko. Alingbi zo oko oko ahinga biani so tënë ti be ti lo ayeke na legeni.

⁶Zo so abaa mbeni lango tongana kota lango ahon atanga ni, lo yeke sara tongaso ndali ti Kota Gbia; zo so ayeke te ye kue, lo yeke te ni ndali ti Kota Gbia, ngbanga ti so lo yeke mu singila na Nzapa. Zo so ayeke te ye kue pepe, lo yeke sara tongaso ndali ti Kota Gbia, ngbanga ti so lo nga, lo yeke mu singila na Nzapa.

⁷Biani, zo oko na popo ti e ayeke duti na fini gi ndali ti lo wani pepe, zo oko na popo ti e ayeke kui gi ndali ti lo wani pepe.

⁸Tongana e ngba na fini, e ngba ndali ti Kota Gbia; tongana e kui, e kui nga ndali ti Kota Gbia. Tongaso, ataa e ngba na fini wala e kui, e yeke azo ti Kota Gbia.

⁹Christ akui si na pekoni, lo kiri na fini titene lo duti Kota Gbia ti akuâ na ti azo so angba na fini.

¹⁰Me mo, mo yeke kasa mba ti mo ngbanga ti nyen? Mo yeke baa amba ti mo tongana azo ti buba ngbanga ti nyen? Fade e oko oko kue, e yeke luti na le ti Nzapa titene lo fâ ngbanga ti e.

¹¹Mbeti ti Nzapa atene: “Mbi, Kota Gbia so mbi yeke na fini, mbi deba, mbi tene: fade azo kue ayeke kuku na gbe ti mbi si azo kue ayeke gonda mbi Nzapa.”

¹²Tongaso fade e oko oko kue, e yeke kiri tënë na Nzapa na ndö ti aye so kue e sara.

¹³Tongaso, alingbi e zia ti kasa amba ti e. Me ye so ala lingbi ti leke na be ti ala ayeke so: ala zia na dawa ti ita ti ala pepe mbeni ye so lo lingbi ti pika gere ti lo daa ti ti na ya ti siokpari wala mbeni ye so alingbi ti pusu lo ti sara sioni ye.

¹⁴Ti mbi, na lege ti gango so mbi ga oko na *Kota Gbia Jésus, mbi hinga biani so mbeni ye oko so ayeke *sioni ayeke daa pepe. Me tongana mbeni zo abaa mbeni ye tongana *sioni, ye ni ayeke *sioni gi na le ti zo ni.

¹⁵Tongana mba ti mo awara vundu ndali ti mbeni kobe so mo yeke te, so afa atene, mo sara ye na lege ti ndoye pepe. Zo so Christ akui ndali ti lo, alingbi mo buba lege ti lo ndali ti tënë ti kobe pepe!

¹⁶Ye so ala baa tongana nzoni ye ndali ti ala, alingbi aga sioni ye na le ti amba ti ala pepe.

¹⁷Biani, *Kodro-gbia ti Nzapa abaa tënë ti tengo kobe wala tënë ti nyongo ye pepe, me abaa tënë ti sarango ye ti mbirimbiri, ti siriri na ti ngia so Yingo-Vuru ayeke mu na zo.

¹⁸Zo so ayeke sara kua na Christ tongaso, lo yeke nzoni na le ti Nzapa si azo ayeda na tënë ti lo.

¹⁹Tongaso, alingbi e gi ye so ayeke ga na siriri si e oko oko kue, e kpengba na lege ti mabe.

²⁰Ndali ti tënë ti kobe, mo buba lege ti kua ti Nzapa pepe! Biani, kobe kue ayeke *nzoni, me tongana aga mbeni ye so zo ayeke pika gere ti lo daa ti ti na ya ti siokpari, andaa tengo kobe ti mo ni aga ye ti sioni awe.

²¹Ye so ayeke nzoni ayeke titene mo te nyama pepe, mo nyon samba pepe, so ti tene mo ke ti sara ye so kue ita ti mo alingbi ti pika gere ti lo daa ti ti na ya ti siokpari.

²²Ye so mo hinga biani na be ti mo na ndö ti ye so, tënë ni angba na popo ti mo na Nzapa. Ti lo nzoni, zo so aye ti sara mbeni ye si lo bi tënë na li ti lo wani pepe!

²³Me zo so ayeke dekite na be ti lo ndali ti kobe so lo yeke te, Nzapa afâ ngbanga na li ti lo awe, ndali ti so sarango ye ti lo ayeke na lege ti mabe pepe. Biani, ye so kue zo asara na lege ti mabe pepe ayeke siokpari.