Read sango Rome 2 Bible Online

Rome 2 - sango bible

Rome 2

¹Mo so mo yeke fâ ngbanga na li ti amba ti mo so, ataa mo yeke zo wa, mo baa ti mo, mo tene, mo yeke sigigi na ya ti tënë ni? So mo yeke fâ ngbanga na li ti amba ti mo so, mo yeke fâ nga ngbanga na li ti mo wani, ndali ti so mo nga, mo yeke sara mara ti aye so.

²Biani, e hinga so, na lege ti taa-tënë, Nzapa ayeke fâ ngbanga na li ti zo so ayeke sara aye tongaso.

³Mo so mo yeke fâ ngbanga na li ti azo so ayeke sara aye so si mo nga, mo yeke sara mara ti aye ni so, mo baa ti mo, mo tene, ngbanga ti Nzapa ayeke ti ande na li ti mo pepe?

⁴So Nzapa ayeke sara nzoni be mingi na mo, lo yeke fâ ngbanga na li ti mo hio pepe si lo yeke kanga be ti lo ti ku mo so, so ayeke senge na le ti mo? Lo yeke sara nzoni be na mo titene mo zia ngbene lege ti sarango ye ti mo; mo hinga so pepe?

⁵Me be ti mo akpengba si mo ye ti zia ngbene lege ti sarango ye ti mo ni pepe. Ndani laa mo yeke bongbi gba ti ngonzo ti Nzapa na ndö ti mo ti ku na lango ti ngonzo ti ndani. Na lango ni so, lo yeke fa so fango ngbanga ti lo ayeke mbirimbiri,

⁶lo yeke futa zo oko oko alingbi na ye so zo ni asara.

⁷Azo so amu be ti ala kue ti gi ti sara nzoni ye, ala yeke gi titene Nzapa agonda ala, lo ne ala si lo mu na ala fini so angba lakue lakue, fade Nzapa ayeke mu lege na ala ti duti na fini kpu na kpu.

⁸Me azo so ake ti ma yanga ti lo, ala so ake taa-tënë si ye so ayeke sioni ayeke gboto ala, fade ngonzo ti Nzapa ayeke londo tongana wâ na tere ti ala.

⁹Azo so kue ayeke sara ye ti sioni, fade ye ti ngangu na pasi ayeke si na ala, azuife kozoni si na pekoni azo ti amara nde.

¹⁰Me azo so ayeke sara ye ti nzoni, fade Nzapa ayeke gonda ala, lo yeke ne ala si lo yeke mu na ala siriri, azuife kozoni si na pekoni azo ti amara nde.

¹¹Biani, Nzapa ayeke mu mbage ti mbeni zo pepe.

¹²Azo so kue ahinga *Ndia ti Moïse pepe si ala yeke sara siokpari, fade ala yeke kui, ataa so ala hinga ndia ni pepe; me azo so kue ahinga Ndia ti Moïse si ala yeke sara siokpari, fade a yeke fâ ngbanga ti ala na lege ti Ndia ni.

¹³Azo so ama tënë ti Ndia gi na mê ti ala aga nzoni na le ti Nzapa pepe, me azo so asara ye alingbi na tënë ti Ndia ni laa aga nzoni na le ti lo.

¹⁴Azo ti amara nde ahinga Ndia ti Moïse pepe, me tongana ti so be ti ala afa na ala, ala yeke sara ye alingbi na Ndia ni; so ti fa atene, ndia ti ala ayeke na be ti ala wani, ataa so ala yeke na Ndia pepe.

¹⁵Sarango ye ti ala afa so aye so Ndia ti Moïse ahunda ayeke na be ti ala. Be ti ala afa so ye ni ayeke tongaso, lege ti gbungo-li ti ala afa so ye ni ayeke nga tongaso. Lege ti gbungo-li ti ala ni ayeke fa na ala so ala sara sioni, na mbage ayeke gbu koko ti ala na ndö ti ye so ala sara.

¹⁶Ye so ayeke sigigi polele na lango ti fango ngbanga laa. Tongana ti so Nzoni Tënë so mbi yeke fa atene tënë ni, na lango ni so, fade Nzapa ayeke fâ ngbanga ti ye so kue azo ayeke sara na hondengo ni, na lege ti Jésus Christ.

¹⁷Ti mo so mo tene mo yeke zuife so, mo zia be ti mo na ndö ti *Ndia si mo yeke pika kate ti mo ndali ti Nzapa ti mo.

¹⁸Mo hinga ye so be ti Nzapa aye, Ndia afa na mo ti hinga ye so ayeke nzoni.

¹⁹Mo tene na be ti mo, mo tene, mo yeke zo ti fango lege na awaziba si mo yeke lumiere ndali ti azo so ayeke na ya ti vukongo ndo,

²⁰mo yeke wafango-ye na azo so ahinga ndo pepe, mo yeke wafango-ye na amolenge. Biani, mo tene mo hinga Ndia si Ndia ni afa na mo hingango ye kue nga na taa-tënë awe.

²¹Tongaso, mo so mo yeke fa ye na azo, ngbanga ti nyen si mo fa ye na mo wani pepe? Mo so mo yeke fa tënë, mo tene, alingbi zo anzi pepe so, ngbanga ti nyen si mo yeke nzi?

²²Mo so mo ke titene zo agi wali wala koli ti mba ti lo, ngbanga ti nyen si mo yeke gi wali wala koli ti mba ti mo? Mo so mo ke tënë ti sambelango ayanda, ngbanga ti nyen si mo yeke nzi aye so ayeke na ya ti ada ti ayanda ni?

²³Mo yeke pika kate ti mo ndali ti Ndia, me ngbanga ti nyen si sarango ye ti mo alingbi na tënë ti Ndia pepe? Ngbanga ti nyen si mo yeke ne Nzapa pepe?

²⁴Biani, Mbeti ti Nzapa atene: “Ndali ti ala azuife, azo ti amara nde ayeke zonga iri ti Nzapa.”

²⁵Taa-tënë, tongana mo fâ *ganza si mo yeke sara ye alingbi na Ndia, fango ganza ni ayeke sara nzoni na mo; me tongana mo fâ ganza si mo sara ye alingbi na Ndia pepe, mo yeke tongana zo so afâ ganza pepe.

²⁶Zo so afâ ganza pepe si lo sara ye alingbi na Ndia, na le ti Nzapa lo yeke tongana zo so afâ ganza awe.

²⁷Zo ti mbeni mara nde so afâ ganza pepe si lo yeke sara ye alingbi na Ndia, fade lo yeke fâ ngbanga na li ti mo so mo yeke zuife ndali ti so mo fâ ganza awe, me mo yeke sara ye alingbi na Ndia pepe so.

²⁸Ye so azo ayeke baa wala ka ti ganza so ayeke na tere ti zo, so laa ayeke sara si zo aga taa zuife pepe;

²⁹me taa zuife ayeke zuife so ayeke na ya ti be ti lo kâ, taa fango ganza ayeke ganza ti be, aga na lege ti Yingo ti Nzapa, me na lege ti Ndia so a su na mbeti pepe. Taa zuife, azo laa ayeke gonda lo pepe, me Nzapa.