Read sango 2 Korente 4 Bible Online

2 Korente 4 - sango bible

2 Korente 4

¹Nzapa asara nzoni be na e si lo mu na e kua ni so, nilaa be ti e awoko pepe.

²E ke tënë ti aye ti kamene so azo ayeke sara na gbe mingo; e yeke sara ye ti handa na azo pepe, e yeke buba ya ti tënë ti Nzapa pepe. Me e yeke fa taa-tënë na azo, tongaso si na le ti Nzapa, azo kue azia be ti ala na ndö ti e.

³Tongana Nzoni Tënë so e yeke fa so angba na hondengo ni, angba na hondengo ni ndali ti azo so ayeke girisa lege,

⁴azo so ake ti ma na be. Sioni nzapa ti sese so akanga lege ti hingango ndo ti ala titene ala baa zango ti Nzoni Tënë pepe. Andaa Nzoni Tënë ni ayeke fa gonda ti Christ, lo so lo yeke limo ti Nzapa.

⁵Biani, tënë so e yeke fa, e yeke fa ni na ndö ti e wani pepe, me na ndö ti Jésus Christ, lo so lo yeke *Kota Gbia. Ti e, e yeke fa na ala so, e yeke azo ti kua ti ala ndali ti Jésus.

⁶Nzapa so atene ando, atene: “Ayeke nzoni lumiere aza na ya ti vukongo ndo”, lo wani laa lo za na be ti e titene le ti e azi si e hinga gonda ti lo so ayeke za na ndö ti le ti Christ.

⁷Ye so ayeke kota mosoro so alondo na Nzapa, me e so e yeke yo mosoro ni, e yeke tongana asenge ta ti sese. Tongaso si azo ahinga atene, kota ngangu so ahon angangu kue alondo na Nzapa, me na e pepe.

⁸Aye ti ngangu apete e mbage na mbage, me anika e pepe; alege kue akanga na e, me e hon;

⁹azo atumba peko ti e, me ala wara e pepe; azo akinda e, me ala fâ e pepe.

¹⁰Na ngoi kue, e yeke yo na ya ti tere ti e kuâ ti Jésus, tongaso si azo alingbi ti baa fini ti Jésus na ya ti tere ti e ti zo.

¹¹Biani, e so e de na fini, azo ayeke ka e na kuâ lakue ndali ti Jésus, tongaso si azo abaa nga Jésus so ayeke na fini na ya ti tere ti e so ayeke kui ande kuingo so.

¹²Tongaso, kuâ ayeke sara kua na ya ti tere ti e, fini ayeke sara kua na ya ti tere ti ala.

¹³Mbeti ti Nzapa atene: “Mbi yeke tene tënë, ngbanga ti so mbi ma na be.” Tënë ti be ti e ayeke oko na ti zo so atene tënë so, nilaa e nga, e ma na be si e yeke tene tënë so.

¹⁴Biani, e hinga so, Nzapa so azingo Kota Gbia Jésus na kuâ, fade lo yeke zingo nga e na Jésus si lo yeke zia e na ala titene e duti na tere ti lo.

¹⁵Aye so kue ayeke si na e ndali ti ala titene azo so Nzapa asara nzoni be na ala, wungo ti ala ayeke gue gi na nduzu, tongaso si gba ti azo amu singila na lo si ala gonda lo.

¹⁶Ndani laa be ti e awoko pepe. Ataa so tere ti e ti zo ayeke buba kete na kete, fini so ayeke na be ti e kâ ayeke wara ti lo ngangu lakue.

¹⁷Pasi so e yeke baa fadeso ayeke gi ndali ti kete ngoi. Pasi ni ayeke leke e ndali ti kota gonda so ayeke ngba lakue lakue si ayeke kota ahon ndoni.

¹⁸Ye so le ti zo ayeke baa, ni laa e yeke gi pepe, me e yeke gi ye so le ti zo ayeke baa ni pepe. Ye so le ti zo ayeke baa ayeke gi ndali ti kete ngoi, me ye so le ti zo ayeke baa pepe, ni laa ayeke ngba lakue lakue.