Read sango 1 Korente 12 Bible Online

1 Korente 12 - sango bible

1 Korente 12

¹A-ita, tënë na ndö ti amatabisi ti Yingo-Vuru, mbi ye si ala hinga ni nzoni.

²Na ndembe so ala de ando ti hinga Nzapa pepe, a gboto ala ti gue na peko ti anzapa nde so ayeke tene tënë laoko pepe.

³Ndani laa, mbi tene na ala: zo so Yingo ti Nzapa ayeke tene tënë na lege ti lo, lo lingbi ti tene sioni tënë na iri ti Jésus pepe. Tongana Yingo-Vuru ayeke na zo pepe, zo ni alingbi ti tene pepe: “Jésus ayeke *Kota Gbia”.

⁴Amatabisi ayeke nde nde, me ala kue alondo gi na Yingo oko.

⁵Alege ti sarango na *Kota Gbia ayeke nde nde, me Kota Gbia ayeke gi oko.

⁶Akua ayeke nde nde, me gi oko Nzapa so laa ayeke mu ngangu na azo kue ti sara akua ni kue.

⁷Yingo ayeke sara kua na ya ti zo oko oko na lege ti matabisi so a mu na zo ni ndali ti nzoni ti atanga ti azo ni kue.

⁸Yingo ayeke mu na mbeni zo tënë ti ndara si na mbeni zo, lo yeke mu tënë ti hingango ye;

⁹gi oko Yingo so ayeke mu na mbeni zo matabisi ti mabe; gi oko Yingo so ayeke mu na mbeni zo matabisi ti kaingo kobela;

¹⁰lo yeke mu na mbeni zo ngangu ti sarango aye ti kpene; lo yeke mu na mbeni zo lege ti tenengo peko ti tënë ti yanga ti Nzapa; lo yeke mu na mbeni zo lege ti hingango ye so alondo na Yingo na ye so alondo na Yingo pepe; lo yeke mu na mbeni zo lege ti tenengo tënë na ambeni yanga nde so zo ahinga ni pepe; lo yeke mu na mbeni zo lege ti kiringo peko ti ayanga ni na amba ti lo.

¹¹Me gi oko Yingo so laa ayeke sara aye so kue; lo laa lo yeke kangbi amatabisi so kue na azo tongana ti so be ti lo aye.

¹²Tere ti zo ayeke oko, me ambage ti tere ni ayeke mingi. Ataa so ambage ti tere ti zo ayeke mingi, ala kue abongbi aga gi tere oko. Ti Christ, ye ni ayeke nga gi tongaso.

¹³Ataa e yeke azuife wala e yeke azuife pepe, ataa e yeke angbaa wala angbaa pepe, e kue, e wara bateme ti Yingo oko titene e bongbi e ga tere oko; Nzapa amu na e kue gi oko Yingo so.

¹⁴Biani, mbage ti tere oko laa ayeke ngbongboro tere ti zo pepe, me ambage ni mingi laa abongbi aga tere ni.

¹⁵Tongana gere atene: “Ka so mbi yeke maboko pepe so, mbi yeke mbage ti tere pepe”, so laa asara si lo ngba mbage ti tere ni pepe?

¹⁶Tongana mê atene: “Ka so mbi yeke le pepe so, mbi yeke mbage ti tere pepe”, so laa asara si lo ngba mbage ti tere ni pepe?

¹⁷Tongana tere kue ayeke fade gi le, ka zo ayeke ma ndo na nyen? Tongana tere kue ayeke fade gi mê, ka zo ayeke ma fion ti ye na nyen?

¹⁸Me Nzapa azia ambage ti tere ti e oko oko na ndo so be ti lo aye.

¹⁹Tongana mbage ti tere ti zo ayeke fade gi oko, ka ngbongboro tere ni ayeke na ndo wa?

²⁰Tongaso, ambage ti tere ti zo ayeke mingi, me tere ni ayeke gi oko.

²¹Le alingbi ti tene na maboko pepe, atene: “Ngba na ti mo ni kâ!” Li nga alingbi ti tene na gere pepe, atene: “Ngba na ti mo ni kâ!”

²²Me ambage ti tere so zo abaa ni tongana ye so ayeke na ngangu pepe so, ala laa ayeke bata tere ni na fini.

²³Ambage ti tere so na le ti e, e yeke ne ni pepe so, ala laa e yeke ne ala mingi. Ambage ti tere so zo ayeke di iri ni kirikiri pepe so, ala yeke sara nzoni;

²⁴ti atanga ti mbage ti tere so ayeke pendere, tënë ayeke daa pepe. Me Nzapa aleke tere ti zo si lo mu nengo na ambage ti tere ni so azo ayeke ne ni pepe.

²⁵Nzapa asara tongaso titene kangbi aduti na popo ti ambage ti tere ni pepe si ambage ti tere ni oko oko amu maboko na amba ti ala.

²⁶Tongana mbeni mbage ti tere oko ayeke baa pasi, atanga ni kue ayeke baa pasi legeoko na lo. Tongana a ne mbeni mbage ti tere oko, fade ayeke ne nga atanga ni kue.

²⁷Biani, ala kue, ala yeke tere ti Christ, ala oko oko kue ayeke ambage ti tere ti lo.

²⁸Tongaso, lege so Nzapa azia azo na ya ti *Eglize laa: kozoni, lo zia *awatokua; use ni, lo zia awayanga-Nzapa; ota ni, lo zia awafango-ye; na pekoni, lo zia azo so lo mu na ala matabisi ti sarango aye ti kpene, ti kaingo kobela, ti mungo maboko na amba ti ala, ti dutingo na li ti amba ti ala, ti tenengo tënë na ayanga nde nde so ala hinga ni pepe.

²⁹Azo kue laa ayeke awatokua? Azo kue laa ayeke awayanga-Nzapa? Azo kue laa ayeke awafango-ye? Azo kue laa ayeke sara aye ti kpene?

³⁰Azo kue laa ayeke na matabisi ti kaingo kobela? Azo kue laa ayeke tene tënë na ayanga nde? Azo kue laa ayeke kiri peko ti ayanga ni na amba ti ala?

³¹Na popo ti amatabisi so Yingo ayeke mu na azo, ala gi lege ti wara amatabisi so ayeke nzoni ahon atanga ni. Me fadeso, mbi yeke fa na ala mbeni lege so ayeke nzoni ahon atanga ni kue.