Read sango 1 Korente 15 Bible Online

1 Korente 15 - sango bible

1 Korente 15

¹A-ita, mbi yeke kiri ti dabe ti ala na ndö ti Nzoni Tënë so mbi fa na ala, ala yamba ni si be ti ala ayeke gi na ndö ni so.

²Tongana ala bata Nzoni Tënë ni tongana ti so mbi fa na ala, fade ala yeke soo kuâ gi na lege ni. Tongana ala bata ni na legeni pepe, andaa mabe ti ala ayeke senge senge.

³Kozo ye so mbi fa na ala ayeke tënë so mbi wani, mbi ma: Christ akui ndali ti siokpari ti e tongana ti so Mbeti ti Nzapa atene.

⁴A lu lo, na lango ota ni, lo zingo na kuâ tongana ti so Mbeti ti Nzapa atene.

⁵Lo si na Pierre, na pekoni, lo si na adisiple baleoko na use.

⁶Na pekoni, lo si na azo so wungo ti ala ahon ngbangbo oku — mingi na popo ti ala angba na fini laso, ambeni akui awe — .

⁷Na pekoni, lo si na Jacques, na pekoni, lo si na *awatokua kue.

⁸Tanga ti zo so lo si na lo ayeke mbi, mbi so mbi yeke tongana mbeni molenge so a du lo kozo si ngoi ti dungo lo alingbi.

⁹Biani, mbi yeke kete ahon awatokua kue; mbi lingbi nga titene a iri mbi watokua pepe, ngbanga ti so mbi sara ngangu na azo ti *Eglize ti Nzapa.

¹⁰Me ndali ti nzoni be ti Nzapa, mbi ga zo so ala yeke baa lo laso so; nzoni be so Nzapa asara na mbi, peko ni angba senge pepe. Mbi sara kua ahon atanga ti awatokua kue, andaa mbi laa mbi sara kua ni pepe, me Nzapa so ayeke na mbi laa asara kua ni na lege ti nzoni be ti lo.

¹¹Tongaso, ataa mbi wala ambeni watokua ni, tënë so e yeke fa laa, tënë so ala ma na be na ni nga laa, a-ita.

¹²So e yeke fa tënë, e tene, Christ azingo na kuâ awe so, asara tongana nyen si ambeni zo na popo ti ala ayeke tene akuâ ayeke zingo ande pepe so?

¹³Tongana zingongo ti akuâ ayeke daa pepe, andaa Christ nga azingo na kuâ pepe.

¹⁴Tongana Christ azingo na kuâ pepe, andaa tënë so e yeke fa ayeke senge senge, mabe ti e nga ayeke gi senge senge.

¹⁵Tongana akuâ ayeke zingo biani pepe, so afa atene, Nzapa azingo Christ na kuâ pepe. Tongana ye ni ayeke tongaso, andaa e yeke azo ti tenengo mvene na li ti Nzapa, ngbanga ti so e tene, lo zingo Christ na kuâ.

¹⁶Tongana akuâ ayeke zingo pepe, so aye ti tene, Christ nga azingo na kuâ pepe.

¹⁷Tongana Christ azingo na kuâ pepe, andaa mabe ti ala ayeke senge senge, siokpari ti ala angba na li ti ala.

¹⁸So aye ti fa nga atene, ala so aga oko na Christ si ala kui so, ala girisa biani awe.

¹⁹Tongana ye so e zia be ti e ti ku na maboko ti Christ ayeke gi fini so e yeke na ni laso, andaa e yeke azo ti mawa ahon azo kue!

²⁰Me ye ni ayeke tongaso pepe: Christ azingo na kuâ kozoni ti fa biani so azo so akui ayeke zingo ande na kuâ.

²¹Biani, so kuâ aga na dunia so na lege ti zo oko, na lege ti zo oko nga si lege ti zingongo ti akuâ azi na azo.

²²Tongana ti so azo kue ayeke kui ndali ti so ala yeke oko na Adam, legeoko nga fade azo kue ayeke wara lege ti duti na fini ndali ti gango so ala ga oko na Christ.

²³Me fade zo oko oko ayeke zingo na kuâ tongana ngoi ti lo alingbi: kozo zo so azingo na kuâ ayeke Christ; na pekoni, fade azo ti Christ laa ayeke zingo na kuâ na lango ti gango ti lo.

²⁴Na peko ti so Christ akinda ngangu ti ayingo so kue ayeke na komandema awe, fade aye kue ayeke si na ndani si Christ ayeke kiri na mbata ti gbia ni na Nzapa Babâ.

²⁵Biani, alingbi Christ ale-gbia ngbii Nzapa azia awato ti lo kue na gbe ti gere ti lo.

²⁶Ndangba wato so lo yeke nika lo ayeke kuâ.

²⁷Biani, Mbeti ti Nzapa atene: “Nzapa azia ye kue na gbe ti gere ti lo.” Me so aye ti tene, Nzapa so azia ye kue na gbe ti Christ so, lo wani, lo yeke na gbe ti Christ pepe.

²⁸Tongana ye kue aga na gbe ti Christ awe, fade Molenge ni ayeke duti na gbe ti Nzapa so asara titene ye kue aga na gbe ti lo so. Tongaso laa Nzapa ayeke le-gbia biani na ndö ti ye kue.

²⁹Tongana ye ni ayeke tongaso pepe, nyen laa azo so ayeke wara bateme ndali ti akuâ so ayeke gi? Tongana akuâ ayeke zingo pepe, ngbanga ti nyen si azo ni ayeke hunda titene ala wara bateme ndali ti akuâ ni?

³⁰Me ti e, ngbanga ti nyen laa na ngoi kue, e yeke gue na le ti kuâ so?

³¹Lakue, kuâ ayeke gi mbi gingo, taa-tënë, a-ita! Taa-tënë, mbi yeke gonda tere ti mbi ndali ti ala, ala so e na ala e ga oko na *Kota Gbia ti e Jésus Christ awe.

³²Tongana mbi zia be ti mbi gi na ndö ti tënë ti azo, nda ti tiri so mbi tiri na azo so ayeke tongana asioni nyama ti ngonda na gbata ti Efeze so ayeke nyen? Tongana akuâ ayeke zingo pepe, tongana ti so ambeni zo ayeke tene: “E te, e nyon, ngbanga ti so kekereke, e yeke kui ti e kuingo.”

³³Ala handa tere ti ala pepe. “Mo mu peko ti zo ti sioni, mo yeke ga zo ti sioni.”

³⁴Ala sara ye tongana azo so li ti ala ayeke daa, ala sara siokpari pepe! Biani, ambeni zo na popo ti ala ahinga Nzapa pepe. A-ita, mbi yeke tene tënë so ti zia kamene na le ti ala.

³⁵Fade mbeni zo ayeke hunda ndo, atene: “Fade akuâ ayeke zingo tongana nyen? Tere wa laa ala yeke duti na ni?”

³⁶Zo ti buba, gbu li ti mo kete si! Le ti kobe so mo yeke lu, tongana akui si fini ni asigigi na peko ni.

³⁷Ye so mo yeke lu ayeke keke ti kobe ni pepe, me ayeke gi asenge le ni, le ti *ble wala mbeni le ti kobe nde.

³⁸Na pekoni, Nzapa ayeke mu mbeni tere na le ti kobe ni tongana ti so be ti lo aye; le ti kobe oko oko ayeke wara tere so alingbi na lo wani.

³⁹Tere ti aye so kue ayeke na fini ayeke nde nde: tere ti azo ayeke nde, tere ti anyama ayeke nde, tere ti andeke ayeke nde si tere ti asusu nga ayeke nde.

⁴⁰Tere ti aye ti yayu ayeke daa si tere ti aye ti sese ayeke nga daa; pendere ti aye ti yayu ayeke nde na pendere ti aye ti sese.

⁴¹Pendere ti lâ ayeke nde, pendere ti nze ayeke nde, pendere ti atongoro ayeke nde; ataa na popo ti atongoro, pendere ti ala ayeke nde nde.

⁴²Fade ye ni ayeke duti tongaso na zingongo ti akuâ. Tere so a lu ni, ayeke tere so ayeke buba; tere so a zingo ni na kuâ, ayeke kiri ti buba pepe.

⁴³Tere so a lu ni, ayeke tere so zo ayeke na nzara ti baa ni pepe; tere so a zingo ni na kuâ, ayeke tere so a yeke gonda ni; tere so a lu ni, ayeke tere so awoko; tere so a zingo ni na kuâ ayeke tere so ayeke na ngangu.

⁴⁴Tere so a lu ni, ayeke tere ti senge zo ti sese; tere so a zingo ni na kuâ, ayeke tere so Yingo ti Nzapa amu fini na ni. Tongaso, tere ti senge zo ti sese ayeke daa; tere so Yingo ti Nzapa ayeke mu fini na ni, ayeke nga daa.

⁴⁵Ndani laa Mbeti ti Nzapa atene: “Adam so ayeke kozo zo, aga zo so ayeke na fini”; me Christ so ayeke nga Adam ti ndani, ayeke Yingo so ayeke mu fini na zo.

⁴⁶Zo so aga kozoni ayeke zo ti Yingo pepe, me senge zo ti sese; zo ti Yingo aga na pekoni.

⁴⁷Kozo zo so Nzapa amu sese si asara na lo, ayeke zo ti sese; use zo ni alondo ti lo na yayu si aga.

⁴⁸Azo ti sese ayeke gi tongana lo so Nzapa amu sese si asara na lo. Azo ti yayu ayeke gi tongana lo so alondo na yayu si aga.

⁴⁹Tongana ti so e kpa tere na lo so Nzapa amu sese asara na lo, fade e yeke kpa tere na lo so alondo na yayu si aga.

⁵⁰A-ita, tënë so mbi tene ayeke so: tere ti e ti zo alingbi ti li na ya ti *Kodro-gbia ti Nzapa pepe; ye so ayeke buba bubango alingbi ti wara lege ti ngba na fini lakue lakue pepe.

⁵¹Mbi ye ti fa na ala mbeni ye so angba na hondengo ni: fade e yeke kui kue pepe, me fade tere ti e kue ayeke ga nde

⁵²gi hio tongaso, tongana ti so zo ayeke ko le ti lo na ndembe so tanga ti tatalita ayeke toto. Biani, na ndembe so tatalita ni ayeke toto, akuâ ayeke zingo na mbeni tere so ayeke kiri ti buba pepe; ti e, tere ti e ayeke ga nde.

⁵³Alingbi tere so ayeke buba aga tere so ayeke kiri ti buba pepe; tere so ayeke kui aga tere so alingbi ti kui pepe.

⁵⁴Tongana tere so ayeke buba aga tere so akiri ti buba pepe si tere so ayeke kui aga tere so alingbi ti kui pepe, fade tënë so Mbeti ti Nzapa atene ayeke ga taa-tënë. Mbeti ni atene: “A buba kuâ biani biani awe, a so benda na ndö ti lo biani awe!”

⁵⁵“Kuâ, ngangu so mo yeke hon ndö ti azo na ni so ayeke na ndo wa? Kuâ, ye so mo yeke fâ azo na ni so ayeke na ndo wa?”

⁵⁶Ye so kuâ ayeke fâ azo na ni ayeke siokpari; ye so amu ngangu na siokpari ayeke ndia.

⁵⁷Me e mu singila na Nzapa so ayeke sara titene, na lege ti Kota Gbia ti e Jésus Christ, e so benda!

⁵⁸Tongaso, a-ita ti mbi so mbi ye ala mingi, ala luti ngangu, ye ayingi ala pepe! Ala ngba lakue na sarango kua ti Kota Gbia. Ayeke nzoni, ala hinga atene, kua so ala yeke sara na Kota Gbia, peko ni ayeke ngba senge pepe.