Read sango 1 Korente 3 Bible Online

1 Korente 3 - sango bible

1 Korente 3

¹Ti mbi, a-ita, mbi lingbi ti tene tënë na ala pepe tongana ti so mbi yeke tene tënë na azo so ayeke na Yingo ti Nzapa; me mbi tene tënë ni na ala tongana ti so a yeke tene tënë na azo ti dunia so, wala na azo so aga oko na Christ, me ala ngba akete molenge na lege ti mabe.

²Ngu ti me laa mbi mu na ala ti nyon, mbi mu na ala kpengbango kobe pepe, ngbanga ti so ala lingbi ti te ni pepe. Ataa fadeso, ala lingbi nga ti te ni pepe,

³ngbanga ti so ala ngba lakue ti sara ye gi tongana ti azo ti dunia so. So tënë ti kota be na papa angba na popo ti ala so, so afa atene, ala yeke sara ye gi na lege ti azo ti dunia so pepe? Ala yeke sara ye gi tongana ti azo kue pepe?

⁴So mbeni zo na popo ti ala atene: “Mbi yeke ti mbi zo ti Paul” si mbeni atene: “Mbi yeke ti mbi zo ti Apolos”, so sarango ye tongana ti azo kue laa pepe?

⁵Apolos ayeke zo wa? Paul ayeke zo wa? Ala yeke gi azo ti kua so Nzapa amu ala ti sara si ala, azo ti Korente ama na be. Zo oko oko na popo ti azo ti kua ni asara gi ye so *Kota Gbia amu na lo ti sarango ni.

⁶Mbi laa mbi lu ye, Apolos atuku ngu na ndö ni, me Nzapa asara si ye ni asigigi si amai.

⁷Tongaso, zo so alu ye ayeke ye pepe, zo so atuku ngu na ndö ni ayeke nga ye pepe; me kota ye ni ayeke Nzapa so asara titene ye ni amai.

⁸Zo so alu ye na zo so atuku ngu na ndö ni, ala kue ayeke gi legeoko. Fade Nzapa ayeke mu na zo oko oko futa ti lo alingbi na kua so lo sara.

⁹Biani, e na Nzapa laa e yeke sara kua oko, ala yeke tongana yaka ti Nzapa. Ala yeke nga tongana da ti Nzapa.

¹⁰Na lege ti nzoni be so Nzapa asara na mbi, mbi sara kua tongana nzoni wakode ti sarango da; mbi leke gere ti da ni si mbeni zo nde asara da na ndö ni. Me ayeke nzoni zo oko oko asara hange na lege so lo yeke sara da na ndö ti gere ti da ni.

¹¹Mbeni zo alingbi ti leke mbeni gere ti da nde pepe, gi gere ti da so a leke ni kozo awe, so ayeke Jésus Christ.

¹²Na ndö ti gere ti da ni, ambeni zo asara da na lôro, wala na wen ti nginza wala na atêne ti ngangu ngere, ambeni asara ti ala da ni na keke wala na amara ti holengo pere nde nde.

¹³Fade a yeke fa kua ti zo oko oko na le ti azo kue na lango ti fango ngbanga. Na lango ni so, fade wâ ayeke tara kua ti zo oko oko ti fa wala kua ni ayeke nzoni wala sioni.

¹⁴Zo so asara da si da ni angba, fade lo yeke wara futa ti kua ti lo.

¹⁵Zo so da ti lo agbi, fade lo yeke wara ye pepe, lo wani, lo yeke soo kuâ, me lo yeke soo kuâ ni tongana ti zo so asigigi na ya ti wâ.

¹⁶Ala hinga pepe atene, ala yeke da ti Nzapa si Yingo ti Nzapa aduti na be ti ala?

¹⁷Tongana mbeni zo abuba da ti Nzapa, fade Nzapa ayeke buba lo. Biani, da ti Nzapa ayeke nde si ayeke nzoni kue, ala laa ayeke da ti Nzapa ni.

¹⁸Ayeke nzoni mbeni zo ahanda tere ti lo wani pepe: tongana mbeni zo na popo ti ala abaa ti lo atene, ni yeke na ndara tongana ti azo ti dunia so, ayeke nzoni lo ga zo ti gbogbolinda, tongaso si lo ga taa zo ti ndara.

¹⁹Biani, ndara ti azo ti dunia so ayeke ye ti buba na le ti Nzapa. A su na ya ti Mbeti ti Nzapa, atene: “Lo yeke gbu azo ti ndara na lege ti mayere ti ala wani.”

²⁰A kiri a su nga, atene: “Kota Gbia ahinga tënë ti be ti azo ti ndara; lo hinga lo tene, tënë ni ayeke gi asenge senge ye.”

²¹Ndani laa, ayeke nzoni zo oko apika kate ti lo ndali ti mbeni zo pepe, ngbanga ti so ye kue ayeke ti ala, a-ita:

²²ataa Paul, ataa Apolos wala Sefas, ataa dunia, ataa fini wala kuâ, ataa ye ti laso wala ti kekereke. Ye kue ayeke ti ala,

²³me ala, ala yeke ti Christ si Christ ayeke ti Nzapa.